Ang Kamatuoran Parte sa Armagedon
Ang Kamatuoran Parte sa Armagedon
“Mga espiritu sila sang mga yawa . . . nga nagakadto sa mga hari sa bug-os nga kalibutan . . . , kag gintipon nila sila sing tingob sa duog nga ginatawag sa Hebreo Armagedon [“Har–Magedon,” NW].” (Italiko amon.)—BUGNA 16:14, 16, PBS.
ANG Armagedon, nga ginatawag kon kaisa nga “Harmagedon,” ngalan sang isa ka duog. Pero daw wala man sing amo sini nga lugar sa kalibutan.
Kon amo, ano gid ang buot silingon sang tinaga nga “Armagedon”? Ngaa pirme ini ginapatuhoy sa isa ka hitabo, pareho sang inaway?
Nagtipon sa Duog nga Ginatawag Armagedon
Ang orihinal nga Hebreo nga tinaga nga Har–Magedon literal nga nagakahulugan nga “Bukid sang Megido.” Wala sing amo sini nga bukid, pero may lugar nga ginatawag Megido. Nahamtang ini sa aminhan-katundan nga bahin sang lugar nga gin-istaran sang mga Israelinhon sang una. Madamo nga inaway ang natabo malapit sa sini nga lugar. Gani ang “Megido” nangin termino para sa inaway. *
Pero indi importante kon ano nga inaway ang natabo didto, kundi kon ngaa nagainaway sila. Ang Megido bahin sang Ginsaad nga Duta nga ginhatag ni Jehova nga Dios sa mga Israelinhon. (Exodo 33:1; Josue 12:7, 21) Nagpromisa sia sa ila nga proteksionan sila sa mga kaaway, kag gintuman niya ini. (Deuteronomio 6:18, 19) Halimbawa, sa Megido, ginproteksionan ni Jehova ang mga Israelinhon batok sa mga soldado ni Hari Jabin sang Canaan kag sa iya pangulo nga soldado nga si Sisera.—Hukom 4:14-16.
Kon amo, ang tinaga nga “Har–Magedon,” ukon “Armagedon,” may daku nga kahulugan. Nagapatuhoy ini sa isa ka inaway, diin ang duha ka gamhanan nga puersa nagaengkuentrohanay.
Ginsambit sang tagna sa Bugna nga sa indi madugay impluwensiahan ni Satanas kag sang iya mga demonyo ang mga gobierno sang tawo para tipunon ang ila mga puersa, nga tanda sang ila pagpamatok sa katawhan sang Dios kag sa ila hilikuton. Ini nga pagsalakay magaresulta sa kamatayon sang minilyon kon laglagon na sang Dios ang mga kaaway.—Bugna 19:11-18.
Ngaa laglagon sang Dios nga “maloloy-on, makuli sa pagpangakig kag bugana sa malig-on nga paghigugma” ang madamo nga tawo? (Nehemias 9:17) Para maintiendihan ini, hibaluon anay naton ang sabat sa sining tatlo ka pamangkot: (1) Sin-o ang maumpisa sang inaway? (2) Ngaa nadalahig ang Dios? (3) Ano ang permanente nga epekto sini sa duta kag sa mga tawo?
1. SIN-O ANG MAUMPISA SANG INAWAY?
Ang inaway sa Armagedon indi resulta sang kaakig sang Dios. Sa baylo, sa sini nga inaway, proteksionan sang Dios ang maayo nga mga tawo sa ila mga kaaway. Ang maumpisa sini amo ang “mga hari sang bug-os napuy-an nga duta,” ukon mga lider sang kalibutan. Ngaa himuon nila ini? Bangod impluwensiahan ni Satanas ang mga gobierno kag mga puersa militar para salakayon ang mga sumilimba ni Jehova nga Dios.—Bugna 16:13, 14; 19:17, 18.
