ZAJ KAWM 18
Cov Tseem Khixatias Yog Cov Twg?
Muaj coob leej ntau tus lees tias lawv yog cov uas raws Yexus qab. Txawm li ntawd los lawv tsis ntseeg thiab tsis coj zoo tib yam. Yog li yuav ua li cas peb thiaj paub tias cov tseem Khixatias yog cov twg?
1. Ib tug Khixatias zoo li cas?
Cov Khixatias yog Yexus Khetos cov thwj tim los sis yog cov uas raws nws qab. (Nyeem Tes Haujlwm 11:26.) Lawv yuav ua li cas qhia tias lawv yog Yexus cov thwj tim? Yexus hais tias: “Yog nej ua raws li tej lus uas kuv qhia, nej thiaj yog kuv cov thwjtim tiag.” (Yauhas 8:31) Qhov no txhais tias cov tseem Khixatias yuav tau ua raws li Yexus tej lus qhia. Yexus yeej ib txwm qhia raws li tej uas nyob hauv phau Vajlugkub. Cov uas raws nws qab los kuj qhia tib yam li ntawd thiab.—Nyeem Luka 24:27.
2. Cov tseem Khixatias yuav ua li cas qhia tias lawv ib leeg hlub ib leeg tiag?
Yexus hais rau cov uas raws nws qab tias: “Nej ib leeg yuav tsum hlub ib leeg, ib yam li kuv hlub nej.” (Yauhas 15:12) Yexus tau ua li cas los qhia tias nws hlub nws cov thwj tim? Nws siv sij hawm nrog lawv ua ke, txhawb lawv lub zog, thiab pab lawv. Nws tseem muab nws txoj sia los txhiv lawv thiab. (1 Yauhas 3:16) Tib yam li ntawd, cov tseem Khixatias tsis yog qhia txog kev hlub xwb tiam sis lawv cov lus thiab lawv tes hauj lwm yuav tsum qhia tias lawv ib leeg yeej hlub ib leeg tiag.
3. Cov tseem Khixatias rau siab ntso ua tes hauj lwm twg?
Yexus tu hauj lwm rau nws cov thwj tim ua. ‘Nws txib lawv mus qhia zaj uas hais txog Vajtswv lub [Nceeg Vaj].’ (Luka 9:2). Cov Khixatias txheej thaum ub tsis yog tshaj tawm rau hauv tej chaw pe hawm Vajtswv xwb tiam sis lawv kuj mus tshaj tawm rau tom tej tshav puam thiab rau ntawm tib neeg tej vaj tse. (Nyeem Tes Haujlwm 5:42; 17:17.) Cov tseem Khixatias niaj hnub no los kuj mus tshaj tawm qhov tseeb hauv phau Vajlugkub rau txhua qhov chawv thiab. Lawv hlub tej neeg zej zog, lawv thiaj zoo siab hlo siv lawv lub sij hawm thiab lub dag lub zog mus qhia txog txoj kev cia siab hauv phau Vajlugkub.—Malakaus 12:31.
KAWM NTXIV
Tham seb cov tseem Khixatias ho txawv cov uas tsis coj raws li Yexus thiab nws tej lus qhia li cas.
4. Lawv tshawb nrhiav qhov tseeb hauv phau Vajlugkub
Cov Khixatias thaum ub saib Vajtswv Txoj Lus rau nqi.
Tsis yog txhua tus uas lees tias yog Khixatias yuav saib qhov tseeb hauv phau Vajlugkub rau nqi. Saib zaj YEEB YAJ KIAB, thiab tham txog lo lus no.
-
Ib txhia uas lees tias yog Khixatias tau ua li cas los txwv kom tib neeg tsis txhob paub txog tej uas Yexus qhia?
Yexus qhia txog qhov tseeb hauv phau Vajlugkub. Nyeem Yauhas 18:37, thiab tham txog lo lus no:
-
Raws li Yexus hais, ua li cas peb thiaj paub tias cov Khixatias twg yog cov uas “nyiam qhov tseeb”?
5. Lawv tshaj tawm txog qhov tseeb hauv phau Vajlugkub
Cov Khixatias thaum ub mus tshaj tawm rau lwm tus.
