Qhov Tseeb Txog Lub Neej Yav Tom Ntej
Koj puas tau xav txog koj lub neej yav tom hauv ntej? Phau Vajlugkub qhia txog tej yam tseem ceeb uas yuav los tsis ntev tom ntej no. Tej ntawd yuav los raug txhua tus hauv ntiajteb.
Yexus qhia tias peb yuav paub thaum twg “Vajtswv lub Tebchaws [Nceeg Vaj] twb los ze lawm.” (Lukas 21:31) Nws hais lus faj lem tseg tias yuav muaj tsov rog, av qeeg, kev tshaib nqhis, thiab kev mob kev nkeeg. (Lukas 21:10-17) Niaj hnub no, peb yeej pom tias twb muaj raws li Yexus hais tseg lawm.
Phau Vajlugkub qhia hauv 2 Timautes 3:1-5 tias nyob rau lub sijhawm kawg uas tej nom tswv tseem kav hauv ntiajteb, tibneeg yuav ua neeg tsis paub cai. Thaum tibneeg muaj tus cwjpwm tsis zoo thiab ua tsis zoo rau lwm tus ces peb yuav pom tias twb muaj raws li zaj lus faj lem no lawm.
Tej no qhia peb li cas? Tej no qhia tias twb ze lub sijhawm Vajtswv lub Nceeg Vaj yuav los kho kom tibneeg tau ib lub neej zoo hauv lub ntiajteb no. (Lukas 21:36) Nyob hauv phau Vajlugkub, Vajtswv cog lus tseg tias yuav muaj tej yam zoo rau lub ntiajteb thiab rau tibneeg. Cia peb tham txog 5 yam ntawd.
TXOJKEV KAV YUAV ZOO
“Luag pub nws muaj meejmom, muaj koob meej thiab muaj hwjchim tswj teb kav chaw kom txhua tus ntawm txhua haivneeg thiab txhua xeem, tsis hais cov neeg uas hais yam lus twg, thiaj yuav tau ua nws qhev. Nws yuav muaj hwjchim mus ibtxhis thiab nws yuav kav mus tsis paub kawg.”—DANIYEES 7:14.
Nqe no qhia tias: Koj yuav tau ib lub neej zoo heev vim lub tseem fwv uas Vajtswv tsa nws tus Tub kav thoob ntiajteb yog lub zoo tshaj plaws.
YUAV TSIS MUAJ MOB LAWM
“Tsis muaj leejtwg nroo hais tias, ‘Kuv muaj mob.’”—YAXAYAS 33:24.
Nqe no qhia tias: Koj yuav tsis muaj mob thiab koj lub cev yuav muaj zog. Koj yuav ua neej nyob, yuav tsis txawj tuag li lawm.
YUAV NYOB TSO SIAB PLHUAV
“Nws ua rau tej kev tsov kev rog hauv ntiajteb no tiaj tus.”—PHAU NTAWV NKAUJ 46:9.
Nqe no qhia tias: Koj yuav tsis ntshai tias yuav muaj tsov rog thiab kev txomnyem lawm.
YUAV MUAJ NEEG ZOO NYOB THOOB PLAWS NTIAJTEB
“Cov neeg siab phem nyob ib ntu xwb lawv yuav puastsuaj mus . . . cov neeg txo hwjchim yuav muaj teb muaj chaw.”—PHAU NTAWV NKAUJ 37:10, 11.
Nqe no qhia tias: Yuav tsis muaj neeg siab phem lawm. Tsuas muaj cov neeg uas xav mloog Vajtswv lus lawm xwb.
LUB NTIAJTEB YUAV UA IB LUB VAJ KAJ SIAB
“Cov neeg ua tsev yuav tau nyob hauv tej tsev ntawd, tsis yog lwm tus yuav tau nyob. Lawv yuav cog txiv hmab thiab yuav tau haus tej cawv txiv hmab ntawd.”—YAXAYAS 65:21, 22.
Nqe no qhia tias: Lub ntiajteb yuav zoo nkauj heev. Vajtswv yuav teb peb tej lus thov kom muaj raws li nws lub siab nyiam “hauv ntiajteb.”—Mathais 6:10, TT
Tej Yam No Yuav Pab Tau Koj Thiab
LUS NUG THIAB LUS TEB TXOG PHAU VAJLUGKUB
Vajtswv Lub Nceeg Vaj Yuav Ua Dabtsi?
Kawm seb thaum Vajtswv lub Nceeg Vaj kav lub ntiajteb yuav muaj kev vam kev cia siab twg.
