Ua Cas Yehauvas Cov Timkhawv Tsis Koom Tibneeg Tej Kev Lig Kevcai?
Yehauvas Cov Timkhawv yuav ua li cas paub tias tej kevcai twg zoo los tsis zoo koom nrog?
Ua ntej Yehauvas Cov Timkhawv koom nrog ib txoj kevcai twg, lawv yuav tau tshawb nrhiav seb phau Vajlugkub qhia li cas. Yog tias txoj kevcai ntawd tsis hla Vajtswv Txojlus ces lawv yuav tau txiav txim siab seb lawv puas yuav koom los tsis koom. Tiamsis yog hla Vajtswv Txojlus lawm ces lawv thiaj tsis mus koom nrog. Lawv coj li no twb yog lawv “muab siab rau ua kom haum Vajtswv siab thiab haum neeg siab.”—Tes Haujlwm 24:16.
Nram no yog cov lus nug uas Yehauvas Cov Timkhawv yuav nug lawv tus kheej ua ntej txiav txim siab koom ib txoj kevcai twg. a
Tej kev lig kevcai ntawd puas yog ncau los ntawm tej lus qhia cuav?
Vajlugkub tej hauv paus ntsiab lus: “Cia li tso plhuav lawv cov ntawd tseg mus nyob rau ibcag, thiab nej tsis txhob kov tej uas qias kuv thiaj yuav yuav nej.”—2 Kauleethaus 6:15-17.
Yehauvas Cov Timkhawv thiaj tsis koom nrog tej lus qhia cuav uas tsis mus raws li phau Vajlugkub.
Kev lig kevcai uas los ntawm kev ntseeg cuav lossis kev pe hawm tej vajtswv cuav. Yexus hais tias: “Nej yuav tsum pehawm [Yehauvas] uas yog nej tus Vajtswv tib leeg thiab ua nws tes haujlwm xwb.” (Mathais 4:10) Yehauvas Cov Timkhawv ua raws li cov lus nkaw no, lawv thiaj tsis koom kevcai Christmas, I-xitaw (Easter) lossis Mev Des (May Day) rau qhov kevcai no pib los ntawm kev ntseeg cuav. Tsis tas li ntawd xwb, Yehauvas Cov Timkhawv yuav tsis koom nrog tej kevcai xws li:
Kauxa (Kwanzaa). Lo lus no “los ntawm lus Xivahili uas hais tias matuda ya kauxa (matunda ya kwanza), txhais tias ‘thawj phaum qoob loo.’ Txoj kevcai no los ntawm lub koob tsheej sau qoob loo uas cov neeg Afika tau sau thawj zaug rau hauv lawv tej ntawv keeb kwm.” (Encyclopedia of Black Studies) Coob tus hais tias txoj kevcai no tsis yog ib txojkev ntseeg. Tiamsis phau ntawv uas hais txog Afika tej kev ntseeg tau hais tias lub koob tsheej Kauxa zoo li lawv ib txoj kevcai uas muab thawj phaum qoob loos fij rau “lawv tej vajtswv thiab poj koob yawm txwv ua lawv tsaug. Txoj kevcai no kuj zoo ib yam li cov neeg Afika uas nyob hauv tebchaws Amelikas tej kevcai. Lawv kuj ua koob tsheej Kauxa nco txog poj koob yawm txwv txiaj ntsig thiab ua lawv tsaug rau tej koob hmoov uas lawv foom.”—The Encyclopedia of African Religion.
Kauxa
Kevcai rau lub caij nplooj ntoo zeeg (Mid-Autumn Festival). Txoj kevcai no ua los “pe hawm tus poj vajtswv kav lub hli.” (Holidays, Festivals, and Celebrations of the World Dictionary) Thaum ua txoj kevcai no “cov pojniam yuav tawm tuaj pe hawm tus poj vajtswv. Lawv yuav txhos caug thiab pe khwb nkaus hauv pem teb, cov Suav hu tias khautau (kowtow).”—Religions of the World—A Comprehensive Encyclopedia of Beliefs and Practices.
