1, 2.Ita ta ta be dahaka ita abia dae be namo? (Laulau ginigunana herevalaia.)

VANEGAI stadi ese ia hahedinaraia, Diabolo ia gwau Iehova be dala maorona ai iena lohia siahuna ia gaukaralaia lasi, bona taunimanima be sibodia idia lohiaia neganai do idia moale. Satani ena hereva be momokani, a? Taunimanima be sibodia idia lohiaia neganai, idia noho hanaihanai diba, a? Dirava ese idia ia lohiaia lasi dainai, do idia moale, a? Do oi moale, bema oi be sibona oi lohiaia bona oi noho hanaihanai diba, a?

² Ta be oi totona unai henanadai do ia haerelaia lasi. Ita ta ta ese unai henanadai ta ta do ita laloa namonamo. Bema unai ita karaia, do ita hamomokania Dirava ena lohia dalana be maoro, bona ia be lohia dalana namo hereana. Unai dainai mai kudouna ibounai ida iena lohia dalana ita abia isi be namo. Baibel ese ia hamomokania, Iehova sibona ese guba bona tanobada ia lohiaia be maoro.

3. Dahaka dainai Iehova sibona ese guba bona tanobada ia lohiaia be maoro?

³ Iehova ese guba bona tanobada ia lohiaia be maoro, badina ia be Siahu Ibounai Diravana bona Havaraia Tauna. (1 Siv. 29:11; Kara 4:24) Apokalupo 4:11 ai, matahanai ta lalonai Keriso ida do idia lohia 144,000 taudia idia gwau: “Iehova, aiemai Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia bona  oiemu ura dainai idia noho bona oi havaradia.” Oibe, Iehova ese gau ibounai ia havaraia dainai, ia be mai ena maoro aneru bona taunimanima ia lohiaia totona.

4. Ena be ita be mai iseda ura kwalimu, to dahaka dainai ita be maoro lasi Dirava ena lohia siahuna ita dadaraia totona?

⁴ Satani be gau ta ia havaraia lasi. Unai dainai ia be maoro lasi guba bona tanobada ia lohiaia totona. Satani bona tau bona hahine ginigunana be Iehova ena lohia siahuna idia dadaraia neganai, idia be mai hekokoroku ida idia kara. (Ier. 10:23) Momokani, idia be mai edia ura kwalimu dainai, idia sibodia idia lohiaia diba. To unai ese idia dekenai maoro ia henia unai idia karaia totona, a? Lasi. Taunimanima be mai edia ura kwalimu dainai, dina ta ta ai abia hidi maorodia idia karaia diba. To, unai ese idia dekenai maoro ia henia lasi edia Havaraia Tauna bona Mauri Henia Tauna idia gwau-edeede henia totona. Momokani, idia ese Iehova idia gwau-edeede henia neganai, idia be edia ura kwalimu idia gaukaralaia kerere. Ita be taunimanima sibona dainai, Iehova ese ita ia lohiaia bona naria be maoro.

5. Dahaka dainai ita abia dae momokani Dirava ena abia hidi ibounai be maoromaoro?

⁵ Badina ma ta dainai ita gwau diba Iehova ese guba bona tanobada ia lohiaia be maoro. Ia be hahemaoro goevagoeva Diravana. Ia gwau: “Lauegu lalokau, be noho hanaihanai lalokauna, bona lauegu kara be namo, bona maoromaoro danu. Inai bamona karadia, be lauegu kudouna ese ia ura henidia bada noho.” (Ier. 9:24) Abia hidi maorona ia karaia totona, ia ese taunimanima edia taravatu ia badinaia be anina lasi. Ia sibona ese hahemaoro goevagoeva ia karaia bona taunimanima totona taravatu ia atodia diba. “[Iena] basileia be kara maoromaoro bona kota maorona, dekenai ia gini noho,” unai dainai ita diba momokani iena taravatu, hakaua herevadia, bona ia karaia abia hidi be hanaihanai idia maoro. (Sal. 89:14; 119:128) Ena be Satani ia gwau Iehova ena lohia dalana be maoro lasi, to ia sibona be taunimanima totona hahemaoro goevana ia karaia diba lasi.