Ua ntej Yexus mus saum ntuj ceeb tsheej, nws tau muab ib teg hauj lwm rau nws cov thwj tim ua los txog niaj hnub nim no. Nyeem Mathais 28:19, 20 thiab Tes Haujlwm 1:8, thiab tham txog lo lus no:
-
Lawv yuav tshaj tawm mus deb npaum li cas?
6. Lawv ua raws li tej lawv tshaj tawm
Muaj dab tsi ua rau tus txiv neej hu ua Thoj (Tom) pom tias nws nrhiav tau cov tseem Khixatias lawm tiag? Saib zaj YEEB YAJ KIAB, thiab tham txog ob lo lus no.
-
Nyob rau hauv zaj yeeb yaj kiab, vim li cas Thoj thiaj tag kev cia siab rau kev ntseeg lawm?
-
Vim li cas Thoj thiaj ntseeg tias nws nrhiav tau qhov tseeb lawm?
Nqes tes ua kiag tseem ceeb dua lo lus qhuav xwb. Nyeem Mathais 7:21, thiab tham txog lo lus no:
-
Qhov twg tseem ceeb dua rau Yexus, qhov uas peb lub ncauj lees tias peb ntseeg los yog qhov uas peb nqes tes ua kiag?
7. Lawv ib leeg hlub ib leeg
Cov Khixatias thaum ub ib leeg hlub ib leeg.
Cov Khixatias puas tau yeem muab lawv txoj sia this cov ntseeg tiag? Saib zaj YEEB YAJ KIAB, thiab tham txog ob lo lus no.
-
Nyob hauv zaj yeeb yaj kiab, ua li cas kwv tij Luad (Lloyd) ho yeem muab nws txoj sia los this kwv tij Yauhaxees (Johansson)?
-
Koj puas xav tias nws coj tau li ib tug tseem Khixatias tiag?
Nyeem Yauhas 13:34, 35, thiab tham txog ob lo lus no:
-
Yexus cov thwj tim saib lwm hom neeg thiab lwm haiv neeg zoo li cas xwb?
-
Lub caij uas muaj tsov rog ne, lawv ho ua tau li ntawd li cas thiab?
IB TXHIA HAIS TIAS: “Txawm mus txoj kev ntseeg twg los sawv daws yeej pe hawm tib tug Vajtswv xwb.”
-
Koj yuav nyeem nqe Vajlugkub twg los qhia tias cov tseem Khixatias yog cov twg tiag?
KOJ KAWM TAU DAB TSI
Cov tseem Khixatias ua raws li phau Vajlugkub tej lus qhia, ib leeg hlub ib leeg, thiab tshaj tawm txog qhov tseeb hauv phau Vajlugkub.
Rov Tham Dua
-
Cov tseem Khixatias ntseeg ntseeg li cas?
-
Cov tseem Khixatias muaj tej yeeb yam twg?
-
Cov tseem Khixatias ua tes hauj lwm twg?
TSHAWB NTXIV
Kawm ntxiv txog ib pawg uas coj raws li Yexus thiab nws tej lus qhia.
Kawm seb ua cas ib tug leej phauj thiaj nrhiav tau tsev neeg uas muaj txoj kev ntseeg tseeb.
“Lawv Siv Phau Vajlugkub Los Teb Txhua Lo Lus Nug!” (Phau Tsom Faj lub 4 Hlis tim 1 xyoo 2014)
Kawm seb cov tseem Khixatias ib leeg pab ib leeg li cas thaum muaj xwm txheej.
Pab Peb Cov Kwv Tij Thaum Lawv Raug Xwm Txheej Phem—Saib Ib Vuag (3:57)
Ua tib zoo tshuaj seb cov Khixatias thaum ub thiab cov tseem Khixatias niaj hnub no ho zoo sib xws li cas es thiaj qhia tias lawv yog Yexus cov thwj tim tiag.
“Cov Tseem Khixatias Coj Li Cas?” (Phau Tsom Faj lub 3 Hlis tim 1 xyoo 2012)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
