Ang mga Saksi ni Jehova nagapabilin nga neutral bangod sa relihiosong mga rason, nga nabase sa Biblia. Wala kami nagasakdag, nagaboto sang pulitikal nga partido ukon kandidato, nagapadalagan para sa isa ka posisyon sa gobierno, ukon nagaentra sa mga hublag-protesta para bayluhan ang gobierno. Nagapati kami nga ang Biblia may mabakod nga mga rason kon ngaa dapat sundon ini nga dalanon.

•   Ginasunod namon ang halimbawa ni Jesus, nga wala magbaton sang posisyon sa pulitika. (Juan 6:​15) Gintudluan niya ang iya mga disipulo nga mangin “indi bahin sang kalibutan” kag gin-athag nga indi gid sila dapat magdampig sa bisan ano nga isyu sa pulitika.​—Juan 17:14, 16; 18:36; Marcos 12:13-​17.

•   Mainunungon kami sa Ginharian sang Dios, nga ginsambit ni Jesus sang sia magsiling: “Ining maayong balita sang ginharian ibantala sa bug-os napuy-an nga duta.” (Mateo 24:14) Subong tiglawas sang Ginharian sang Dios, nga ginsugo para ipahayag ang pagkari sini, nagapabilin kami nga neutral sa pulitika sang tanan nga pungsod, bisan sa pungsod nga amon ginaistaran.​—2 Corinto 5:​20; Efeso 6:​20.

•   Bangod neutral kami, hilway kami nga makaistorya sa tanan nga partido sa pulitika parte sa maayong balita sang Ginharian sang Dios. Nagapanikasog kami nga ipakita sa amon hambal kag buhat nga nagasalig kami sa Ginharian sang Dios agod solbaron ang problema sang kalibutan.​—Salmo 56:11.

•   Wala kami sing ginadinampigan sa pulitika, gani nahiusa kami subong internasyonal nga mag-ulutod. (Colosas 3:​14; 1 Pedro 2:​17) Indi kami pareho sa iban nga relihion nga nagaentra sa pulitika, gani nabahinbahin ang ila mga miembro.​—1 Corinto 1:​10.

 Pagtahod sa gobierno. Bisan wala kami nagaentra sa pulitika, ginatahod namon ang awtoridad sang gobierno sa amon lugar. Nahisanto ini sa sugo sang Biblia: “Ang tagsa ka kalag magpasakop sa superyor nga mga awtoridad.” (Roma 13:1) Nagatuman kami sa kasuguan, nagabayad sang buhis, kag nagapasakop sa mga panikasog sang gobierno para sa kaayuhan sang mga pumuluyo. Imbes nga magbuylog sa pagpukan sa gobierno, ginasunod namon ang laygay sang Biblia nga mangamuyo “para sa mga hari kag sa tanan nga may mataas nga palangakuan,” ilabi na gid kon nagahimo sila sang mga desisyon nga makaapektar sa kahilwayan sang pagsimba.​—1 Timoteo 2:​1, 2.

 Ginatahod man namon ang kinamatarong sang iban sa paghimo sang desisyon parte sa pulitika. Halimbawa, wala kami nagapasilabot sa eleksion ukon nagapugong sa mga luyag magboto.

 Ang amon bala neutralidad isa ka moderno nga pagpati? Indi. Pareho man sini ang panindugan sang mga apostoles kag sang unang siglo nga mga Cristiano. Ang libro nga Beyond Good Intentions nagsiling: “Bisan pa nagapati sila nga may obligasyon sila nga tahuron ang gobierno, ang mga Cristiano sang una wala nag-entra sa mga hilikuton sang pulitika.” Ang libro nga On the Road to Civilization nagsiling man nga ang mga Cristiano sadto “wala nagauyat sing katungdanan sa pulitika.”

 Ang amon bala neutralidad sa pulitika makatalagam sa seguridad sang pungsod? Indi. Mahidaiton kami nga mga pumuluyo gani wala sing dapat kahadlukan sa amon ang gobierno. Talupangda ang 2001 nga report sang National Academy of Ukraine. Nagakomento sa amon neutralidad, ang report nagsiling: “Sa karon, ang iban wala nanamian sa panindugan sang mga Saksi ni Jehova; isa ini sa mga rason sa pag-akusar sa ila sang totalitaryan nga Nazi kag Komunista nga mga rehimen sang una.” Pero, bisan pa ginhingabot sang Sobyet, ang mga Saksi “nagpabilin nga matinumanon sa kasuguan. Bunayag sila kag nagabuligay nga nagaobra sa mga uma nga ginadumalahan sang gobierno kag sa industriyal nga mga planta kag wala naghatag sang bisan ano nga katalagman sa Komunista nga rehimen.” Ang report naghinakop nga bisan subong, ang pagpati kag mga buhat sang mga Saksi ni Jehova wala gid “nagapahuyang sang seguridad kag integridad sang mga pungsod.”