Kon napaslawan ka sa isa ka relihion, mahimo nga nabudlayan ka na magsalig sa iban pa. Pero makasalig ka nga may relihion pa nga masaligan mo. Sang yari si Jesus sa duta, nagtipon sia sang isa ka grupo sang matutom nga mga sumulunod kag gintudluan sila nga magkabuhi sa mga prinsipio sang Dios. May matuod gihapon nga mga sumulunod si Jesus—mga tawo nga nagapanikasog nga magkabuhi sa mga prinsipio bilang Cristiano. Sin-o sila?

Si Estelle, nga ginsambit sa nagligad nga artikulo, nagsiling: “Nahangpan ko gid man ang Biblia sang nagtuon ako sa mga Saksi ni Jehova. Napamatud-an ko ang ginasiling sang Juan 8:32: ‘Mahibaluan ninyo ang kamatuoran, kag ang kamatuoran magahilway sa inyo.’”

Si Ray, nga ginsambit man kaina, nagsiling: “Paagi sa pagtuon sang Biblia sa mga Saksi ni Jehova, natun-an ko nga indi ang Dios ang kabangdanan sang pag-antos sang mga tawo. Nagapasalamat ako nga mahangpan nga bisan ginatugutan sang Dios ang kalautan subong, nagpromisa sia nga dulaon ini sa indi madugay.”

Matuod, mabudlay ang paghimo sing husto samtang ang kalabanan may manubo nga mga prinsipio sa moral. Pero posible ini. Gusto sang madamo nga tawo nga mahangpan kag iaplikar ang ginasiling sang Biblia. Amo nga minilyon ang ginatun-an sang mga Saksi ni Jehova sa Biblia sa bilog nga kalibutan. Kada semana, madamo ang nagasuod sa ila Manunuga kag nagakabuhi sing malipayon kay ginatun-an nila ang Biblia. *

Kon maistorya mo liwat ang mga Saksi ni Jehova, pamangkuta sila kon ngaa ginasaligan nila ang ila relihion. Usisaa ang ila mga panudlo kag ang ila hinimuan. Dayon magdesisyon kon bala may relihion pa nga imo masaligan.