Baibel Ita Abia Dalana

Baibel be ta ese ia hadikaia lasi ema bona hari iseda negai be hoa gauna. Lagani 1,900 mai kahana lalonai Baibel idia torea haorea. Idia dika diba gaudia hegeregere, papyrus amo idia karaia pepa bona animal kopina dekenai Baibel idia torea. Bona hari, Baibel idia torea gado ginigunadia be taunimanima momo idia diba lasi. Danu, lohia taudia bona tomadiho gunalaia taudia idia hekwarahi bada Baibel idia hadikaia totona.

DENA DALA AI inai buka be idaunega amo ema bona hari ia noho bona momo ese idia ura henia? Hamomokania gaudia rua mani ita herevalaia.

Kopi Momo Idia Karaia Dainai Toretore Idia Gimaia

Israela taudia be Baibel ena toretore ginigunadia idia gimaia taudia. Idia ese unai lokua toretore ginigunadia idia naria namonamo bona kopi momo idia karaia. Hegeregere, Dirava ese Israela ena king taudia ia hamaoroa, “Taravatu ena kopi ta [idia] torea, unai taravatu be Levi hahelaga taudia ese idia naria.”—Deuteronomi 17:18.

Israela taudia be Baibel duahia karana idia laloa bada, badina idia laloparara unai be Dirava ena Hereva. Unai dainai, taravatu torea hanaia gaukarana idia diba namonamo taudia ese lokua toretore ginigunadia edia kopi idia torea. Dirava ia gari henia tauna, ena ladana be Esera, ia idia gwauraia “Taravatu torea hanaia tauna, bona Mose ena Taravatu, Israela ena Dirava Iehova ese ia henia taravatuna unai, ia diba namonamo.” (Esera 7:6) Lagani 500 bona 900 C.E. huanai, Masorete taudia, idia ese Heberu Revarevadia o “Taravatu Gunana” idia torea hanaia neganai, leta ta ta idia duahia danu, badina idia ura lasi leta ta idia reaia. Unai dala idia badinaia dainai Baibel ena hereva ia maoromaoro, bona Baibel ia noho ema bona hari, ena be ia idia inai henia taudia idia ura dikadika Baibel idia hadikaia.

Hegeregere, lagani 168 B.C.E. ai, Suria ena lohia tauna Antiochus namba 4 ia ura, Palestine lalonai ia davaria Heberu Revarevadia ena kopi ibounai ia hadikaia. Iuda edia histori bukana ta ia gwau: “Idia davaria Heberu Revarevadia be idia darea bona idia gabua.” Buka ta ladana, The Jewish Encyclopedia ia gwau: “Unai taravatu idia badinaia ofesa taudia ese Heberu Revarevadia idia dogoatao taudia idia dagedage henia  .  bona . . .hamasea.” To Heberu Revarevadia ena kopi haida be Palestine ai idia noho Iuda taudia, bona tano ma haida ai idia noho taudia dekenai idia noho.

Toretore taudia ese Keristani Greek Revarevadia eiava “Taravatu Matamatana” idia torea ore, bena daudau lasi unai revareva, peroveta herevadia, bona histori edia kopi be gabu momo dekenai idia lao. Hegeregere, Ioane ese Efeso dekenai eiava ena kahirakahira gabuna ai iena Evanelia bukana ia torea. To, iena Evanelia bukana ia torea murinai, tahua gaukara idia karaia taudia idia gwau, lagani 50 do lasi neganai idia karaia kopi ena kahana ta be kilomita 100 bamona Aigupito ai idia davaria. Unai tahua gaukarana amo ia hahedinaraia daudau tanodia ai idia noho Keristani taudia unai nega ese toretore ena kopi haida idia abia, hari hegeregerena.

Keriso ia mase bona lagani handred momo murinai, Dirava ena Hereva ena kopi be gabu momo ai idia hariharilaia dainai unai toretore be ia noho ema bona hari. Hegeregere, lagani 303 C.E., February 23 daba ai, ripoti ia gwau, Roma ena lohia tauna Diocletian ena vairanai ena soldia taudia ese dubu ena iduara idia makohia bona idia vareai bena Toretore Helagadia ena kopi idia gabua. Diocletian ia laloa bema toretore helagadia ia hadikaia Keristani tomadiho do ia haorea. Murina dinana ai, oda ia henia Rome Basileiana lalonai Baibel ena kopi ibounai be pablik ai idia gabua totona. To Baibel ena kopi momo idia noho dainai, kopi ma haida idia karaia. Oibe, reana Diocletian ena dagedage karana murinai, Greek gado Baibel ena kahana badadia rua edia kopi idia karaia, bona idia noho ema bona hari. Kopi ta be Rome ai bona ma ta be England, London, British Library dekenai ia noho.

Ena be Baibel maniuskrip ginigunadia idia davaria lasi, to Baibel ibounai eiava ena kahana sibona be imana amo idia torea hanaia bona kopi tausen momo be idia do noho ema bona hari. Kopi haida be gunadia momokani. Lokua toretore ginigunadia ai idia noho herevadia idia torea hanai neganai, ena anina idia haidaua, a? Diba bada tauna William Henry Green ese Heberu Toretoredia ia herevalaia neganai, ia gwau: “Ita gwau diba, Baibel ena hereva be idia torea hanai maoromaoro.” Sir Frederic Kenyon, Baibel maniuskrip ia stadilaia tauna ese Keristani Grik Toretoredia ia herevalaia, ia gwau: “Toretore ginigunadia idia torea negana bona kopi gunadia idia torea negana edia padana be daudau lasi. Unai dainai, toretore ginigunadia edia hereva idia haidaua lalohadaina ita dadaraia diba, badina hari ita dekenai ia noho Baibel ena hereva be toretore ginigunadia hegeregerena. Ita hamomokania Taravatu Matamata bukadia edia hereva be momokani bona maoromaoro.” Ma ia gwau: “Ita abia dae diba, Baibel ena hereva idia torea hanai maoromaoro. . . . Idaunegai buka ta be inai bamona lasi.”

