GINAKULBAAN ka bala sa mahimo matabo sa palaabuton? Kon huo, indi lang ikaw ang nagabatyag sini. Halin sang una, ginahaumhaum na sang mga tawo ang palaabuton, kag madamo ang nagasiling nga madulom ini. Halin pa sang una, interesado na ang mga tawo sa katapusan sang kalibutan.

Halimbawa, binagbinaga ang bag-o nga mga istorya. Ginapakita sa mga komiks, TV, pelikula, kag mga libro ang parte sa nagahilapit nga katapusan. Lainlain ang mga kaaway nga gusto maglaglag kag mag-ubos sa katawhan—robot, monster, alien, zombie, murto, dragon, amu, pispis, ilaga, kag higante nga sapatsapat. Siempre, daw indi gid man mapatihan ini nga mga istorya.

May mga istorya man nga nagapakulba sa pila ka tawo. Ang iban sini ginasuportahan kuno sang siensia. May isa ka istorya nga ang naibabaw kuno nga anib sang duta magausmod nga pagatunaan sang dalagku nga mga tsunami, linog, kag paglupok sang mga bulkan. Suno naman sa isa pa ka istorya, maabot kuno ang tion nga ang mga planeta magaposisyon sa isa lang ka linya, gani ang solar wind magalab-ot sa duta kag magadala sang kagulub-an. May istorya pa gid nga magabayluhanay kuno ang mga magnetic pole amo nga ang radiasyon sang adlaw magapatay sa aton tanan. Pero, indi magkabalaka kay ini nga mga butang indi gid matabo. Apang, madamo gihapon nga tawo ang nagaimadyin sini nga mga hitabo.

 Kamusta naman ang tuman kadamo nga libro kag mga Web site nga may mga prediksion nga sa Disiembre 21 sini nga tuig maguba ang kalibutan? Suno sa isa ka prediksion, ang planeta nga Nibiru (ukon Planet X) nagapalapit na sa duta kag magabunggo ini sa Disiembre 2012. Ini nga mga teoriya nga wala sing basihan ginaangot nila sa ila interpretasyon sa kalendaryo sang mga Maya, nga suno sa pila matapos sa Disiembre 2012.

Bangod sini nga mga prediksion, ang iban naghimo sing palanaguan sa likod sang ila balay, ukon indi gani naggasto sing daku para magbakal sing puluy-an sa idalom duta. Ang iban naman nagsaylo sa kabukiran nga malayo sa sibilisasyon.

Siempre may mga tawo nga wala nagapati sa sini. Para sa ila, wala sing katapusan ang kalibutan. Halimbawa ang mga sientipiko sa NASA nagasiling: “Wala sing malain nga matabo sa duta sa 2012. Ang aton planeta nagaluntad na sing sobra sa 4 ka bilyon ka tuig, kag ang masaligan nga mga sientipiko nagasiling nga wala sing katalagman nga magaabot sa 2012.”

Pero sayop man kon hunahunaon naton nga wala sing katalagman nga ginaatubang ang katawhan, ukon kabigon nga ignorante ang mga tawo nga nagapati sa katapusan sang kalibutan. Magaabot gid bala ang katapusan sang kalibutan? Kon amo, san-o kag paano?