Naulub (Nowruz). “Txoj kevcai no pib los ntawm kev ntseeg Xauloo-axastawj (Zoroastrian) uas yog ib txoj kevcai tseem ceeb tshaj rau cov Xauloo-axastawj yav thaud. . . . Lawv ua txoj kevcai no tos txais tus timtswv uas kav thaum tav su [Laphivi]. Tus timtswv uas kav lub caij ntuj no quab yuam nws mus nyob rau hauv av thaum lub caij ntuj no. Raws li cov neeg Xauloo-axastawj tej kev lig kevcai lawv yuav pib ua koob tsheej rau hnub Naulub thaum tav su.”—United Nations Educational, Scientific and Cultural Organization.
Ntsaw-e Yada (Shab-e Yalda). Lub koob tsheej no yog ua nco txog hmo tsaus ntuj ntev tshaj plaws rau lub caij ntuj no. Phau ntawv Sufism in the Secret History of Persia piav tias txoj kevcai no yog ua los “pe hawm tus timtswv Mevta (Mithre)” uas yog tus timtswv hluavtaws. Txoj kevcai no kuj zoo li Loos thiab Kili tej kev pe hawm tus timtswv kav lub hnub. b
Hnub Ua Vajtswv Tsaug (Thanksgiving). Txoj kevcai no zoo li txoj kevcai Kauxa uas los ntawm lub koob tsheej sau qoob loos yav thaud thiab ua los qhuas lawv tej timtswv. Tiamsis ntev mus ntev tuaj “cov Khixatia cia li muab txoj kevcai no los coj lawm.”—A Great and Godly Adventure—The Pilgrims and the Myth of the First Thanksgiving.
Kevcai uas ntsig txog kev saib hmoov. Phau Vajlugkub hais tias tus “teeb thaj teev tus mlom Nkas thiab tus mlom Menis uas yog cov vajtswv ntawm txoj hmoov zoo thiab hmoov phem” tus ntawd kuj “tso [Yehauvas] tseg.” (Yaxayas 65:11) Vim li no, Yehauvas Cov Timkhawv thiaj tsis koom nrog tej kevcai xws li nram no:
Evee Kunpala (Ivan Kupala). Phau ntawv The A to Z of Belarus hais tias “coob tus ntseeg tias hnub Evee Kunpala yuav muaj ib lub hwjchim tshwm. Yog tias leejtwg muaj hmoo thiab ua siab tuab nws yuav tswj tau lub hwjchim ntawd.” Thaum chiv thawj, hnub ntawd yog hnub cov ntseeg cuav ua kevcai rau hnub uas nruab hnub ntev tshaj plaws. Tiamsis phau ntawv Encyclopedia of Contemporary Russian Culture hais tias “tom qab cov uas coj txoj kevcai no hloov los ua Khixatia, lawv tau muab txoj kevcai no los txuam nrog txoj kevcai Khixatia [hnub ua kevcai nco txog Yauhas tus uas muab neeg ua kevcai raus dej].”
Tebchaws Suav thiab tebchaws Kaus Lim Noj Tsiab (Chinese New Year or Korean New Year). Ib phau ntawv uas hais txog cov Suav tej kev lig kevcai hais tias “ib xyoo twg lub caij no. Cov neeg yuav siv sijhawm los nrog lawv tsev neeg, tej phoojywg thiab tej txheeb ze nyob ua ke, ib leeg yuav foom koob hmoov rau ib leeg, muab khoom xyeem rau lawv tej timtswv thiab rau cov tuag, ua li no lawv thiaj muaj hmoo rau lub xyoo tshiab.” (Mooncakes and Hungry Ghosts—Festivals of China) Tebchaws Kaus Lim Noj Tsiab kuj zoo ib yam nkaus. Lawv yuav “pe hawm tej poj koob yawm txwv ua kevcai tshem vij sub vij sw lossis tej yam phem tawm mus kom thiaj tau koob hmoov rau lub xyoo tshiab thiab saib hmoov rau yav tom ntej.”—Encyclopedia of New Year’s Holidays Worldwide.