6. Dahaka badina ta dainai Iehova ese tanobada ia lohiaia be maoro?

⁶ Danu, Iehova be lohia tauna maorona, badina ia be mai ena diba bona aonega guba bona tanobada ia lohiaia totona. Mani oi laloa, Dirava ese ena Natuna dekenai siahu ia henia doketa ese idia hanamoa diba lasi goreredia ia hanamoa totona. (Mat. 4:23, 24; Mar. 5:25-29) Iehova dekenai unai be hoa gauna lasi. Ia be iseda tauanina ena gaukara dalana ia diba namonamo bona iseda gorere ia hanamoa diba. Danu, ia ese mase taudia ia hatorea isi lou diba bona disasta idauidau ia koudia diba.

7. Edena dala ai Iehova ena aonega ese Satani ena tanobada ena aonega ia hereaia?

⁷ Satani ese ia lohiaia tanobada be tano ta eiava tano momo huanai maino ia havaraia diba lasi. Iehova sibona be mai ena aonega tanobada ai maino ia havaraia totona. (Isa. 2:3, 4; 54:13) Iehova ena diba bona aonega ita dibaia neganai, aposetolo Paulo hegeregerena do ita gwau: “Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi bona ena dala ibounai be ta ese ia lalopararalaia diba lasi!”​—Roma 11:33.

8. Dahaka dainai Iehova ena lohia dalana oi moalelaia?

⁸ Baibel ese ia hahedinaraia Iehova be mai ena maoro ia lohia totona. Danu, ia hahedinaraia iena lohia siahuna ese ma haida edia lohia siahuna ia hereaia. Ena badina ta be ia be mai lalokau ida ia lohia. Oibe, ita ese iena lohia siahuna ia gaukaralaia dalana ita laloa neganai, ita moale, ani? Ia be ‘bogahisihisi  bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia be haraga.’ (Eso. 34:6) Dirava ese ena hesiai taudia be mai hemataurai ida ia kara henidia. Ia ese ita ia naria namonamo diba, ita sibona be unai ita karaia diba lasi. Diabolo ia gwau Iehova ese gau namodia be iena hesiai taudia amo ia hunia, to unai be momokani lasi. Mani oi laloa, Dirava ese iena lalokau Natuna ia henia, unai amo mauri hanaihanai ita abia diba!​—⁠Salamo 84:11; Roma 8:32 duahia.

9. Edena bamona ita diba Dirava be ita ta ta ia laloa?

⁹ Iehova ese ena taunimanima ibounai ia lalokau henia. Danu, ia ese idia ta ta ia laloa bada. Mani oi laloa, lagani 300 bamona lalonai, Iehova ese hahemaoro taudia ia gaukaralaia Israela besena be edia inai taudia amo ia hamauria totona. Unai ia vara noho lalonai, Iehova ese Israela lasi hahinena Ruta ia itaia. Ruta be gau momo ia dadaraia, bona tomadiho momokani ia badinaia. Unai dainai Iehova ese Ruta ia hanamoa bona ia dekenai adavana ia henia bona natuna ta danu. To unai sibona lasi. Ruta ia toreisi lou neganai, do ia dibaia gauna be iena natuna be Mesia ia mai besena amo. Bona mani Ruta ena hemami oi laloa, bema ia kamonai iena mauri sivaraina danu be Baibel bukana Ruta lalonai idia torea!​—⁠Ruta 4:13; Mat. 1:5, 16.

10. Dahaka dainai ita gwau diba Iehova be mai kara auka ida do ia lohia lasi?

¹⁰ Iehova be mai kara auka ida taunimanima ia lohiaia lasi. Ia idia kamonai henia taudia be do idia gari lasi bona do idia moale. (2 Kor. 3:17) Davida ia gwau: “Lohiabada be mai ena hairaina, bona ia be mai King Badana ena siahu danu. Iena Dubu Helaga lalonai, iena goada bona iena moale idia noho momokani.” (1 Siv. 16:7, 27) Unai hegeregerena, salamo torea tauna Etana ia gwau: “Ane dekena amo oi idia tomadiho henia taudia, be mai edia moale momokani danu. Lohiabada e, idia be oiemu bogahisihisi ena diari lalonai idia mauri noho. Oi dainai idia be dina ibounai idia moale bada noho, bona oiemu kara namo dainai oi idia hanamoa noho.”​—Sal. 89:15, 16.

