ANG putyukan makahugpa nga wala sing problema sa bisan ano lang nga anggulo. Paano nila ini ginahimo?

Binagbinaga: Para maayo ang paghugpa sang putyukan, dapat nga magbahar sia sing tama ka hinay antes maghugpa. May duha ka butang nga dapat niya bantaon para mahimo ini—ang iya kadasigon kag ang kalayuon sang iya hulugpaan—kag dayon magbahar sia base sa sini. Pero nabudlayan ang kalabanan nga insekto sa paghimo sini bangod indi nila ma-adjust ang pokus sang ila mga mata kag indi nila mabanta ang kalayuon.

Ang panulok sang mga putyukan lain gid sa panulok sang mga tawo nga makabulubanta sang kalayuon sang isa ka butang. Simple lang ang ginabasihan sang mga putyukan. Para sa ila, nagadaku ang isa ka butang kon nagalapit ini. Kon nagalapit sila sa isa ka butang, daw nagadasig man ang pagdaku sini. Ginapakita sang mga eksperimento nga ginhimo sa Australian National University nga nagabahar ang putyukan para palareho ang kadasigon sang pagdaku sang isa ka butang sa iya panan-aw. Sa tion nga makaabot ang putyukan sa iya hulugpaan, tama na ka hinay ang iya kadasigon amo nga makahugpa sia sing maayo.

Ang balasahon nga Proceedings of the National Academy of Sciences nagasiling: “Ining simple nga estratehiya sa paghugpa . . . maayo gid nga gamiton sa program nga nagagiya sa mga robot nga nagalupad.”

Ano sa banta mo? Ang estratehiya sang putyukan sa paghugpa resulta bala sang ebolusyon? Ukon gindesinyo ini?