Sang 2007, ginpahibalo sang Ecuador ang plano nga gastuhan ang pag-amlig sang halos 10,000 kilometros kuadrados sang talon sa Amazon sa baylo nga kuhaan sang langis. Wala na ini gindayon kay indi magsakdag ang iban nga pungsod sa gasto. Sa bilog nga kalibutan, ini nga bahin sang talon sang Amazon amo ang may pinakadamo nga nagkalainlain nga buhi nga mga tinuga.

Mabudlay gid mahibaluan kon ang dugo mahigko, siling sang The Japan News. Suno sa ginreport nga balita sang 2013, ang sisentahon nga lalaki nalatnan sang HIV kay nagpatughong sia sang dugo. Kon may HIV ang gindonar nga dugo, may tion nga indi mahibal-an kon may virus ini.

Bisan pa 30 ka tuig na nga nag-untat ang inaway sang mga rebelde sa dulunan sang Zimbabwe kag Mozambique, ang ginlubong nga mga bomba diri padayon gihapon nga nagahalit kag nagapatay. “Halin sang 1980, sobra na sa 1,500 ka tawo kag 120,000 ka sapat ang napatay kag 2,000 ka tawo ang nahalitan sini sa dulunan sang Zimbabwe,” report sang International Committee of the Red Cross.

Suno sa isa ka surbe, labi nga nagadamo ang nagabulagay nga mag-asawa nga nagaaway kon sin-o ang maatipan sang ila hinuptanan. Ginaawayan nila ang ila mga pagkabutang, kuarta, personal nga mga kagamitan, kag dayon ang ila hinuptanan.