SA ISA ka malinong nga aga sa Brookings, South Dakota, U.S.A., matugnaw ang hangin. Mabatyagan ko nga malapit na lang magtigtulugnaw. Pero mahimo matingala kamo kon ngaa ang pila sa amon sina nga adlaw nagakurog sa katugnaw sa isa ka kamalig. Nagatindog kami palibot sa isa ka daku nga suludlan nga may mabugnaw nga tubig! Sugiran ko kamo anay sang akon nagligad para mahangpan ninyo kon ngaa amo sini ang amon kahimtangan.

Natawo ako sang Marso 7, 1936, kag ako ang kinagot sa apat ka kabataan. Nagapuyo kami sa uma sa nasidlangan sang South Dakota. Panguma ang palangabuhian sang amon pamilya, pero indi ini ang pinakaimportante para sa amon. Nabawtismuhan subong mga Saksi ni Jehova ang akon mga ginikanan sang 1934. Gindedikar nila ang ila kabuhi sa aton Amay sa langit, si Jehova, gani nangin prioridad nila ang paghimo sang kabubut-on sang Dios. Ang akon tatay nga si Clarence, kag sang ulihi ang akon tiyo nga si Alfred, nangin company servant (ginatawag subong nga koordenitor sang hubon sang mga gulang) sang amon diutay nga kongregasyon sa Conde, South Dakota.

Regular kami nga nagatambong sa mga miting kag nagapamalaybalay para sugiran ang iban parte sa makalilipay nga paglaum sa palaabuton suno sa Biblia. Maayo ang epekto sa amon nga kabataan sang halimbawa kag paghanas sang akon mga ginikanan. Nangin manugbantala sang Ginharian si Manang Dorothy sang anom pa lang sia ka tuig, kag amo man ako. Sang 1943, nagpalista ako sa Teokratikong Eskwelahan Para sa Ministeryo, nga bag-o lang nalakip sa aton mga miting.

Importante para sa amon ang mga kombension kag mga asembleya. Si Utod Grant Suiter ang  nagaduaw nga humalambal sa isa ka kombension sa Sioux Falls, South Dakota, sang 1949. Madumduman ko pa ang iya pamulongpulong nga “Mas Malapit Ini Sangsa Imo Ginahunahuna!” Ginpadaku niya nga dapat gamiton sang tanan nga dedikado nga Cristiano ang ila bug-os nga kabuhi sa pagbantala sang maayong balita sang nagagahom na nga Ginharian sang Dios. Napalig-on ako sini nga idedikar ang akon kabuhi kay Jehova. Gani sang masunod nga sirkito nga asembleya, sa Brookings, nalakip ako sa akon ginlaragway kaina nga balawtismuhan sa matugnaw nga kamalig. Ang salsalon nga suludlan sang tubig amo ang ginbawtismuhan sa amon nga apat sang Nobiembre 12, 1949.

Namat-od dayon ako nga magpayunir. Nagsugod ako sang Enero 1, 1952, sang 15 anyos ako. Ang Biblia nagsiling: “Ang tawo nga nagaupod sa maalamon mangin maalamon man,” kag kadamo sang mga maalam sa amon pamilya nga nagsuporta sa akon desisyon nga magpayunir. (Hulu. 13:20) Si Tiyoy Julius, nga 60 anyos na, amo ang nangin partner ko. Masadya ang amon ministeryo bisan tigulang na sia kag bata pa ako. Madamo ako sing natun-an sa iya mga eksperiensia. Nagpayunir man dayon si Manang Dorothy.

Madamo nga manugtatap sang sirkito upod ang ila mga asawa ang ginpadayon sang akon mga ginikanan sa amon puluy-an sang lamharon pa ako. Ang mag-asawa nga nakabulig gid sa akon amo sanday Jesse kag Lynn Cantwell. Lakip sila nga nagpalig-on sa akon nga magpayunir. Bangod sang ila pag-ulikid sa akon, nakapahamtang ako sing mga tulumuron sa espirituwal. Kon nagaduaw sila sa kongregasyon nga malapit sa amon, ginaagda nila ako nga mag-upod sa ila sa ministeryo. Nalipay gid ako kag napalig-on bangod sini!

Si Bud Miller amo ang nagbulos nga nagalakbay nga manugtatap kag upod niya ang iya asawa nga si Joan. Disiotso anyos ako sadto kag gina-recruit nga mangin soldado. Gusto sang komite nga nagapili sang mga soldado nga supakon ko ang laygay ni Jesus sa iya mga sumulunod nga dapat mangin neutral sa pulitika. Kag luyag ko nga ibantala ang maayong balita sang Ginharian. (Juan 15:19) Nag-apelar ako sa komite nga ilakip ako sa listahan sang mga ministro.