Tebchaws Suav Noj Tsiab
Kevcai uas ntsig txog kev ntseeg tias tibneeg muaj ib tug ntsuj plig uas tsis txawj tuag. Phau Vajlugkub qhia meej tias thaum ib tug neeg tuag lawd yeej tsis muaj ib yam dabtsi uas tseem ciaj nyob hlo li lawm. (Exekhees 18:4) Yog li ntawd, Yehauvas Cov Timkhawv thiaj tsis koom nrog tej kevcai nram no vim tsis xav muaj feem nrog tej kev ntseeg ntawd.
Hnub ua kevcai nco txog cov tuag (All Souls’ Day and Day of the Dead). Phau ntawv New Catholic Encyclopedia hais tias hnub no yog hnub “nco txog cov neeg zoo uas tau tas simneej lawm” thiab hais tias “kwv lam li xyoo 500 txog xyoo 1500 tom qab Yexus, lawv ntseeg tias hnub no cov tuag yuav ua dab, ua qav kaws, thiab ua lwm yam los pauj rau tus uas ua phem rau lawv thaum tseem muaj txojsia nyob.”
Hwm qua ntxa thiab lub caij xyeem rau tej dab tuag tshaib tuag nqhis (Qingming Festival and Hungry Ghost Festival). Ob txoj kevcai no yog ua los ris poj koob yawm txwv txiaj tsig. Phau ntawv Celebrating Life Customs Around the World—From Baby Showers to Funerals hais tias txoj kevcai hwm qua ntxa “yuav tsum tau muab tej zaub mov thiab dej coj los fij cov tuag thiaj li tsis tshaib tsis nqhis. Hlawv yaj khaum yeeb khaum rau cov tuag, lawv thiaj muaj nyiaj siv.” Phau ntawv no tseem hais ntxiv tias “lub caij xyeem rau cov dab tuag tshaib tuag nqhis, [lawv ntseeg tias] rau hmo hli nra cov tuag yuav muaj peevxwm nrog tau neeg sib txuas lus. Yog li ntawd, yuav kom cov tuag zoo siab thiab saib taus poj koob yawm txwv lawv thiaj ua txoj kevcai no.”
Ntsubxaw (Chuseok). Phau ntawv The Korean Tradition of Religion, Society, and Ethics hais tias thaum ua kevcai no yuav muab “zaub mov thiab dej cawv fij rau cov tuag.” Qhov no qhia txog “txoj kev ntseeg tias tibneeg uas tau tuag lawd tseem muaj plig nyob.”
Tej kev lig kevcai uas ntsig txog kev teev dab teev mlom. Phau Vajlugkub hais tias: “Tsis txhob ua khawvkoob thiab tsis txhob mus cuag txivneeb txivyaig. [Yehauvas] uas yog nej tus Vajtswv ntxub cov neeg uas ua tej kev phem kev qias li ntawd.” (2 Kevcai 18:10-12) Yehauvas Cov Timkhawv tsis xav muaj feem nrog tej kev teev dab teev mlom thiab kev saib caij saib nyoog. Yog li ntawd, lawv thiaj tsis ua Kevcai Halauveej (Halloween) lossis tej kevcai nram no:
Cov Xeehala thiab cov Tamis Noj Tsiab (Sinhala and Tamil New Year). Phau ntawv Encyclopedia of Sri Lanka hais tias “raws li kev lig kevcai no . . . muaj kevcai saib hnub saib hli lossis saib caij saib nyoog.”
Thaib Lub Peb Caug lossis Thaib lub koob tsheej ntov dej (Songkran). Lub npe no “los ntawm lus Xasxaki (Sanskrit) . . . uas txhais tias ‘txav’ lossis ‘hloov’. Txoj kevcai no ua koob tsheej thaum lub hnub txav mus rau lub 4 Hlis Ntuj raws li kev saib caij saib nyoog.”—Food, Feasts, and Faith—An Encyclopedia of Food Culture in World Religions.