Sa pila ka pungsod subong, ang mga tawo may kahilwayan sa paghambal kag sa pagpili sang relihion, gani daw imposible nga kontrolon ukon dumilian sang mga gobierno ang mga relihion. Pero may amo sini nga pagsalakay nga natabo sang ika-20 nga siglo kag bisan sa subong. * Apang may duha ka daku nga kinatuhayan ini nga pagsalakay kag ang pagsalakay nga matabo sa Armagedon. Una, ang pagsalakay sa Armagedon matabo sa bilog nga kalibutan. Ikaduha, mas daku ang himuon ni Jehova nga Dios sa Armagedon sangsa ginhimo niya sadto. (Jeremias 25:32, 33) Ginalaragway ini sang Biblia subong “inaway sang daku nga adlaw sang Dios nga Labing Gamhanan.”
2. NGAA NADALAHIG ANG DIOS?
Ginatudluan ni Jehova ang iya mga sumilimba nga mangin mahidaiton kag higugmaon ang ila mga kaaway. (Miqueas 4:1-3; Mateo 5:43, 44; 26:52) Gani indi sila makig-away kon salakayon sila. Kon indi pagluwason sang Dios ang iya katawhan, maubos gid sila. Gani nadalahig diri ang ngalan ukon reputasyon ni Jehova nga Dios. Kon ang katawhan sang Dios maubos sang mga kaaway, daw ginapakita sini nga si Jehova indi mahigugmaon, indi makatarunganon, ukon wala sing gahom. Indi gid ini matabo!—Salmo 37:28, 29.
Indi gusto sang Dios nga laglagon ang tanan nga tawo, gani naghatag sia sing paandam kon ano ang iya himuon. (2 Pedro 3:9) Ginapakita sa Biblia nga nagbalos sia sang ginsalakay ang iya katawhan sang una. (2 Hari 19:35) Nagpaandam man ang Biblia nga kon salakayon na ni Satanas kag sang iya mga sakop ang katawhan sang Dios, gamiton ni Jehova ang iya gahom batok sa mga kaaway sang iya katawhan. Ang matuod, gintagna sang Biblia nga laglagon ni Jehova ang mga malauton. (Hulubaton 2:21, 22; 2 Tesalonica 1:6-9) Sina nga tion, marealisar sang mga kaaway nga nagapakig-away sila sa Labing Gamhanan.—Ezequiel 38:21-23.
3. ANO ANG PERMANENTE NGA EPEKTO SINI NGA INAWAY?
Ang inaway sa Armagedon magaresulta sa kaluwasan sang minilyon. Ang matuod, matabo ini antes magluntad ang paghidait sa duta.—Bugna 21:3, 4.
Ginsambit sa tulun-an sang Bugna nga may indi maisip nga “dakung kadam-an” nga maluwas sa sini nga inaway. (Bugna 7:9, 14) Paagi sa giya sang Dios, magabulig sila para mangin Paraiso liwat ang duta nga amo ang orihinal nga katuyuan ni Jehova.
Pero san-o salakayon ang katawhan sang Dios?
[Mga Nota]
^ par. 6 Kinaandan na nga ginagamit ang ngalan sang isa ka lugar para patuhuyan ang inaway. Halimbawa, ang siudad sang Hiroshima sa Japan, nga ginguba sang bomba atomika, nangin simbulo sang nuklear nga inaway.
^ par. 13 Ang Holocaust isa ka halimbawa sang pagsalakay sang gobierno para dulaon ang mga relihion kag ang iban nga rasa. Sang naggahom ang Sobyet, grabe man ang paghingabot sa mga relihion sa U.S.S.R. Basaha ang artikulo nga “Ang Mahidaiton nga mga Tawo Nagdepensa sa Ila Maayo nga Ngalan” sa Mayo 1, 2011 nga Ang Lalantawan, nga ginhimo sang mga Saksi ni Jehova.
[Retrato sa pahina 6]
Ginproteksionan ni Jehova nga Dios ang iya katawhan sang una batok sa ila mga kaaway
[Retrato sa pahina 7]
Proteksionan liwat ni Jehova ang iya katawhan sa inaway sa Armagedon