Nalipay ako kay nagboluntaryo si Utod Miller nga updan ako sa hearing sang komite. Mainabyanon gid sia kag indi mahuluy-on. Napalig-on gid  ako kay gin-updan niya! Bangod sini nga hearing, ginbaton ako sang komite nga isa ka ministro sadtong manugtapos na ang tig-ilinit sang 1954. Makapadayon na ako sa pag-alagad kay Jehova.

Wala madugay pagkatapos sini, nabaton ko ang imbitasyon nga mag-alagad sa Bethel, sa ginatawag sadto nga Watchtower Farm, sa Staten Island, New York. Mga tatlo ka tuig ako nga nag-alagad didto. Madamo ako sang makalilipay nga eksperiensia kay naupod ko sa obra ang mga maalam nga kauturan didto.

Didto sa Watchtower Farm sa Staten Island ang estasyunan sang radyo nga WBBR. Gingamit ini sang mga Saksi ni Jehova sugod sang 1924 asta 1957. Mga 15 asta 20 lang ka miembro sang pamilya Bethel ang gin-asayn didto. Kalabanan sa amon lamharon pa kag wala sing eksperiensia. Pero upod namon si Eldon Woodworth, isa ka medyo may edad na nga hinaplas. Lakip sia sa mga maalam. Madamo sia sang gintudlo sa amon pareho sang isa ka amay kag makapalig-on gid ini. Kon may problema kon kaisa sa tunga namon, si Utod Woodworth magasiling, “Talalupangdon gid ang ginahimo sang Ginuo bisan pa nga indi himpit ang mga nagahimo sini.”

Nangin kaupod man namon si Utod Frederick W. Franz kag ginbuligan man niya kami. Maalam sia kag madamo gid sia sing nahibaluan sa Biblia. Napalig-on man kami sa iya kay nagaulikid sia sa kada isa sa amon. Ang amon kusinero amo si Harry Peterson; ginatawag namon sia nga Utod Peterson kay kabudlay gid sang iya matuod nga apelyido nga Papargyropoulos. Hinaplas man sia kag makugi gid sia sa ministeryo. Mapisan mag-obra si Utod Peterson sa Bethel, pero wala gid niya ginapatumbayaan ang pag-alagad sa latagon. Makapahamtang sia sing ginatos naton ka magasin kada bulan. Madamo man sia sing nahibaluan sa Biblia, kag ginasabat niya ang amon mga pamangkot.

Ang produkto sa Watchtower Farm ginapreserbar mismo didto kag ginasulod sa mga botelya. Ang mga prutas kag utanon nga mapreserbar kada tuig para sa pamilya Bethel mga 45,000 ka botelya nga mga tig-isa ka litro ang unod. Parte sa sini nga hilikuton, nangin kaupod ko si Etta Huth, isa ka maalam man nga sister. Sia ang nagahimo sang mga resipe para sa mga prutas kag utanon. Nagabulig ang mga sister malapit sa Watchtower  Farm kon madamo sing iproseso nga mga prutas kag utanon, kag sia ang nagaorganisar sa ila. Bisan pa si Etta ang nagaorganisar, maayo gid sia nga halimbawa sa pagpakita sing pagtahod sa mga utod nga lalaki nga nagadumala sang Watchtower Farm. Ginatamod ko sia nga maayong halimbawa sa pagpasakop sa kahimusan sang Dios.

Si Angela Romano isa sa mga sister nga nagabulig sa pagpreserbar sang mga prutas kag utanon. Ginbuligan sia ni Etta sang bag-o pa lang sia sa kamatuoran. Gani, samtang nagaalagad ako sa Bethel, nakilala ko pa gid ining isa ka maalam nga sister, nga nangin kaupod ko sa pag-alagad kay Jehova sing 58 ka tuig. Ginkasal kami ni Angie sang Abril 1958, kag madamo kami sing pribilehiyo sa pag-alagad. Nangin mabakod ang amon pag-asawahay sa sulod sang mga tinuig bangod sang iya katutom kay Jehova. Masaligan ko gid sia bisan ano pa nga kabudlayan ang amon maatubang.

Sang ginbaligya ang WBBR sa Staten Island sang 1957, nakaalagad ako sa Bethel sa Brooklyn sa malip-ot nga tion. Ginpangasawa ko si Angie, gani naggua ako sa Bethel, kag sa sulod sang mga tatlo ka tuig, nagpayunir kami sa Staten Island. Nakaobra pa gani ako sa bag-o nga mga tag-iya sang estasyunan sang radyo, nga ginatawag na nga WPOW.