Mauxes tej kevcai uas twb muab rhuav tom qab Yexus tuag lawm. Phau Vajlugkub hais tias: “Yexus Khetos twb los ua rau txoj kevcai ntawd tiav lawm.” (Loos 10:4) Tej kevcai uas Vajtswv pub rau Mauxes tseem pab tau cov Khixatia niaj hnub nimno. Tiamsis nimno lawv tsis ua tej kevcai ntawd lawm, xws li tej kevcai uas ntsig txog tus Mexiyas yuav los. Cov Khixatia ntseeg tias tus Mexiyas twb los lawm. Phau Vajlugkub hais tias: “Tej ntawd tsuas yog tej uas yuav muaj los yav tom ntej no tus duab xwb, tus uas tseemceeb yog Yexus Khetos.” (Kaulauxais 2:17) Twb yog vim li no thaum Yehauvas Cov Timkhawv ua tib zoo xav txog tej kevcai uas tsis raws li Vajlugkub qhia, lawv thiaj tsis xav koom nrog tej kevcai zoo li nram no:
Hanuka (Hanukkah). Txoj kevcai no ua rau thaum cov Yudais muab lub tuam tsev hauv Yeluxalees cob rau Vajtswv zaum ob. Tiamsis phau Vajlugkub hais tias Yexus ua tus Tuam Pov Thawj Hlob hauv “Lub tsev ntaub [lossis, lub tuam tsev] tseemceeb dua thiab zoo dua lub qub. Lub ntawd tsis yog neeg txhais tes ua thiab tsis yog lub uas Vajtswv tsim cia rau hauv ntiajteb no.” (Henplais 9:11) Cov Khixatia ntseeg tias Yexus lub tuam tsev ntawm sab kev ntseeg twb los hloov cov Yudais lub tuam tsev hauv Yeluxalees lawm.
Los Hachana (Rosh Hashanah). Yog thawj hnub hauv cov Yudais lub xyoo tshiab. Yav thaud lawv tua tsiaj xyeem rau Vajtswv rau lub caij no. (Teev Npe 29:1-6) Txawm li ntawd los, Yexus Khetos uas yog tus Mexiyas twb “ua kom sawvdaws tseg tsis tua tsiaj thiab tsis muab khoom fij rau Vajtswv lawm,” yog li ntawd qhov uas tua tsiaj xyeem tsis muaj qabhau rau Vajtswv li lawm.—Daniyees 9:26, 27.
Tej kevcai ntawd puas txhawb kom tej kev ntseeg sib koom ua ke?
Vajlugkub tej hauv paus ntsiab lus: “Tus uas ntseeg thiab tus uas tsis ntseeg nyias yeej nyiam nyias lawm ib yam. Yeej tsis muaj leejtwg yuav nqa mlom mus teev hauv Vajtswv lub tuamtsev.”—2 Kauleethaus 6:15-17.
Yehauvas Cov Timkhawv sib zog nrog lwm tus nyob sib haum xeeb thiab lawv ntseeg hais tias leejtwg yuav ntseeg li cas los xij. Tiamsis lawv yuav tsis kam koom nrog tej kevcai uas txhawb kom txhua txojkev ntseeg sib koom ua ke. Xws li:
Kevcai ua qhuas ib tug neeg twg lossis ib qho xwm txheej twg uas txhawb kom txhua txojkev ntseeg sib koom ua ke. Thaum Vajtswv coj haiv neeg Yixalayees lossis Yixayee mus rau lub tebchaws uas nws cog tseg. Vim muaj cov neeg coj kevcai tsis zoo li cov Yixalayees nyob rau hauv, Vajtswv thiaj sam hwm rau lawv tias: “Nej tsis txhob koom tes nrog lawv lossis teev lawv tej mlom hlo li . . . Yog nej pe lawv tej mlom, tej mlom ntawd yuav yog ib rooj ntxiab uas tais nej cajdab.” (Khiav Dim 23:32, 33) Vim li no, Yehauvas Cov Timkhawv thiaj tsis ua tej kev lig kevcai li nram no.
