BATA pa si Roman sang napatay ang iya amigo sa aksidente sa salakyan. “Nasubuan gid ako sang napatay ang akon amigo,” siling niya. “Tinuig na ang nagligad, pero nagapalibog gihapon ako kon ano ang matabo kon mapatay kita.”

Ano man ang aton edad, indi naton gusto nga mapatay. Madamo ang nahadlok kon ano ang matabo kon mapatay sila.

Madamo ang nagapati nga kon ang isa mapatay, may bahin sang iya lawas nga padayon nga nagakabuhi. Nagapati sila nga ang maayo nga mga tawo mapalangit, pero ang mga malain silutan sing wala katapusan bangod sang ila mga sala. Ang iban nagahunahuna nga kon ang isa mapatay wala na sia nagaluntad kag malimtan na lang sa ulihi.

Ginapahangop sang una nga sabat nga kon ang isa mapatay daw buhi lang sia gihapon. Ginapahangop sang ikaduha nga ang kabuhi wala sing katuyuan. Ang mga nagapati sa sini mahimo magsiling: “Magkaon kita kag mag-inom, kay buas mapatay kita.”—1 Corinto 15:32.

Ang Biblia wala nagatudlo nga kon mapatay ang isa may bahin sang iya lawas nga padayon nga nagakabuhi. Gingiyahan sang Dios si Hari Solomon sa pagsulat: “Ang buhi nakahibalo nga mapatay sila, apang ang patay wala makahibalo sang bisan ano.” (Manugwali 9:5) Ang mga “wala makahibalo” wala gid sing hinalung-ong sa nagakatabo sa ila palibot. Wala sila sing mabatyagan ukon mahimo. Gani indi nila mabuligan ukon mahalitan ang mga buhi.

Indi pareho sa ginapatihan sang madamo, indi katuyuan sang Dios nga mapatay ang mga tawo. Gintuga niya ang una nga tawo nga si Adan para mabuhi sing wala katapusan sa duta. Ginsambit lamang sang Dios ang parte sa kamatayon sang ginpaandaman niya si Adan sang silot kon magrebelde sia. Gindumilian  niya si Adan nga magkaon sang bunga sang isa ka kahoy kag ginpaandaman sia nga kon magkaon sia sini, sigurado gid nga “mapatay” sia. (Genesis 2:17) Kon nagtuman lang sanday Adan kag Eva, sila kag ang ila kaliwatan nga matutom sa Dios mabuhi kuntani sing wala katapusan sa duta.

Wala gintuman ni Adan ang Dios, gani nakasala sia kag napatay. (Roma 6:23) Wala sang bahin sang lawas ni Adan nga padayon nga nagkabuhi sang napatay sia. Sa baylo, wala na sia nagluntad. Ang Dios nagsiling kay Adan: “Sa balhas sang imo nawung magakaon ka sing kalan-on tubtub nga magbalik ka sa duta, kay ginkuha ka sa iya; yab-ok ka, kag sa yab-ok magabalik ka.” (Genesis 3:19) Bangod tanan kita kaliwat ni Adan, napanubli naton ang sala kag kamatayon.—Roma 5:12.

Bisan pa nagrebelde si Adan, tumanon sang Dios ang Iya katuyuan nga pun-on ang duta sang kaliwatan ni Adan. (Genesis 1:28; Isaias 55:11) Sa indi madugay, banhawon ni Jehova ang kalabanan nga napatay. Parte sa sina nga tion, si apostol Pablo nagsiling: “May pagkabanhaw sang mga matarong kag mga di-matarong.”—Binuhatan 24:15.

Si Roman nga ginsambit sa umpisa, nagtuon sa Biblia kag nahibaluan niya ang ginatudlo sini parte sa kamatayon kag kay Jehova nga Dios. Daku gid ang epekto sini sa iya. Basaha ang iya sugilanon sa artikulo nga natig-uluhan “Ang Biblia Nagapabag-o sang Kabuhi”.