Phau Vajlugkub hais tias Vajtswv xav kom peb “tsis txhob ua kev nkauj kev nraug.” (1 Thexalaunikes 4:3) Hauv phau Vajlugkub lo lus “ua kev nkauj kev nraug” kuj yog hais txog kev deev luag poj luag txiv, txiv neej deev txiv neej, poj niam deev poj niam, thiab sib daj sib deev ua ntej sib yuav.

•  Ua cas txoj kev sib yuav muaj nqes rau Vajtswv?

•  Nyob ua ke ua ntej sib yuav puas txhaum?

•  Yuav ua li cas txoj kev txij nkawm thiaj nyob ruaj khov?

•   Vajtswv yog tus tsim txoj kev sib yuav. Vajtswv muab thawj khub niam txiv txis ua txij ua nkawm. (Chivkeeb 2:22-24) Vajtswv tsis yog tsim kom nkawv los nyob ua ke es tsis sib yuav.

•   Vajtswv paub tias dab tsi zoo tshaj plaws rau peb. Vajtswv tsim kom ib tug txiv neej yuav ib tug poj niam thiab kom nkawv ib leeg npuab siab rau ib leeg mus li. Yog nkawv ua li no, nkawv thiab nkawv tej me nyuam yuav nyob kaj siab lug. Muab xav li no, yog peb yuav ib lub rooj, yuav kom peb txawj dhos lub rooj peb yuav tsum ua raws li tus uas tsim lub rooj ntawd qhia. Ib yam li ntawd, yuav kom tsev neeg nyob kaj siab lug peb yuav tsum coj raws li Vajtswv txoj lus. Rau qhov Vajtswv txoj lus yeej pab tau peb lub neej.​—Yaxayas 48:17, 18.

•   Kev pw ua ke ua ntej sib yuav tsim tau teeb meem. Tej yam teeb meem ntawd, yog muaj me nyuam tsaub, kis kab mob, thiab lwj siab lwj ntsws.

•   Vajtswv tsim txoj kev pw ua ke kom muaj tub muaj ki. Vajtswv saib txoj sia muaj nqis heev thiab kev muaj tub muaj ki yog ib qho koom pub rau tib neeg. Vajtswv xav kom peb saib txoj kev ua txij ua nkawm muaj nqis thiaj qhia tias peb saib taus txoj kev sib yuav.​—Henplais 13:4.

 Lub neej sim nyob ua ntej sib yuav yeej tsis ruaj ntseg, rau qhov thaum muaj teeb meem ib leeg yuav tso ib leeg yooj yim heev. Yuav kom lub neej sib yuav tawg paj txi txiv, nkawv yuav tsum ua raws li nkawv tej lus cog tseg thiab sib pab daws thaum muaj teeb meem. a Kev sib yuav haj yam ua rau neb tej lus cog tseg ruaj khov.​—Mathais 19:6.

 Yeej tsis muaj ib khub niam txiv twg uas zoo tiav log. Txawm li ntawd los, ob niam txiv yeej muaj taus kev zoo siab yog nkawv coj raws li phau Vajlugkub tej hauv paus ntsiab lus. Xyaum ua raws li cov lus qhia no:

•   Xam pom koj tus txij nkawm.​—1 Kauleethaus 7:3-5; Filipis 2:3, 4.

•   Sib hlub thiab ib leeg saib taus ib leeg.​—Efexus 5:25, 33.

•   Paub tswj koj tus nplaig.​—Pajlug 12:18.

•   Ua siab ntev thiab paub zam txim.​—Kaulauxais 3:13, 14.