Law Kathoos (Loy Krathong). Kevcai no yog cov Thaib li kev lig kevcai. Ib phau ntawv uas hais txog kev ntseeg Npus Das hais tias “cov neeg muab tsawb, nplooj tsawb, lossis tej paj los ua ib lub menyuam nkoj, thiab txhos xyab rau hauv, mam li coj mus tso hauv tus dej. Lawv ntseeg tias lub menyuam nkoj no yuav coj tej kev phem tsis zoo mus. Tiamsis tseeb tiag txoj kevcai no ua los pe hawm tus timtswv Npus Das tus neev taw.”—Encyclopedia of Buddhism.
Hnub lees txim rau Vajtswv (National Repentance Day). Muaj ib tug nom tswv tau hais rau hauv Phapua Nus Nkinim (Papua New Guinean) phau ntawv The National hais tias cov uas tuaj koom txoj kevcai no yeej “lees txais Khixatia tej kevcai lawm” thiab txoj kevcai no “txhawb kom cov neeg hauv lub tebchaws coj raws li cov Khixatia.”
Vibxam (Vesak). “Hnub no yog ib hnub tseem ceeb tshaj rau cov coj kevcai hauj sam. Lawv ua kevcai no nco txog Npus Das hnub yug, hnub Npus Das paub txog tibneeg tej kev txom nyem, thiab txojkev tuag.”—Holidays, Festivals, and Celebrations of the World Dictionary.
Vibxam
Tej kev lig kevcai uas tsis mus raws li Vajlugkub qhia. Yexus hais rau cov thawj coj tias: “Qhov uas nej ua li nej tej kevcai no, yog nej ua saib tsis taus Vajtswv Txojlus.” Thiab hais tias lawv tej kev pe hawm kuj tsis muaj qabhau dabtsi li rau qhov lawv “muab neeg tej kevcai los qhia.” (Mathais 15:6, 9) Yehauvas Cov Timkhawv xav ua raws li Yexus tej lus ceeb toom no, lawv thiaj tsis koom nrog tej kev ntseeg twg ib txoj kevcai. Xws li:
Ephifani (Epiphany, Peb Tug Vajntxwv Hnub, txoj kevcai Thika lossis Los Leyaw Masko). Txoj kevcai no ua koob tsheej nco txog thaum cov txawj saib hnub qub tuaj xyuas Yexus lossis nco txog thaum Yexus ua kevcai raus dej. Phau ntawv The Christmas Encyclopedia hais tias txoj kevcai no “yog cov tsis ntseeg lub koob tsheej rau lub caij nplooj ntoo hlav ua los qhuas tus timtswv uas kav tus dej thiab hav dej, tiamsis cov Khixatia cia li muab hloov ua lawv li. Txoj kevcai Thika (Timkat) “ncau los ntawm kev lig kevcai yav thaud”.—Encyclopedia of Society and Culture in the Ancient World.
Hnub nco txog Niam Mab Liab nce mus saum ntuj. Txoj kevcai no ua nco txog Yexus niam nce mus saum ntuj. Phau ntawv Religion and Society—Encyclopedia of Fundamentalism hais tias: “Thaum xub thawj cov Khixatia tsis coj txoj kevcai no thiab tsis muaj nyob hauv phau Vajlugkub.”
Hwm Hnub Uas Xeeb Niam Mab Liab tus uas tsis muaj kev txhaum. “Phau Vajlugkub tsis qhia tias [Malis] xeeb los tsis muaj txhaum. Tiamsis tej lus qhia no lawv rhawv lawv xwb.”—New Catholic Encyclopedia.
Lub Caij Plaub Caug (Lent). Yog lub sijhawm lees txim thiab ua kevcai yoo mov. Phau ntawv New Catholic Encyclopedia piav tias txoj kevcai no pib thaum “xyoo 400,” uas yog 200 tawm xyoo tom qab sau phau Vajlugkub tiav lawm. “Cov uas tuaj ua kevcai txais tshauv rau hnub 3 [lossis Wednesday] (yog thawj hnub rau lub Caij Plaub Caug) txojkev lig kevcai no pib tom qab lub rooj sablaj Npeneveetaw (Benevento) xyoo 1091.”
