NIUSPEPA ta oi duahia, televisen oi itaia, eiava reidio oi kamonai neganai, taravatu utua karadia, tuari, bona terorist karadia edia sivarai be momo herea! Sibona emu hekwakwanai mani oi laloa. Reana gorere eiava emu lalokau tauna ta ia mase dainai, oi lalohekwarahi bada. Reana emu hemami be kara namo tauna Iobu ena bamona, ia gwau ‘egu lalona ia hisihisi bada.’​—Iobu 10:15.

Oi sibona oi nanadaia:

• Inai be Dirava ena ura lau bona taunimanima ibounai totona, a?

• Egu hekwakwanai lau haheaukalaia totona, heduru be edeseni amo do lau abia?

• Nega ta tanobada ai maino do ia vara, a?

Baibel ese unai henanadai edia haere maorodia ia henia.

“Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”​—Apokalupo 21:4

“Edia aena idia dika taudia be do idia roho bona mavaru.”​—Isaia 35:6

“Matakepulu taudia ese do idia itaia diba.”​—Isaia 35:5

 “Mase guria gabu dekenai idia noho taudia ibounai . . . do idia toreisi.”​—Ioane 5:​28, 29

“Siona dekenai idia noho taudia ta ese do ia gwau lasi, ‘Lau be gorere.’ ”​—Isaia 33:24

“Koni momo herea, be tano dekenai do ia vara namonamo.”​—Salamo 72:16

Namo lasi oi laloa rau gunadia dekenai idia noho laulau bona hereva, be hereva kavakavadia sibona. Dirava ia gwauhamata unai gaudia do ia karaia momokani, bona unai do Ia karaia dalana be Baibel ese ia gwauraia hedinarai.

To Baibel be unai gaudia sibona ia herevalaia lasi. Hari inai negai mauri namona ita moalelaia diba dalana ia gwauraia danu. Mani nega sisina lalonai emu lalohekwarahi bona hekwakwanai oi laloa. Reana idia be moni ena hekwakwanai, ruma bese ena hekwakwanai, gorere, eiava emu lalokau tauna ta ia mase. Baibel ese oi ia durua diba hari idia vara hekwakwanai oi haheaukalaia totona, bona inai bamona henanadaidia ia haerelaia karana amo ita ia durua:

• Dahaka dainai hisihisi ita davaria?

• Mauri lalonai idia vara lalometau gaudia be edena bamona ita haheaukalaia diba?

• Edena dala ai iseda famili ita hamoalea diba?

• Ita mase neganai, dahaka ia vara ita dekenai?

• Iseda lalokau mase taudia be do ita itadia lou, a?

• Edena bamona ita diba momokani Dirava ese ena gwauhamata vaira nega totona do ia hamomokania?

 Inai buka oi duahia karana ese ia hahedinaraia oi ura Baibel ena hadibaia herevadia oi dibaia. Inai buka ese oi do ia durua. Do oi itaia paragraf ta ta edia henanadai be rau ena henunai idia noho. Taunimanima milioni momo be Iehova ena Witnes taudia ida Baibel idia herevalaia neganai, henanadai bona haere karana idia moalelaia. Ai ura unai do oi moalelaia danu. Baibel ena hadibaia herevadia oi dibaia noho lalonai, Dirava ese oi do ia hanamoa!