“Samtang nagadaku ako, ang isa sa pinakamabudlay nga ginapakigbatuan ko amo nga naluyag ako sa pareho ko nga mga lalaki. Abi ko madula man lang ini, pero asta subong ara gihapon ini nga balatyagon.”​—David, 23.

 Si David isa ka Cristiano kag gusto niya mapahalipay ang Dios. Mahimo bala niya ini bisan pa naluyag sia sa pareho niya nga lalaki? Ano ang pagtan-aw sang Dios parte sa homoseksuwalidad?

•  Ano ang ginasiling sang Biblia?

•  Ginapakita bala sini . . . ?

•  Ano abi kon . . . ?

 Sarisari ang pagtan-aw sang mga tawo sa homoseksuwalidad kag nagadepende ini sa kultura kag tion. Pero ang mga Cristiano wala nagapaimpluwensia sa opinyon sang kalabanan kag wala man sila “ginapalidpalid sang tagsa ka hangin sang panudlo.” (Efeso 4:​14) Kundi ginabase nila ang ila pagtan-aw sa homoseksuwalidad (kag sa bisan ano nga klase sang paggawi may kaangtanan sa sini) sa mga talaksan nga mabasa sa Biblia.

 Maathag ang talaksan sang Biblia parte sa homoseksuwal nga mga buhat. Ang Pulong sang Dios nagasiling:

•  “Indi ka maghulid sa isa ka lalaki pareho sang paghulid mo sa isa ka babayi.”​—Levitico 18:22.

•  “Ginpabay-an sila sang Dios bangod luyag nila himuon ang ila handum. . . . Ginpabay-an sila sang Dios nga himuon ang indi mapunggan nga kailigbon sa sekso, kay ginbaylo sang ila mga babayi ang kinaugali nga paggamit sang ila kaugalingon sa isa nga supak sa kinaugali.”​—Roma 1:​24, 26.

•  “Indi kamo magtalang. Ang mga nagahimo sang seksuwal nga imoralidad, mga nagasimba sa mga diosdios, mga makihilahion, mga lalaki nga nagapasugot sa homoseksuwal nga mga buhat, mga lalaki nga nagahimo sang homoseksuwalidad, mga kawatan, mga makagod, mga palahubog, mga nagatamay sa iban, kag mga manugkilkil indi makapanubli sang Ginharian sang Dios.”​—1 Corinto 6:​9, 10.

 Ang matuod, ang talaksan sang Dios ginapatuman sa tanan nga tawo, homoseksuwal man sila ukon indi. Ang importante, dapat tinguhaan sang tanan nga punggan ang ila mga handum sa paghimo sang butang nga makapasubo sa Dios.​—Colosas 3:5.

 Ginapakita bala sini nga ginapalig-on sang Biblia nga dumtan ang mga homoseksuwal?

 Wala. Ang matuod, ang Biblia wala gid nagapalig-on nga magdumot kita sa kay bisan sin-o nga tawo​—homoseksuwal man ukon indi. Kundi, nagasiling ini nga ‘tinguhaan naton ang pagpakighidait sa tanan nga tawo,’ ano man ang ila pagkabuhi. (Hebreo 12:14) Gani sala nga daugdaugon, halitan, ukon maltratahon ang mga homoseksuwal.

 Ginapakita bala sini nga dapat pamatukan sang mga Cristiano ang mga kasuguan nga nagapasugot sang pagkasal sa pareho nga lalaki ukon pareho nga babayi?

 Ginapakita sang Biblia nga ang talaksan sang Dios sa pag-asawahay amo ang paghiusa sang isa ka lalaki kag isa ka babayi. (Mateo 19:​4-6) Pero ang ginhimo nga kasuguan parte sa pagkasal sa pareho nga lalaki ukon pareho nga babayi ginadebatihan sang mga tawo bangod sa pulitika indi bangod sa moralidad. Nagsiling ang Biblia nga ang mga Cristiano indi dapat mag-entra sa pulitika. (Juan 18:36) Gani wala nila ginapalig-on kag wala man nila ginapamatukan ang mga kasuguan sang gobierno parte sa pagkasal sa pareho nga lalaki ukon pareho nga babayi ukon ang homoseksuwal nga paggawi.

 Pero ano abi kon ang isa homoseksuwal asta subong? Puede pa bala sia magbag-o?

 Huo. May pila gani sang unang siglo nga nagbag-o man! Pagkatapos magsiling nga ang mga nagahimo sang homoseksuwalidad indi makapanubli sang Ginharian, ang Biblia nagsiling: “Amo sina anay ang iban sa inyo.”​—1 Corinto 6:​11.

 Buot bala silingon sini nga ang mga nag-untat sa paghimo sing homoseksuwalidad wala na gid sing handum nga balikan ang ila ginahimo sang una? Indi. Ang Biblia nagsiling: “Isuksok ninyo ang bag-o nga personalidad, nga paagi sa sibu nga ihibalo ginabag-o.” (Colosas 3:​10) Ang pagbag-o dapat padayon nga himuon.

 Pero ano abi kon ang isa nga gusto gid magsunod sa talaksan sang Dios may homoseksuwal nga mga handum gihapon?

 Ano man ang handum sang isa, puede niya ini batuan ukon pasugtan. Paano? Ang Biblia nagsiling: “Magpadayon kamo sa paglakat suno sa espiritu kag indi gid kamo makahimo sang undanon nga handum.”​—Galacia 5:​16.

 Talupangda nga ang bersikulo wala nagsiling nga ang isa wala na gid sang undanon nga handum. Kundi, kon pirme sia nagatuon sang Biblia kag nagapangamuyo, makatigayon sia sing kusog para mapunggan ining mga handum.

 Amo gid sini ang ginbatyag ni David, nga ginsambit sa umpisa​—ilabi na sang ginsugid niya sa iya Cristianong mga ginikanan ang iya ginapakigbatuan. “Daw nahaw-asan ako,” siling niya, “siguro mas na-enjoy ko ang akon pagkatin-edyer sadto kon ginsugid ko ini sa ila dayon.”

 Mas malipayon gid kita kon ginasunod naton ang mga talaksan ni Jehova. Nagapati gid kita nga ining mga talaksan “matarong, nga nagapasadya sa tagipusuon,” kag “daku ang padya kon tumanon ini.”​—Salmo 19:​8, 11.