Namat-od kami ni Angie nga pasimplehon ang amon kabuhi para puede kami makaalagad kon diin daku ang kinahanglanon. Gani sang nauna nga mga binulan sang 1961, nabaton namon ang asaynment subong espesyal payunir sa Falls City, Nebraska. Pero wala madugay pag-abot namon didto, gin-agda kami nga mag-eskwela sing isa ka bulan sa Kingdom Ministry School, didto sa South Lansing, New York. Nalipay kami sa pag-eskwela kag naglaum kami nga gamiton ang amon natun-an pagbalik namon sa Nebraska. Pero nakibot kami sang ginhatagan kami sing bag-o nga asaynment nga mangin misyonero sa Cambodia! Sa sining matahom nga pungsod sa Southeast Asia, nakita namon, nabatian, kag natilawan ang mga butang nga bag-o sa amon. Nalangkag gid kami nga sugiran ang mga tawo sang maayong balita.

Pero nagbag-o ang kahimtangan sang pulitika sa Cambodia, amo nga nagsaylo kami sa South Vietnam. Pagligad sang duha ka tuig, nagmasakit ako sing grabe, gani dapat kami magpauli sa Estados Unidos. Kinahanglan ko magpahuway, pero sang nag-ayo na ako, nagpayunir kami liwat.

Sang Marso 1965, nag-alagad ako sa mga kongregasyon bilang nagalakbay nga manugtatap. Nag-alagad kami ni Angie sing 33 ka tuig sa sirkito kag distrito nga hilikuton, kag nakabulig kami sa pag-organisar sang mga kombension. Nanamian gid ako kon kombension, gani nalipay gid ako mag-organisar sini. Pila ka tuig nga nagduaw kami sa mga kongregasyon sa New York City, kag pila ka kombension ang ginhiwat sa Yankee Stadium.

Pareho sang madamo nga yara sa pinasahi nga bug-os tion nga pag-alagad, nakabaton kami ni Angie sang bag-o kag mabudlay nga mga asaynment. Halimbawa, sang 1995, gin-asayn ako nga magtudlo sa Ministerial Training School. Tatlo ka tuig sang ulihi, gin-agda kami sa Bethel. Pagligad  sang masobra 40 ka tuig, nalipay ako nga magbalik sa Bethel, kay diri ako nagsugod sa pinasahi nga bug-os tion nga pag-alagad. Naasayn ako sa Service Department kag nangin instruktor sa pila ka eskwelahan. Sang 2007, gintukod sang Nagadumala nga Hubon ang bag-o nga Theocratic Schools Department nga amo ang magadumala sang tanan nga eskwelahan nga ginahiwat sa Bethel, kag ako ang nangin manugtatap sini sa sulod sang pila ka tuig.

Sining nagligad nga mga tinuig, madamo ang pagbag-o sa mga eskwelahan sa Bethel. Ang School for Congregation Elders nagsugod sang 2008. Pagligad sang duha ka tuig, masobra 12,000 ka gulang ang nakaeskwela sa sini sa Patterson kag sa Bethel sa Brooklyn. Ini nga eskwelahan padayon nga ginahiwat sa iban nga duog, kag ginhanas ang mga instruktor sa sini. Sang 2010, gin-islan ang ngalan sang Ministerial Training School sing Bible School for Single Brothers, kag isa ka bag-o nga eskwelahan ang ginsugdan, ang Bible School for Christian Couples.

Sugod sang 2015 nga tuig sang pag-alagad, gintingob ang duha ka eskwelahan kag gintawag ini nga School for Kingdom Evangelizers. Ang mga estudyante sa sini puede minyo kag indi minyo. Madamo ang nalipay sa bug-os nga kalibutan sang mahibaluan nila nga hiwaton ini nga eskwelahan sa madamo nga sanga. Makalilipay nga madamo ang may kahigayunan nga makaeskwela sa sini nga mga eskwelahan, kag nalipay gid ako nga madamo ang akon nakilala nga nagpanikasog nga matigayon ini nga paghanas.

Kon dumdumon ko ang akon nagligad antes ako ginbawtismuhan didto sa matugnaw nga kamalig, ginapasalamatan ko si Jehova kay ginbuligan ako sang mga maalam nga makapabilin sa kamatuoran. Ang pila sa ila lamharon sa akon kag ang pila magulang sa akon. Madamo sa ila ang tuhay sing kultura. Pero sila tanan diosnon nga mga tawo. Makita sa ila mga buhat kag panimuot nga ginahigugma gid nila si Jehova. Madamo sa iya organisasyon ang mga maalam nga puede naton mangin suod nga mga abyan. Ginhimo ko ini, kag nakabenepisyo gid ako.