Baibel Trensleisen

Momo ese Baibel idia ura henia ena badina badana iharuana be, gado momo ai idia trensleit. Unai be Dirava ena ura badana, ia ura bese bona gado idauidau taudia ese ia do idia dibaia bona “lauma ai bona momokani ai ia idia tomadiho henia” totona.—Ioane 4:23, 24; Mika 4:2.

Heberu Revarevadia amo idia hahanaia gado ginigunana be Greek Septuagint Baibel. Unai Baibel be Palestine murimuri ai idia noho Greek-gado idia herevalaia Iuda taudia totona idia hahanaia bona lagani 200 bamona lalonai, Iesu be tanobada ai ena haroro gaukara ia do karaia lasi neganai idia haorea. Baibel ena buka ibounai be lagani handred haida sibona lalonai idia torea ore, bena gado momo ai idia hahanaia. To gabeai, king bona pris taudia ese edia siahu idia gaukaralaia lasi, taunimanima dekenai Baibel idia henia totona. Pris taudia idia ura lasi taunimanima ese Dirava do idia dibaia, unai dainai gwaumaoro idia henia lasi Baibel be edia gado ai idia hahanaia totona.

Tatau haida be mai gari lasi ida taunimanima edia gado ai Baibel idia hahanaia, ena be dubu bona gavamani taudia ese idia dagedage henia. Hegeregere, lagani 1530 ai, Oxford ai ia sikuli England tauna ladana William Tyndale ese Pentatuk ia hahanaia, unai be Heberu Revarevadia ena buka ginigunadia 5. Ena be dagedage bada ia davaria, to ia be tau ginigunana Baibel be Heberu gado amo English gado dekenai ia hahanaia. Danu, Tyndale be English gado ai Iehova ena ladana ia gaukaralaia tauna ginigunana. Baibel ia diba namonamo Spain tauna Casiodoro de Reina be Spain gado ena Baibel ta ia hahanaia neganai, nega momo Katolik taudia ese idia dagedage henia. Ia lao England, Germany, France, Holland, bona Switzerland dekenai, unuseniai ena hahanaia gaukarana ia haorea totona. a

Hari Baibel be gado momo ai idia hahanaia bona kopi milioni momo idia printaia noho. Baibel be ia noho ema bona hari bona momo ese idia duahia noho, unai ese aposetolo Petero ena hereva ia hamomokania, ia gwau: “Rei ia kakoro bona flaoaflaoa ia moru, to Iehova ena hereva be ia noho ela bona hanaihanai.”​—1 Petero 1:24, 25.

[Futnout]

[Maua/Foto]

EDENA BAIBEL LAU DUAHIA BE NAMO?

Gado momo ai Baibel edia trensleisen be idauidau. Unai Baibel haida lalonai hereva aukadia bona hereva gunadia idia gaukaralaia. Baibel haida lalonai hahanaia taudia ese auka lasi dalanai sibodia edia lalohadai idia torea, duahia taudia ese idia lalopararalaia haraga totona, to hereva momokani idia torea lasi. Bona Baibel haida lalonai lokua toretoredia edia hereva ta ta idia hahanaia.

New World Translation of the Holy Scriptures be Iehova Ena Witnes taudia ese idia halasia English Baibel, bona komiti ta ese lokua toretoredia amo idia hahanaia. Bena unai English Baibel idia gaukaralaia, Baibel be gado 60 mai kahana ai idia hahanaia totona. Baibel idia hahanaia taudia be hereva ta idia atoa kau lasi, to lokua toretoredia edia hereva idia badinaia. Danu, New World Translation idia hahanaia taudia idia ura lokua toretoredia ena hereva ta ta idia hahanaia, bona ena anina idia hunia lasi. Hahanaia taudia be auka lasi dalanai Baibel idia hahanaia, unai amo duahia taudia ese do idia lalopararalaia, guna Baibel negadiai taunimanima ese lokua toretoredia idia duahia bona lalopararalaia bamona.

Gado idia diba bada taudia haida ese hari idia noho Baibel trensleisen idauidau, bona New World Translation danu idia sekea. Unai idia karaia badina Baibel haida lalonai lalohadai kereredia idia hahanaia eiava hereva haida idia haidaua. Unai tauna ta be, Jason David BeDuhn, ia be America ena univesiti ta ai tomadiho ia stadilaia ena profesa ta. Lagani 2003 ai buka ta ia halasia, bona unai buka lalonai “English gado idia diba taudia ese idia duahia momo Baibel” ibounai 8 dekenai tahua gaukara ia karaia bona ena ripoti ia torea. b Diba bada taudia haida ese idia hepapahuahulaia siridia dekenai tahua gaukara ia karaia, badina unai siri dekenai hahanaia taudia be nega momo “sibodia edia lalohadai idia torea.” Siri ta ta dekenai, ia ese English trensleisen ena siri ta ta be Greek lokua toretoredia ida ia hahegeregerea, bona ia sekea bema hahanaia taudia be sibodia edia lalohadai idia torea. Dahaka ia davaria?

[Futnout]

[Foto]

Masorete manuskrip

[Foto]

Inai kahana be Luka 12:7 ena hereva ia noho, “. . . umui gari lasi, umui ese manu maragidia ibounai umui hereaia”

[Picture Credit Lines]

Foreground page: National Library of Russia, St. Petersburg; second and third: Bibelmuseum, Münster; background: © The Trustees of the Chester Beatty Library, Dublin