MATAPOS mo mabasa ang nauna nga mga artikulo, mahimo magaugyon ka nga mangin mas maayo ang imo panglawas, makadesisyon ka sing maayo, kag makatigayon sang maayo nga mga abyan kon mas pasensioso ka. Gani paano ka mangin mas pasensioso? Binagbinaga ang masunod nga mga panugda.

Ano nga mga butang ukon mga sitwasyon ang nagaubos sang imo pasensia? May mga tawo bala nga nagatakus sang imo pasensia? Mahimo ayhan nga ang imo tiayon, ginikanan, ukon kabataan ang panguna nga rason sang pagkaubos sang imo pasensia? Ukon bangod bala sa tion? Halimbawa, pirme bala nagakaubos ang imo pasensia kon may ginahulat ka ukon kon daw maleyt ka na? Ukon nagakatabo bala ini kon kapoy ka, gutom, tuyo, ukon gina-stress? Diin sa masami nagakaubos ang imo pasensia, sa imo ulubrahan ukon sa inyo balay?

Ngaa makabulig kon mahibaluan mo ang rason kon ngaa nagakadula ang imo pasensia? Nagsulat sang una si Hari Solomon: “Ang mahalongon nga tawo nakakita sang malaut kag nagapanago sia; apang ang kulangkulang nagapadayon, kag nagaantus tungud sini.” (Hulubaton 22:3) Pareho sang ginasiling sini nga hulubaton sa Biblia, kon ginapaabot ukon ‘nakita’ mo na nga daw maubos ang imo pasensia, mahimo nga mapunggan mo ini. Sa umpisa ayhan mabudlay ini, pero kon padayon mo ini nga himuon mangin mahapos na lang ini sa ulihi.

Suno kay Propesor Noreen Herzfeld, nga nagatudlo sang computer science sa Saint John’s University, sa Minnesota, U.S.A., “indi gid madungan sang mga tawo ang ila mga obra. Ang utok ginabudlayan magkonsentrar sa madamo nga butang sing dungan.” Nagdugang pa sia: “Kon pirme naton ginadulungan ang aton mga obra, indi kita makapokus, kag sa ulihi madula ang aton pasensia, dali kita mangampo, indi kita makadesisyon, kag indi na makahibalo magsolbar sang problema.”

Mabudlay mangin pasensioso kon kadamo sang imo ulubrahon, kaladtuan, kag sang tawo nga dapat atenderon. Si Dr. Jennifer Hartstein, nga ginsambit sa nauna nga mga artikulo, nagpaandam: “Ang stress amo ang panguna nga rason sang pagkadula sang aton pasensia.”

Gani i-enjoy ang kabuhi. Maghimo sing matuod nga pagpakig-abyan bisan sa pila lang, sangsa magpangita sing madamo pero indi man sinsero. Badyeta ang imo tion kag hibalua ang mga dapat unahon. Maghalong sa kalingawan kag mga gadyet nga nagaubos sang tion.

Agod mapasimple ang imo kabuhi, kinahanglan usisaon mo ang imo ginahimo kada adlaw. Diin ang puede mo buhinan ukon untaton? Ang isa ka hulubaton sa Biblia nagasiling: “Sa tagsa ka butang may panag-on . . . , tion sa pagtago, kag tion sa pagpilak.” (Manugwali 3:1, 6) Ayhan dapat  mo na untaton ang mga butang nga nagaubos sang imo tion agod indi ka mangin tuman kasako nga amo ang rason sang pagkadula sang imo pasensia.

Dapat realistiko ang imo pagtamod sa kabuhi. Una, wala nagakatabo ang mga butang sa kadasigon nga gusto naton. Batuna ang kamatuoran nga indi mo mapadasig ang oras. Amo ina ang ginatawag nga pasensia.

Ikaduha, dumduma nga indi mo kontrolado ang mga hitabo. Ang maalam nga si Hari Solomon nagsulat: “Ginbinagbinag ko liwat ang mga butang diri sa duta kag nakita ko nga ang palumba indi pirme para sa madasig, ukon ang inaway para sa makusog, ukon ang pagkaon para sa maalamon, ukon ang manggad para sa may paghangop, ukon ang kahamuot para sa may ihibalo; bangod ang tion kag ang wala ginapaabot nga hitabo nagakatabo sa ila tanan. Kay wala sing tawo nga nakahibalo kon san-o sia mapatay.”—Manugwali 9:11, 12, NW.

Indi pag-ubusa ang imo pasensia sa mga butang nga indi mo kontrolado, kundi hibalua ang mga butang nga makontrol mo. Halimbawa, imbes nga mangakig kon maulihi ang bus ukon ang tren, mangita sing iban nga paagi agod makaabot sa imo kaladtuan. Ayhan mas maayo kon lakton mo na lang sangsa magkumodkumod kag magpangakig. Kon wala na gid sang iban nga paagi, maghimo sang iban nga butang, pareho sang pagbasa ukon pagsulat sang imo mga plano.

Napamatud-an na nga wala sang pulos ang sobra nga pagkabalaka sa mga butang nga indi naton kontrolado. Ang Biblia nagasiling: “Sin-o sa inyo ang makapalawig sang inyo kabuhi bisan diutay lang paagi sa inyo pagpalibog? Wala gid!” —Lucas 12:25, Ang Pulong sang Dios, APD.

Napamatud-an sang madamo nga nagapati sa Biblia nga ang pag-aplikar sang mga prinsipio sini makabulig gid para mangin pasensioso. Suno sa Biblia, ang tawo nga suod sa Dios mas pasensioso, kag nagapakita man sing gugma, kalipay, paghidait, kaayo, kag pagpugong sa kaugalingon. (Galacia 5:22, 23) Ang Biblia nagpromisa: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna.” (Filipos 4:6, 7) Tun-i ang Biblia para mahibaluan mo kon paano buhinan ang imo kabalaka kag mangin mas pasensioso.