Mekhee (Meskel). Txoj kevcai no yog cov Ethi-aupia ib lub koob tsheej. Phau ntawv the Encyclopedia of Society and Culture in the Medieval World piav tias txoj kevcai no ua koob tsheej txog “qhov uas nrhiav tau tus Tseem Khaub lig (tus ncej ntoo uas Yexus raug ntsia), thiab hu nkauj seev cev ncig cub hluavtaws.” Tiamsis Yehauvas Cov Timkhawv tsis siv tus ntoo khaub lig los teev tiam Vajtswv.
Txoj kevcai ntawd puas yog ua qhuas ib tug neeg twg, ib lub koom haum twg, lossis ib lub tebchaws twg?
Vajlugkub tej hauv paus ntsiab lus: “[Yehauvas] hais tias ‘Kuv yuav rau txim rau tus neeg uas khiav tawm ntawm kuv mus cia siab rau neeg lub zog, thiab cia siab rau tej neeg uas txawj tuag.’”—Yelemis 17:5.
Yehauvas Cov Timkhawv yeej ris sawvdaws txiaj ntsig thiab thov Vajtswv pab lwm tus, tiamsis lawv tsis koom nrog luag tej kevcai xws li nram no:
Kevcai qhuas tus kav lub tebchaws lossis ib tug neeg tseem ceeb. Phau Vajlugkub hais tias: “Tsis txhob tso siab rau cov neeg uas txawj tuag. Lawv muaj nqis npaum li cas?” (Yaxayas 2:22) Yog li ntawd, Yehauvas Cov Timkhawv thiaj li tsis koom nrog tej kevcai xws li vajntxwv lossis poj vajntxwv hnub yug.
Ua kevcai hawm chij. Yehauvas Cov Timkhawv tsis ua kevcai hnub hawm chij (Flag Day). Yog vim li cas? Vim phau Vajlugkub hais tias: “Tsis txhob pe dab pe mlom.” (1 Yauhas 5:21) Niaj hnub no coob tus tsis xav tias tus chij yog ib tug mlom lossis ib yam khoom pe hawm. Tiamsis tus tshawb fawb keeb kwm Khantoo Hes (Carlton Hayes) tau sau tias: “Tus chij yog lub cim rau laj mej pej xeem txojkev tso siab rau nom tswv thiab yog ib yam khoom uas tseem ceeb tshaj rau lawv.”
Ua koob tsheej rau cov dawb huv. Thaum ib tug txivneej uas muaj lub siab npuab Vajtswv pe tus timthawj Petus, phau Vajlugkub hais tias: “Petus tuav nkaus . . . tsa nws sawv thiab hais tias ‘Cia li sawv! Kuv yog neeg ib yam li koj thiab xwb.’” (Tes Haujlwm 10:25, 26) Petus thiab cov tubtxib yeej tsis kam lwm tus qhuas lossis pe hawm lawv. Ib yam li ntawd, Yehauvas Cov Timkhawv kuj tsis koom nrog tej koob tsheej uas qhuas cov dawb huv. Xws li tej koob tsheej nram no:
Ua kevcai nco txog cov Leej Ntshiab (All Saints’ Day). Phau ntawv New Catholic Encyclopedia hais tias: “Lawv ua koob tsheej qhuas cov leej ntshiab rau hnub ntawd . . . tsis muaj leejtwg paub tias pib li cas los.”
Hnub Qhuas Kuadalupe (Guadalupe). Txoj kevcai no yog ua koob tsheej qhuas “tus pojniam dawb huv hauv Mev teb”. Ib txhia ntseeg tias nws yog Malis uas yog Yexus niam. Nws los tshwm rau ib tug neeg txom nyem pom rau xyoo 1531.—The Greenwood Encyclopedia of Latino Literature.
Tebchaws Suav Noj Tsiab
Hnub Daws Npe (Name Day). Phau ntawv Celebrating Life Customs Around the World—From Baby Showers to Funerals hais tias “hnub no yog ua koob tsheej rau cov dawb huv thiab rau tus uas muaj lub npe thooj li cov dawb huv. Tej zaum lub npe no tis rau thaum ua kevcai raus dej lossis thaum los ntseeg. Hnub no yog ib txojcai ntawm kev ntseeg.”
