Ngaa Ginabag-o sang mga Saksi ni Jehova ang Iban Nila nga Pagpati?
Pirme gid namon ginagamit ang Biblia bilang basihan sang amon mga pagpati, gani sa padayon nga pag-athag sang amon pag-intiende sa Kasulatan, ginabag-o man namon ang amon pagpati. a
Ini nga mga pagbag-o base sa prinsipio sang Biblia nga mabasa sa Hulubaton 4:18: “Ang banas sang matarong kaangay sang kapawa sang aga nga nagaamat-amat sanag tubtob nga mag-udto.” Samtang nagasilak ang adlaw, ang katahom sang palibot amat-amat man nga nagaathag. Pareho sa sini, amat-amat man nga ginapaintiende sa aton sang Dios ang kamatuoran sa insakto nga tion. (1 Pedro 1:10-12) Siling sang Biblia, mas ginpadasig niya ini sa “tion sang katapusan.”—Daniel 12:4.
Indi kita dapat makibot ukon mabalaka sa mga pagbag-o sa aton pag-intiende. Ang mga sumilimba sang Dios sadto nagsala man sa ila mga ideya kag mga ginapaabot kag ginbag-o man nila ang ila pagpati.
Si Moises nagboluntaryo nga luwason ang pungsod sang Israel 40 ka tuig antes pa sang tion nga gintalana sang Dios.—Binuhatan 7:23-25, 30, 35.
Wala maintiendihan sang mga apostoles ang tagna parte sa kamatayon kag pagkabanhaw sang Mesias.—Isaias 53:8-12; Mateo 16:21-23.
Sala ang pagpati sang pila ka Cristiano sang una parte sa tion sang “adlaw ni Jehova.”—2 Tesalonica 2:1, 2.
Sang ulihi, gintadlong sang Dios ang ila sala nga pag-intiende, kag nagapangamuyo kita nga amo man sini ang himuon niya sa aton.—Santiago 1:5.
a Wala namon ginatago ang mga pagbag-o sa amon pag-intiende sa Biblia. Ginarekord kag ginabalhag pa gani namon ini. Halimbawa, i-type ang “Beliefs Clarified” sa search box sang Watchtower ONLINE LIBRARY.