Inai ladana Mikaela, eiava dubu haida idia gwau “Seint Mikaela,” be Iesu ena ladana ta. Ia be guba ai ia noho bona ena tanobada maurina murinai unai ladana ia gaukaralaia. a Mikaela be Satani ida Mose ena tauanina totona ia hepapahuahu, bona aneru ta ia durua Dirava ena hereva be peroveta tauna Daniela dekenai ia abia lao totona. (Daniela 10:13, 21; Iuda 9) Mikaela be iena ladana hegeregerena ia kara, ena anina be “Daika be Dirava Hegeregerena?” Bona ia be Dirava ena lohia siahuna kahanai ia gini bona Dirava ena inai taudia ia tuari henidia.​—⁠Daniela 12:1; Apokalupo 12:7.

 Mani ita itaia dahaka dainai ita abia dae diba Iesu be Aneru badana Mikaela?

•   Mikaela be “aneru badana.” (Iuda 9) Unai dagi ladana “aneru badana” anina be “aneru edia lohia tauna,” bona ia be Baibel ena siri rua sibona lalonai ia hedinarai. Unai hereva rua amo ita itaia unai be aneru tamona sibona ena dagi ladana. Unai siri ta ia gwau, ia toreisi lou Lohiabada Iesu “be guba amo do ia diho, aneru badana ena gadona ida oda ia henia.” (1 Tesalonika 4:16) Iesu ena gadona be “aneru badana ena gadona,” badina ia be aneru badana, Mikaela.

•   Mikaela be aneru tuari oreana ia biagua. “Mikaela mai ena aneru bona huala [Satani] mai ena aneru idia tuari.” (Apokalupo 12:7) Aneru oreadia huanai Mikaela be mai ena siahu bada, badina Baibel ia gwau ia be “lohia tauna badana ta.” (Daniela 10:13, 21; 12:1) New Testament scholar David E. Aune ia gwau, unai dagi ladana ese idia hahedinaraia Mikaela be “aneru tuari oreadia edia komanda badana.”

   Baibel ese ladana ma ta ia gwauraia, ia be mai ena siahu aneru tuari oreadia ia biagua totona. Ia gwau “Lohiabada Iesu bona ena siahu bada anerudia be lahi hururuhururu ida guba amo idia hedinarai neganai, . . . panisi do ia mailaia.” (2 Tesalonika 1:7, 8; Mataio 16:27) Iesu be “guba dekenai ia daekau bona Dirava ese aneru bona siahu ibounai be ia henunai ia atoa.” (1 Petero 3:21, 22) Ia maoro lasi bema Dirava ese Iesu bona Mikaela be aneru helagadia edia biaguna rua ai ia halaodia. To, ita gwau diba unai ladana rua, Iesu bona Mikaela, be aneru tamona idia herevalaia.

•   Guna bamona ia vara lasi “hisihisi negana” ai, Mikaela do “ia gini.” (Daniela 12:1) Daniela bukana ai, unai hereva “gini” ia gaukaralaia momo king ta be gaukara badana ta ia karaia totona ia toreisi karana ia herevalaia totona. (Daniela 11:​2-4, 21) Baibel ia gwau Iesu Keriso be “Dirava ena Hereva” bona “king ibounai edia King” bamona gaukara badana ta do ia karaia. Unai be Dirava ena inai taudia ia hadikaia ore bona iena taunimanima do ia gimaia. (Apokalupo 19:11-16) “Hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi” negana ai, Mikaela be unai do ia karaia.​—⁠Mataio 24:21, 42.