Si Marta, nga isa ka Saksi ni Jehova sa Guatemala, nagatuon sang Kekchi nga lenguahe para mabantalaan niya ang mga tawo nga nagahambal sang Kekchi. Isa ka adlaw, may nakita sia nga lalaki nga nagapagua sa ospital. Base sa iya hitsura, napensaran dayon ni Marta nga basi ini nga lalaki halin sa baryo sang mga Kekchi sa malayo nga kabukiran, amo nga talagsa lang sila mabantalaan sang mga Saksi ni Jehova. Ginpalapitan niya sia kag gin-istorya sa Kekchi bisan indi pa sia sagad maghambal sini.

 Ginpamangkot sia ni Marta kon gusto niya magtuon sa Biblia. Malipayon nga nagpasugot ang lalaki pero nagsiling sia nga wala sia sing ibayad. Ginpaathagan sia ni Marta nga wala sing bayad ang pagtuon sa Biblia upod sa mga Saksi ni Jehova. Ginsilingan niya sia nga puede sila makatuon paagi sa cellphone kag puede makaupod ang bilog nga pamilya sang lalaki. Nagpasugot ang lalaki. Bangod makahambal sia kag makabasa sa Spanish, ginhatagan sia ni Marta sang kopya sang Bag-ong Kalibutan nga Badbad sang Balaan nga Kasulatan sa Spanish. Ginhatagan man niya sia sang libro nga Ano Gid ang Ginatudlo sang Biblia? sa Kekchi kay amo ina ang ila gamiton sa pagtuon. Pagkadason nga semana, ang lalaki kag ang iya asawa kag duha ka bata nagsugod sa pagtuon sa Biblia upod kay Marta paagi sa cellphone. Duha ka beses kada semana sila nga nagatuon. “Bangod indi ako sagad mag-Kekchi,” siling ni Marta, “Spanish ang amon ginagamit sa pagtuon, kag gina-translate ini sang lalaki para maintiendihan sang iya asawa kay ang ila mga bata makaintiende man sang Spanish.”

 Ining lalaki pastor sa iya simbahan. Gani gintudlo man niya sa iya mga miembro ang iya natun-an sa Biblia. Nanamian sa sini ang iya mga miembro gani namangkot sila kon diin niya natun-an ang iya bag-o nga mga ginatudlo. Sang ginsugiran niya sila parte sa iya pagtuon sa Biblia, isaisa sila nga nag-upod sa iya pagtuon. Wala magdugay, mga 15 na ka tawo ang nagatipon kada semana para magtuon paagi sa cellphone upod kay Marta. Sang ulihi, gintuparan nila sang mikropono ang cellphone para mabatian ini sang tanan.

 Sang ginsugiran ni Marta ang mga gulang sa ila kongregasyon parte sini, isa sa mga gulang ang nagkadto sa baryo sang mga nagatuon sang Biblia. Gin-agda niya sila sa pamulongpulong publiko sang manugtatap sang sirkito a sa isa ka baryo. Pero malayo ini nga baryo kay kinahanglan sila magsakay sing isa ka oras kag maglakat pa gid sing duha ka oras. Nagsugot ang mga ginatun-an sang Biblia nga magkadto kag 17 sa ila ang nagtambong.

 Pagligad sang pila ka semana, ang manugtatap sang sirkito kag ang pila ka Saksi nagtener sing apat ka adlaw sa baryo sang mga ginatun-an sang Biblia. Kada aga, nagatan-aw sila sang base sa Biblia nga mga video sa Kekchi sa jw.org, kag nagatuon sa brosyur nga Sin-o ang Nagahimo sang Kabubut-on ni Jehova Subong? Kada hapon, nagatan-aw sila sang mga video sa JW Broadcasting. Nag-asayn man ang manugtatap sang sirkito sang mga manugbantala para isaisa nga matudluan ang mga nagatuon sang Biblia.

 Sa sulod sining apat ka adlaw, nagbantala man ang mga Saksi sa kaingod nga mga baryo nga Kekchi man ang lenguahe kag gin-agda nila ang mga tawo sa isa ka pinasahi nga miting. Sa miting, ginpamangkot sang mga brother ang 47 nga nagtambong kon gusto nila may magtudlo sa kada isa sa ila sang Biblia. Onse ka pamilya ang nagpasugot nga magtuon.

 Pagligad sang pila ka bulan, nagdesisyon ang mga gulang nga maghiwat sang miting kada semana sa una nga baryo. Subong, mga 40 na ang regular nga nagatambong sa mga miting. Kag sang ginhiwat sang mga brother ang Memoryal sang kamatayon ni Jesus didto, nalipay gid sila kay 91 ang nagtambong.

 Kon dumdumon ni Marta kon paano nagsugod ini nga eksperiensia kag kon paano ini nag-uswag, nagsiling sia: “Nagapasalamat gid ako kay Jehova. Kon kaisa, pamatyag ko gamay lang ang mahimo ko. Pero magamit kita sang Dios para buligan ang iban. Kabalo sia kon ano ang ara sa tagipusuon sang mga tawo didto sa mga baryo, kag ginbuyok niya sila sa iya katawhan. Palangga gid sila ni Jehova.”