Iesu be ena mauri davalaia boubouna amo, ia idia abidadama henia taudia ia hamauria. (Mataio 20:28) Unai dainai, Baibel ia gwau Iesu be “tanobada ena hamauria tauna.” (1 Ioane 4:14) Danu, ia gwau: “Tau ma ta ese ita ia hamauria diba lasi, badina tanobada ai Dirava ese taunimanima huanai ladana ma ta ia abia hidi lasi, ita ia hamauria totona.”—Kara 4:12.

 Iesu “be taunimanima ibounai totona ia mase,” unai amo ia idia abidadama henia taudia ibounai be do idia mase lasi. (Heberu 2:9; Ioane 3:16) Danu, “mase amo Dirava ese ia hatorea isi lou” bona Iesu be lauma tauanina ida guba dekenai ia giroa lou. (Kara 3:15) Unuseniai, Iesu be “Dirava kahirakahira idia lao taudia do ia hamauria momokani, badina ia noho hanaihanai bona idia totona Dirava do ia noinoi henia.”—Heberu 7:25.

Dahaka dainai Iesu ese ita totona Dirava ia noinoi henia?

 Ita ibounai be kara dika taudia. (Roma 3: 23) Kara dika be magu ta bamona ia noho ita bona Dirava huanai, bona mase dekenai ita ia abia lao. (Roma 6:23) To, Iesu be iena mauri davalaia boubouna idia abidadama henia taudia ia “durua tauna.” (1 Ioane 2:1) Ia be idia totona Dirava ia noia, edia guriguri do ia kamonai bona ena boubou gauna amo edia kara dika do ia gwauatao. (Mataio 1:21; Roma 8:34) Dirava ese Iesu ena noinoi ia kamonai badinai idia be Iena ura hegeregerena. Dirava ese Iesu be tanobada dekenai ia siaia, “tanobada taudia be ia amo mauri idia abia totona.”—Ioane 3:17.

Iesu ita abidadama henia sibona be hegeregere, a?

 Lasi. Momokani, hahemauri ita abia totona Iesu ita abidadama henia be gau badana, to gau ma haida ita karaia be namo. (Kara 16:30, 31) Baibel ia gwau: “Tauanina be laga lasi neganai, ia be mase gauna, unai hegeregerena abidadama mai ena kara lasi be mase gauna.” (Iamesi 2:26) Ita mauri totona, namona be inai ita karaia:

•   Iesu bona ena Tamana, Iehova, do ita dibaia.—Ioane 17:3.

•   Idia do ita abidadama henia.—Ioane 12:44; 14:1.

•   Edia taravatu ita badinaia karana amo iseda abidadama ita hahedinaraia. (Luka 6:46; 1 Ioane 2:17) Iesu ia gwau ia dekenai idia gwau “Lohiabada e” taudia ibounai be do idia mauri lasi, “to [iena] Tamana guba ai ia noho ena ura ia karaia tauna sibona.”—Mataio 7:21.

•   Ena be hekwakwanai idia vara to iseda abidadama ita hahedinaraia noho. Iesu ese unai ia hahedinaraia, ia gwau: “Ia haheauka ela bona dokona tauna be mauri do ia abia.”—Mataio 24:13.