Sa Biblia, ang tinaga nga “pagtuo” nagapatuhoy sa malig-on nga pagpati nga nabase sa mabakod nga ebidensia. Ang isa nga may pagtuo sa Dios nagasalig nga matuman gid ang Iya mga promisa.

Naghimo sia sing mga desisyon nga nagapakita nga nagapati sia sa mga promisa sang Dios. (Genesis 22:15-18) May kahigayunan sia kuntani nga mangin komportable ang iya pagkabuhi sa Egipto, pero wala niya ini ginpili, kundi “ginpasulabi pa [niya] nga pintasan upod sa katawhan sang Dios sa baylo nga maagom ang umalagi nga pagpangalipay sa sala.” (Hebreo 11:25) Padasudaso lang bala ina nga desisyon nga hinulsulan niya sa ulihi? Indi, kay ang Biblia nagasiling nga “nagpabilin [si Moises] nga mapag-on subong nga nakakita sa Isa nga di-makita.” (Hebreo 11:27) Wala gid sia maghinulsol sa iya mga desisyon.

Ginpabakod man ni Moises ang pagtuo sang iban. Halimbawa, binagbinaga kon ano ang natabo sang daw nakibon ang mga Israelinhon sang mga soldado ni Paraon sa Pula nga Dagat. Bangod nahadlok ang mga Israelinhon sa mahimo matabo, nagpanawag sila kay Jehova kag kay Moises. Ano ang reaksion ni Moises?

Mahimo wala mahibaluan ni Moises nga tungaon ni Jehova ang Pula nga Dagat para maluwas ang mga Israelinhon. Pero nagasalig sia nga may himuon ang Dios para protektahan ang Iya katawhan. Kag gusto niya nga amo man sina ang ila batyagon. Aton mabasa: “Si Moises nagsiling sa katawohan, ‘Dili kamo magkahadluk, pahimonong, kag tan-awa ang kaluwasan sang GINOO, nga himoon niya karon nga adlaw sa inyo.’” (Exodo 14:13) Nagmadinalag-on bala sia sa pagpabakod sang pagtuo sang mga Israelinhon? Huo, kay ang Biblia nagasiling indi lamang parte kay Moises kundi sa tanan nga Israelinhon: “Bangod sa pagtuo nagtabok sila sa Pula nga Dagat subong nga sa mamala nga duta.” (Hebreo 11:29) Indi lang si Moises ang nakabenepisyo sang iya pagtuo kundi ang iban man.

Mailog naton si Moises paagi sa pagpakita nga nagapati kita sa mga promisa sang Dios. Halimbawa, ang Dios nagpromisa nga amanan niya kita sang materyal nga mga kinahanglanon kon unahon naton sa aton kabuhi ang pagsimba sa iya. (Mateo 6:33) Matuod, mabudlay pangindian nga unahon ang materyal nga mga butang kay amo ini ang ginahimo sang kalabanan subong. Pero makasalig kita nga kon himuon naton ang aton bug-os nga masarangan nga huptan nga simple ang aton kabuhi kag isentro ini sa pagsimba, amanan kita ni Jehova sang tanan naton nga kinahanglanon. Nagapasalig sia: “Indi ko gid kamo pagbayaan ukon pagpatumbayaan.”—Hebreo 13:5.

Ginatinguhaan man naton nga buligan ang iban nga mag-uswag sa pagtuo. Halimbawa, ginabuligan sang maalam nga mga ginikanan ang ila kabataan nga magtuo sa Dios. Samtang nagadaku sila, dapat matudluan sila nga may Dios nga nagahatag sa aton sang mga talaksan kon ano ang husto kag sala. Dugang pa, dapat kumbinsido sila nga ang pagsunod sa sini nga mga talaksan amo ang pinakamaayo nga himuon. (Isaias 48:17, 18) Ginahatagan sang mga ginikanan sang malahalon nga regalo ang ila kabataan kon buligan nila sila nga magtuo nga “may Dios nga nagahatag sang padya sa mga nagapangita sa iya.”—Hebreo 11:6, Biblia sang Katilingban sang mga Kristiano.