Ib txhia tibneeg tsis yog xaiv ntsej xaiv muag rau lwm haiv neeg lossis lwm yam lus xwb. Tiamsis lawv kuj xaiv ntsej xaiv muag txawm yuav yog pojniam txivneej, yuav laus yuav hluas, yuav muaj los pluag, zoo nkauj zoo nraug, ruam lossis ntse, thiab ntseeg li cas los xij. Lawv xav hais tias lawv yeej tsis xaiv ntsej muag li.

Ua li, koj puas yog ib tug neeg xaiv ntsej xaiv muag? Peb coob leej yeej xam pom luag lwm tus xaiv ntsej xaiv muag tiamsis peb tsis pom peb tus kheej. Txhua leej txhua tus yeej xaiv ntsej muag tsis seem ib tug li. Ib tug uas tshawb fawb txog tibneeg tej kev coj noj coj ua, hu ua Davi Viyees (David Williams) hais tias: “Thaum ib tug neeg twg pom ib pab neeg twg uas lawv tsis nyiam, ces nws twb txiav txim rau lawv lawm.”

Nyob rau sab Yus Luv, muaj ib tug txivneej hu ua Yauvikas (Jovica) nyob koom zej koom zos nrog lwm haiv neeg. Nws hais tias: “Kuv xav hais tias cov tibneeg no mas tsis muaj ib tug yuav zoo li rau qhov kuv ntseeg tias lawv yeej ib txwm coj tsis zoo. Tiamsis kuv tsis ras txog tias kuv yog ib tug neeg xaiv ntsej xaiv muag.”

Tej nom tej tswv yeej tsim tsa kom muaj kevcai los mus tiv thaiv txojkev xaiv ntsej xaiv muag. Txawm li ntawd los, kev xaiv ntsej xaiv muag tseem muaj quj qees vim tej kevcai no tsuas qhia tau tibneeg tiamsis nws tswj tsis tau tibneeg lub siab. Kev xaiv ntsej xaiv muag pib ntawm lub siab thiab txojkev xav tuaj. Ua li, peb puas yuav kho tau txojkev xaiv ntsej xaiv muag? Puas muaj tshuaj los kho tau tus kab mob xaiv ntsej xaiv muag?