Ua koob tsheej ntsig txog kev nom kev tswv lossis kev coj noj coj ua. Phau Vajlugkub hais tias: “Cia siab rau [Yehauvas] zoo dua qhov uas tso siab rau neeg.” (Phau Ntawv Nkauj 118:8, 9) Yehauvas Cov Timkhawv cia siab rau Vajtswv tib leeg ua tus kho noob neej tej teeb meem. Lawv thiaj tsis koom nrog Cov Tub Ntxhais Hluas Hnub (Youth Day) lossis Cov Pojniam Hnub (Women’s Day). Vim hnub no uas ntsig txog kev nom kev tswv lossis kev coj noj coj ua. Tsis tas li ntawd xwb, lawv kuj tsis koom nrog lub koob tsheej hnub Dim Cev Qhev (Emancipation Day) lossis lwm lub koob tsheej uas zoo li no. Tiamsis lawv tos Vajtswv lub tseem fwv los tu noob neej tej kev ntxub ntxaug thiab kev xaiv ntsej xaiv muag xwb.—Loos 2:11; 8:21.
Tej kevcai ntawd puas txhawb kom ib haiv neeg saib lawv tus kheej tsim txiaj dua ib haiv neeg?
Vajlugkub tej hauv paus ntsiab lus: “Vajtswv tsis xaiv leejtwg ntsejmuag. Txawm yog haivneeg twg los xij.”—Tes Haujlwm 10:34, 35.
Yehauvas Cov Timkhawv coob tus yeej nyiam lawv lub tebchaws, tiamsis lawv tsis koom nrog tej kevcai uas txhawb kom ib haiv neeg saib lawv tus kheej tsim txiaj dua ib haiv neeg. Xws li nram no:
Txoj kevcai uas txhawb tej tub rog. Yexus tsis txhawb kev tsov kev rog, nws hais rau cov thwjtim tias: “Hlub nej cov yeebncuab thiab thov Vajtswv pab rau cov uas tsimtxom nej.” (Mathais 5:44) Yog li ntawd, Yehauvas Cov Timkhawv thiaj tsis koom nrog tej koob tsheej uas qhuas tej tub rog thiab tej koob tsheej xws li nram no:
Ee-txaka (Anzac Day). “Lo lus Anzac yog hais txog Australian and New Zealand Army Corps (tebchaws Auxitalia thiab Nus Xivleem pab tub rog)” thiab “ntev mus ntev tuaj lawv muab hnub Ee-txaka hloov ua hnub nco txog cov tub rog uas tau tas sim neej thaum ua tsov rog.”—Historical Dictionary of Australia.
Hnub nco txog cov uas txeev mus ua rog (Remembrance Day, Remembrance Sunday, or Memorial Day). Txoj kevcai no ua los qhuas “cov tub rog thiab cov uas tas sim neej rau lawv lub tebchaws.”—Encyclopædia Britannica.
Tej koob tsheej uas ntsig txog ib lub tebchaws tej keeb kwm lossis lub tebchaws dim lwm lub tebchaws qab kev tswj hwm. Yexus hais rau nws cov thwjtim tias: “Lawv tsis yog ntiajteb li ib yam li kuv tsis yog ntiajteb li.” (Yauhas 17:16) Txawm Yehauvas Cov Timkhawv nyiam kawm txog tej tebchaws li keeb kwm los lawv tsis koom nrog tej koob tsheej uas ntsig txog lub tebchaws. Xws li:
Hnub Auxitalia (Australia Day). Phau ntawv Worldmark Encyclopedia of Cultures and Daily Life hais tias hnub no yog “hnub uas pab tub rog txhos tebchaws Askiv tus chij rau ntawm tebchaws Auxitalia xyoo 1788 thiab tshaj tawm tias tebchaws Auxitalia yog ib lub tebchaws tshiab uas Askiv kav lawm.”
Hnub Kai Fo (Guy Fawkes Day). Hnub no yog “hnub uas tebchaws Askiv ua koob tsheej qhuas qhov uas lawv tiv thaiv tau cov nom tswv thiab Vajntxwv Ntsee tus 1 ntawm Kai Fo thiab qee leej Kas Tos Liv tej hoob pob xyoo 1605.”—A Dictionary of English Folklore.
