Para mahibaluan ang imo pagtamod, hunahunaa ang masunod nga mga kahimtangan.

Sin-o sa banta mo ang matuod nga madinalag-on?

• ALEX

  May negosyo si Alex. Bunayag sia, mapisan, kag matinahuron. Nagtin-ad ang iya negosyo, amo nga masulhay ang pagkabuhi nila sang iya pamilya.

• CAL

  Pareho man ang negosyo ni Cal kay Alex, pero mas daku ang iya kita. Para malabawan niya si Alex, nagabakabaka sia obra amo nga madamo sia sing balatian.

• JANET

  Si Janet mapisan nga estudyante kag nanamian gid magtuon. Gani, mataas ang iya grado.

• ELLEN

  Mas mataas ang grado ni Ellen kay Janet kag honor-roll sia. Pero nagapangodigo sia kag wala niya ginaserioso ang iya pag-eskwela.

Kon magsiling ka nga sanday Cal kag Ellen—ukon sila nga apat—ang madinalag-on, mahimo nga ginabase mo ang kadalag-an sa mga resulta lang, bisan ano man ang ila ginahimo para matigayon ini.

Pero kon magsiling ka nga sanday Alex kag Janet lang, mahimo nga ginabase mo ang kadalag-an sa ila mga kinaiya kag batasan sa trabaho. Husto gid ina. Binagbinaga ang masunod nga mga halimbawa.

• Ano ang mas maayo para kay Janet—nga makatigayon sia sang pinakamataas nga grado ukon mapalambo niya ang kaluyag sa pagtuon?

• Ano ang mas maayo para sa kabataan ni Alex—nga mabakal nila ang tanan nga luyag nila ukon may amay sila nga may tion para sa ila?

Ang leksion: Ang indi matuod nga kadalag-an nabase sa kon ano lang ang makita; ang matuod nga kadalag-an nabase sa maayo nga mga kinaiya.