BESALELE bona Oholiaba be konstraksen gaukara idia diba momo. Aigupito dekenai idia be hesiai taudia bona biriki momo idia karaia. Unai be guna idia gaukarana. Bona hari, Iehova ese idia ia abia hidi palai dubu haginia gaukarana idia naria totona. (Eso. 31:1-11) Idia karaia gau namodia be momo ese idia itaia lasi. Unai dainai idia lalohisihisi, a? Taunimanima ese edia gaukara idia diba be gau badana, a? Emu gaukara be haida ese idia itaia be gau badana, a?

Palai dubu lalonai idia noho gaudia be diba bada taudia sibona ese idia karaia diba bona idia be mai hairai. Hegeregere, maua latanai be golo amo idia karaia kerubi rua idia noho. Aposetolo Paulo ia gwau idia be mai “hairai.” (Heb. 9:5) Mani oi laloa, unai kerubi aneru rua be golo amo idia karaia!—Eso. 37:7-9.

Bema hari unai idia davaria bona miusiam namo hereana ai idia atoa, Besalele bona Oholiaba be hutuma ese do idia dibaia bona laloa bada. To daika ese idia karaia gaukara namona ia itaia diba? Kerubi be Helaga Herea Gabuna ai ia noho dainai, hahelaga taudia sibona ese idia itaia. Bona lagani ta ai nega tamona sibona Kara Dika Ena Davana Karaia Dinana ai idia itaia. (Heb. 9:6, 7) Unai dainai haida sibona ese idia itaia.

Bema oi be Besalele eiava Oholiaba bona oi gaukara goada gau mai hairaidia oi karaia totona. To, momo be emu gaukara idia diba lasi dainai, emu hemami be edena bamona? Hari, taunimanima be edia gaukara dainai edia turadia ese idia hanamoa bona idia laloa bada neganai, idia moale. Unai amo idia laloa edia hekwarahi be mai anina. To, Iehova ena hesiai taudia be unai bamona lasi. Besalele bona Oholiaba bamona, ita moale badina Iehova ena ura ita karaia bona ena lalonamo ita abia.

Iesu ena negai, dubu gunalaia taudia idia guriguri neganai, idia ura taunimanima ese do idia hanamoa. To, Iesu ese guriguri dalana ia hadibaia neganai, ia gwau: Mai momokani ida umui guriguri bona taunimanima ese umui idia hanamoa totona umui karaia lasi. Dahaka dainai? Badina  “emu Tamana, hehuni ai oi ia itaia tauna ese oi dekenai ahuna do ia henia.” (Mat. 6:5, 6) Unai ese ia hahedinaraia, Iehova ese iseda guriguri ia laloa dalana be mai anina bada, to taunimanima ese idia kamonai totona lasi. Gau badana be Iehova be eda guriguri ia lalonamo henia. Ita karaia hesiai gaukara helagana lalonai danu ita ura Iehova ena lalonamo ita abia. Taunimanima ese ita idia hanamoa totona eda hesiai gaukara ita karaia lasi, to ita karaia gaukarana ese Iehova, ‘hehuni ai ita ia itaia tauna,’ ia hanamoa.

Dubu helaga idia haginia ore neganai, “ori ese Palai Dubu ia koua hagegea, bona Lohiabada ena diaridiari ese Dubu ia hahonua.” (Eso. 40:34) Unai ese ia hahedinaraia Iehova ia moale! Besalele bona Oholiaba be unai nega ai dahaka idia laloa? Ena be idia karaia gaudia dekenai edia ladana idia torea lasi, to idia moale badina Iehova ese edia hekwarahi ia hanamoa. (Aon. 10:22) Idia hanaia laganidia lalonai, idia karaia gaudia be Iehova ena hesiai gaukara lalonai idia gaukaralaia dainai idia moale bada. Besalele bona Oholiaba be nega matamata ai do idia toreisi lou neganai, do idia moale bada badina idia karaia gaudia be lagani 500 lalonai dubu helaga ai tomadiho momokani totona idia gaukaralaia!

Hari, Iehova ena orea lalonai vidio karaia taudia, laulau idia torea taudia, miusiki karaia taudia, laulau idia abia taudia, gado hahanaia taudia, bona magasin bona buka idia torea taudia idia noho. To, ta ese idia karaia gaukara ia itaia lasi. Tanobada ibounai ai kongrigeisen 110,000 lalonai hesiai gaukara idia karaia tadikaka taihu ese idia karaia gaukara danu be ta ese ia itaia lasi. Akaun ia naria tadikaka be hua ta ta ai akaun fom ia hahonua neganai, daika ese ena gaukara ia itaia? Seketere ese kongrigeisen haroro ripoti ia hegaegaelaia neganai, daika ese ena gaukara ia itaia? Tadikaka o taihu ta be Kingdom Hall ena kahana ta ia hanamoa neganai, daika ese ena gaukara ia itaia?

Besalele bona Oholiaba idia mase murinai, idia karaia gau namodia dainai trofi o medolo idia abia lasi. Eiava idia be diba bada taudia dainai nadi ai edia ladana idia torea lasi. To, mai anina bada gauna be Iehova ese idia ia lalonamo henia. Unai dainai ita diba Iehova be idia karaia gaukara ia itaia. Idia be mai manau bona ura bada ida edia hesiai gaukara idia karaia. Edia haheitalai ita tohotohoa be namo.