11. Dahaka ita karaia diba, unai amo do ita hamomokania Iehova ena lohia dalana be hereadae?

¹¹ Iehova ena kara namodia ita laloa dobu neganai, do ita abia dae momokani iena lohia dalana be hereadae. Bona salamo torea tauna hegeregerena do ita gwau: “Lohiabada e, bema dina tamona sibona Dubu Helaga lalonai lau noho, unai dina ese, dina 1000 idau gabu dekenai ia hereaia noho.” (Sal. 84:10) Dala ma ta be lasi. Iehova be ita ia Havaraia Tauna dainai, ia diba dahaka ese ita ia hamoalea diba, bona ita dekenai unai ura do ia hagugurua. Iehova ia ura do ita karaia gaudia ibounai be iseda namo totona. Ena be gau haida do ita dadaraia, to bema Iehova ita kamonai henia, do ita moale.​—Isaia 48:17 duahia.

12. Dahaka badina badana dainai Iehova ena lohia siahuna ita abia isi be namo?

¹² Baibel ia gwau, Keriso ena Lagani 1,000 Lohia Negana ia ore murinai, taunimanima haida be Iehova ena lohia siahuna do idia dadaraia. (Apok. 20:7, 8) Dahaka dainai unai do idia karaia? Unai nega ai, Diabolo be dibura amo do idia ruhaia bona do ia ura taunimanima ia hakaua kerere, hanaihanai ia karaia bamona. Reana taunimanima do ia koia, ia gwau bema Iehova idia kamonai henia lasi, do idia mauri hanaihanai. Momokani, unai hereva be koikoi. To namona be sibona ita nanadaia: Lau ese unai bamona koikoi herevana do lau abia dae, a? Bema Iehova ita lalokau henia, bona ita abia dae iena kara be namo bona ia ese guba bona tanobada ia lohiaia be maoro, unai bamona koikoi herevana do ita dadaraia momokani.  Do ita ura Iehova sibona ena lohia henunai ita noho, badina ia be mai lalokau ida do ia lohia.

13. Dirava ita tohotohoa neganai, edena dala ai iena lohia siahuna ita abia isi?

¹³ Momokani, ita ese mai kudouna ibounai ida Iehova ena lohia siahuna ita abia isi be namo. Matamanai ita herevalaia bamona, ia be mai ena maoro ia lohia totona, bona ena lohia dalana be hereadae. Iehova ena lohia siahuna ita abia isi diba, bema ia ita badinaia noho bona mai abidadama ida ia ita hesiai henia. Edena dala ma haida ai unai ita karaia diba? Dala ta be gau ibounai dekenai Iehova ena dala ita badinaia. Unai ita karaia neganai, ita hahedinaraia ita be ia ita lalokau henia bona iena lohia siahuna ita abia isi.​—Efeso 5:1, 2 duahia.

14. Edena dala ai elda taudia bona ruma bese kwaradia ese Iehova idia tohotohoa diba?

¹⁴ Baibel amo ita diba Iehova be hanaihanai mai lalokau ida iena siahu ia gaukaralaia. Iehova ena lohia dalana idia ura henia ruma bese kwaradia bona elda taudia ese iena kara do idia tohotohoa, bona edia henunai idia noho taudia do idia biagua auka lasi. Paulo ese Dirava bona ena Natuna ia tohotohoa. (1 Kor. 11:1) Ia ese ma haida ia hahemaraia lasi eiava ia doridia lasi kara maorona idia karaia totona. To, idia ia noia. (Roma 12:1; Efe. 4:1; File. 8-10) Unai dala amo ia ese Iehova ena kara ia tohotohoa. Oibe, Iehova ena lohia siahuna idia ura henia bona abia isi taudia ibounai be unai bamona idia kara be namo.

15. Siahu taudia ita matauraia neganai, edena dala ai Iehova ena lohia siahuna ita abia isi?

¹⁵ Dirava amo siahu idia abia taudia be edena bamona do ita kara henia? Namona be idia ita matauraia bona idia ida ita gaukara hebou, unai amo Iehova ena lohia siahuna ita abia isi. Ena be idia karaia abia hidi ta ita lalopararalaia lasi o unai abia hidi ida ita lalotamona lasi, to namona be tiokratik dalana ita badinaia. Unai be tanobada taudia  edia kara amo ia idau, to Iehova ena lohia henunai ita noho neganai, unai mauri dalana do ita badinaia. (Efe. 5:22, 23; 6:1-3; Heb. 13:17) Bema unai bamona ita karaia, namo do ita davaria, badina Dirava be iseda namo ia laloa.

