Balaan nga Espiritu—Ngaa May Lainlain nga Pagpati?

ANO ang balaan nga espiritu? Daw kahapos sini nga pamangkot pero kabudlay sabton. Si Pope Benedict XVI nagsiling sa isa ka grupo sa Australia: “Daw indi naton mahangpan kon ano gid ang Espiritu.”

Kon pamangkuton ang mga tawo kon ano ang balaan nga espiritu, lainlain ang ila opinyon kag indi sila sigurado. Amo sini ang masami nga ginasabat nila:

• Isa ini ka matuod nga persona nga nagasulod sa lawas sang mga disipulo ni Cristo.

• Presensia ini sang Dios nga nagapanghikot sa kalibutan.

• Ikatlo ini nga persona sang Trinidad.

Ngaa lainlain ang ila sabat? Halin pa sang ikap-at nga siglo C.E., nagsiling na ang pila ka teologo nga ang balaan nga espiritu isa ka persona nga tupong sa Dios. Pero, indi amo sini ang ginatudlo sang Biblia ukon sang mga sumulunod ni Cristo sang una. Ang New Catholic Encyclopedia nagpaathag: “Ang Daan nga Testamento wala nagsiling nga ang espiritu sang Dios isa ka persona . . . Ang espiritu sang Dios amo ang gahom sang Dios.” Kag nagsiling pa ini: “Ginapakita sang kalabanan nga teksto sa Bag-ong Testamento nga ang balaan nga espiritu indi persona, . . . ilabi na sang ginpatuhuyan sini ang espiritu subong gahom sang Dios.”

Siempre pa, indi gid paghunahunaon sang mga tawo nga ang gahom isa ka persona. Gani, suno sa isa ka surbe sining karon lang sa Amerika, ang kalabanan wala nagapati nga ang balaan nga espiritu isa ka persona. Husto bala sila? Ukon dapat bala naton patihan ang ginainsister sang mga teologo nga “ang Espiritu Santo isa ka Persona nga lain gid sa Amay kag sa Anak”?

Para mahibaluan naton ang husto nga sabat, dapat naton usisaon ang Biblia kay detalyado nga ginapaathag sini kon ano ang balaan nga espiritu. Si apostol Pablo nagsulat: “Ang bug-os nga Kasulatan ginsulat paagi sa gahom sang Dios, kag mapuslanon sa pagtudlo sang kamatuoran, sa pagsabdong sang sala.”—2 Timoteo 3:16, Ang Pulong sang Dios.

Ngaa dapat mo usisaon kon ano gid ang matuod parte sa balaan nga espiritu? Kay sa pag-usisa mo sini, mabaton mo ang bulig sang Dios. May problema ka bala nga daw indi mo na masarangan? Nagsaad si Jesus sa iya mga disipulo: “Padayon sa pagpangayo, kag hatagan kamo . . . Kon kamo . . . makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!”—Lucas 11:9, 13.

Sa masunod nga mga artikulo, ipaathag sa aton sang Biblia kon ano gid ang balaan nga espiritu. Kag tan-awon naton kon paano ini makabulig sa aton.

[Blurb sa pahina 3]

Ginapaathag sa aton sang Kasulatan kon ano gid ang balaan nga espiritu