Hnub muaj kev ywj pheej tau teb tau chaws (Independence Day). Muaj ntau lub tebchaws “ua koob tsheej no rau hnub uas lawv lub tebchaws tau dim ntawm lwm lub tebchaws qab kev tswjhwm.”—Merriam-Webster’s Unabridged Dictionary.
Tej kevcai no puas noj haus ua nqaj ua nqug lossis ua plees ua yi?
Vajlugkub tej hauv paus ntsiab lus: “Yav tas los nej niaj hnub ua li cov uas tsis ntseeg Vajtswv ua. Nej nyiam ua phem ua qias, qw ua nqaj ua nqug thiab pe dab pe mlom.”—1 Petus 4:3.
Yehauvas Cov Timkhawv xav ua raws li phau Vajlugkub tej hauv paus ntsiab lus. Lawv thiaj tsis koom tej kevcai uas noj haus qaug dej qaug cawv thiab ua nqaj ua nqug. Yehauvas Cov Timkhawv yeej nyiam nrog cov phoojywg ua si lomzem tiamsis yog hais txog haus dej haus cawv lawv tsuas haus mentsis kom lomzem xwb. Lawv coj li no vim lawv xav ua raws li phau Vajlugkub qhia tias: “Nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag.”—1 Kauleethaus 10:31.
Yog li ntawd, Yehauvas Cov Timkhawv thiaj tsis koom tej kevcai uas tsis raws li phau Vajlugkub qhia. Xws li, txoj kevcai Pulees (Purim). Txawm txoj kevcai no ua nco txog hnub cov neeg Yudais dim ntawm kev raug tua xyoo 5 ua ntej Yexus los phau ntawv Essential Judaism hais tias niaj hnub no “cov neeg Yudais siv txoj kevcai Pulees los txhawb lub koob tsheej Madis Kab (Mardi Gras) lossis Khanivaj (Carnival).” Thaum lub caij ntawd “tej txivneej hnav pojniam tej tsoos tsho, noj haus qaug dej qaug cawv, qw ua nqaj ua nqug.”
Txawm Yehauvas Cov Timkhawv tsis koom tej koob tsheej los puas yog lawv tsis hlub lawv tsev neeg?
Yehauvas Cov Timkhawv yeej hlub lawv tsev neeg heev, phau Vajlugkub qhia tias ib leeg yuav tsum hlub ib leeg thiab saib taus ib leeg, txawm nyias muaj nyias kev ntseeg los xij. Txhua tus yuav tsum hlub thiab saib taus lawv tsev neeg. (1 Petus 3:1, 2, 7) Thaum Yehauvas Cov Timkhawv ib tug tseg tsis koom nrog tej koob tsheej lawm, yuav ua rau nws cov txheeb ze tsis txaus siab lossis tu siab. Tej zaum cov txheeb ze yuav xav tias tus Timkhawv tsis hlub lawv lawm. Yog li ntawd, tus Timkhawv thiaj lauj sijhawm mus xyuas nws cov txheeb ze kom qhia tau tias nws tseem nco txog lawv. Tsis tas li ntawd, nws ua tib zoo piav seb vim li cas nws ho tsis koom nrog tej koob tsheej.
Yehauvas Cov Timkhawv puas txwv kom lwm tus txhob koom nrog ib txoj kevcai twg?
Yehauvas Cov Timkhawv yeej tsis txwv ib tus twg li. Lawv ntseeg tias nyias yuav tsum txiav txim siab rau nyias tus kheej xwb. (Yausuas 24:15) Yehauvas Cov Timkhawv “saib taus sawvdaws” txawm nyias muaj nyias ib txojkev ntseeg.—1 Petus 2:17.
Tej Yam No Yuav Pab Tau Koj Thiab
ESSENTIAL BIBLE TEACHINGS
Vajtswv Puas Txais Yuav Txhua Txojkev Ntseeg?
Tibneeg xav hais tias txawm nyias muaj nyias ib txojkev ntseeg los, txhua txoj puav leej ua haum Vajtswv siab.