16. Ita karaia abia hidi ese edena bamona ia hahedinaraia ita be Dirava ena lohia siahuna ita abia isi?

¹⁶ Ita karaia abia hidi idauidau amo ita hahedinaraia diba ita be Iehova ena lohia siahuna ita abia isi. Iseda mauri lalonai idia vara gaudia ta ta dainai Iehova be taravatu ia atoa lasi. To, ita hakaua totona iena lalohadai ia hahedinaraia. Hegeregere, ia ese Keristani taudia ese do idia hahedokilaia dabuadia ena lista ta ia karaia bona henia lasi. To, ia ura Keristani taudia ese mai hemataurai bona laloa maoromaoro ida dabua idia hahedokilaia. (1 Tim. 2:9, 10) Danu, namo lasi ita karaia abia hidi amo ma haida ita hahekwakwanaia. (1 Kor. 10:31-33) Iehova ena lalohadai hegeregerena abia hidi ita karaia neganai, ita hahedinaraia iena lohia dalana ita ura henia bona ita abia isi.

17, 18 Edena dala ai headava taudia idia hahedinaraia diba idia be Iehova ena lohia siahuna idia abia isi?

¹⁷ Keristani headava taudia ese Iehova ena dala idia badinaia bona ena lohia siahuna idia abia isi dalana mani ita laloa. Bema headava lalonai hekwakwanai momo idia vara be edena bamona? Bema unai ia vara headava taudia idia lalohisihisi diba. Unai ia vara neganai, Iehova ese Israela taudia ia kara henia dalana idia laloa be namo. Ia be sibona ia gwauraia unai idaunega besena ena adavana bamona. (Isa. 54:5; 62:4) Ena be edia “headava” maurina ia dika, to Iehova be ia hesiku haraga lasi. Nega ibounai Israela besena ia hebogahisi henia bona idia ida ia karaia gwauhamatana ia badinaia. (Salamo 106:43-45 duahia.) Iena noho hanaihanai lalokauna dainai, ia kahirakahira ita lao diba, a?

¹⁸ Unai hegeregerena, Iehova ena dala idia ura henia headava taudia be iena kara idia tohotohoa be namo. Ena be edia headava maurina be ia dika, to namo lasi Baibel ese ia taravatua dalana ta amo edia headava idia hadokoa. Idia diba Iehova ese idia ruaosi ia hatamonaia bona ia ura idia ruaosi idia gaukara hebou. Baibel ese ia hahedinaraia, bema ta be matabodaga karana dainai iena headava ia hadokoa, ia be ia headava lou diba. (Mat. 19:5, 6, 9) Bema headava taudia idia gaukara goada edia headava idia hanamoa totona, idia ese Iehova ena lohia siahuna idia abia isi unai.

19. Kerere ita karaia neganai, dahaka ita karaia be namo?

¹⁹ Ita ibounai be goevadae lasi dainai, nega haida iseda kara amo Iehova ena lalona ita hahisia diba. Ia be unai ia diba dainai, mai lalokau ida Keriso amo mauri davalaia boubouna ia henia. Unai dainai bema kerere ta ita karaia, namona be Iehova ita noia iseda kerere ia gwauatao totona. (1 Ioa. 2:1, 2) Namo lasi ita karaia kererena dainai ita lalohisihisi noho, to namona be unai amo diba ita abia. Bema Iehova kahirakahira ita noho, ia ese ita do ia gwauatao bona durua ia ita hesiai henia noho totona.​—Sal. 103:3.

20. Dahaka dainai hari Iehova ena lohia siahuna ita abia isi be namo?

²⁰ Tanobada matamata lalonai, taunimanima ibounai be Iehova ese do ia lohiaia bona iena kara maoromaoro dalana do idia dibaia. (Isa. 11:9) To hari ita be unai ita dibaia noho. Bona kahirakahira Iehova ese ena lohia siahuna dainai ia vara hepapahuahuna do ia hamaoromaoroa. Unai dainai namona be Dirava ita badinaia noho, ia ita hesiai henia, bona ita hekwarahi iena kara ita tohotohoa totona, unai amo ita ese Iehova ena lohia siahuna ita abia isi diba.