NOA ena natuna Sema be abata ia do vara lasi bona ia vara murinai ia noho. Oi diba dahaka dainai Sema ena negai idia noho taudia be abata ese ia hadikaia ore, a? Bona Sema bona ena ruma bese taudia be unai abata amo idia roho mauri dalana oi diba, a?​— * Mani unai ita herevalaia.

Baibel ia gwau Sema ia do matamata neganai, taunimanima “edia kara dika” be bada herea. Taunimanima edia laloa be “nega ibounai ia dika sibona.” Oi diba Dirava be dahaka ia karaia, a?​— Ia ese abata ta amo unai gwau-edeede taudia ibounai ia haorea. Aposetolo Paulo ia gwau: “Unai tanobada gunana be ranu dekena amo ia hadikaia ore.”​—Genese 6:5; 2 Petero 3:6.

Dirava ese unai kara dika taudia ia haorea ena badina oi diba, a?​— Badina idia be taunimanima dikadia bona edia lalohadai be “nega ibounai ia dika.” Iesu ese unai ia herevalaia, ia gwau: “Abata badana do ia ginidae lasi neganai” taunimanima be edia mauri idia moalelaia, hegeregere “idia aniani noho, idia inuinu noho,” bona “idia headava noho.” Iesu ma ia gwau: “Idia laloa lasi dahaka do ia vara ia mai bona abata badana ia ginidae, vadaeni abata ranu ese ibounai ia abia lao.”​—Mataio 24:37-39.

Taunimanima ese dahaka idia laloa lasi?​— Sema ena tamana Noa, be “kara maoromaoro ia harorolaia,” to taunimanima be ia idia kamonai henia lasi. Noa be Dirava ia kamonai henia bona lagatoi ia karaia, unai amo Abata ia mai neganai ia bona ena ruma bese be unai lagatoi lalonai do idia noho. Noa, ena adavana, edia natudia memero toi​—Sema, Hamo, bona Iapeta—​bona edia adavadia sibona be Dirava ena hereva idia kamonai henia. To haida be sibona edia ura idia badinaia dainai, Abata lalonai idia mase.​—2 Petero 2:5; 1 Petero 3:20.

Abata ia matamaia neganai Sema bona ena ruma bese be lagatoi ai idia noho ela bona lagani ta murinai tano kaukauna dekenai idia raka-lasi. Unai nega ai taunimanima dikadia ibounai be idia ore, to gabeai taunimanima be kara dika ma idia karaia lou. Sema ena tadina Hamo ena natuna Kanana be kara dika badana ta ia karaia dainai, Noa ia gwau: “Dika do ia mai Kanana ena latana dekenai.” Hamo ena tubuna mero ta Nimiroda danu be gwau-edeede tauna ai ia lao. Ia be Dirava momokanina Iehova ia dadaraia, bona taunimanima ia hamaoroa hanua ladana Babela ai kohoro ta do idia haginia, unai amo sibona edia ladana  do idia abia isi. Unai kara dainai Sema bona ena tamana edia hemami be edena bamona?​—Genese 9:25; 10:6-10; 11:4, 5.

Idia lalohisihisi bada. To idia sibona lasi, Iehova danu be ia lalohisihisi bada. Oi diba Iehova be dahaka ia karaia?​— Ia ese taunimanima edia gado ia haidaua dainai idia ta ta be edia hereva idia lalopararalaia lasi. Unai dainai taunimanima be unai kohoro haginia gaukarana idia rakatania, bona edia gado idia herevalaia taudia ida gabu haida dekenai idia lao. (Genese 11:6-9) To, Dirava ese Sema bona ena ruma bese taudia edia gado ia haidaua lasi. Unai amo idia be do idia noho hebou bona ta ta do idia durua Iehova idia hesiai henia totona. Oi laloa Sema be lagani hida lalonai Iehova ia hesiai henia?—

Sema ena mauri lagani ibounai be 600. Abata ia do vara lasi neganai iena mauri lagani be 98, bona abata murinai ia be ma lagani 502 ia noho. Ita gwau diba ia be Noa ia durua lagatoi idia karaia totona, bona abata do ia vara herevana be taunimanima dekenai ia harorolaia. To, oi laloa Sema be abata murinai lagani 500 mai kahana ia noho lalonai, dahaka ia karaia?​— Noa ese Iehova ia gwauraia “Sema ena Dirava.” Reana Sema be Iehova ia hesiai henia noho bona ena ruma bese taudia ia durua idia danu be unai bamona idia karaia totona. Gabeai Aberahamo, Sara bona Isako be Sema ena tubuna ai idia lao.​—Genese 9:26; 11:10-31; 21:1-3.

Mani oi laloa, Sema ena nega amo ema bona hari, kara dika be ia bada daekau noho. Inai tanobada dekenai dahaka do ia vara?​— Baibel ia gwau “kahirakahira do [ia]ore.” To mani inai gwauhamata oi laloa: “Dirava ena ura ia karaia noho tauna be do ia noho ela bona hanaihanai.” Unai dainai bema ita be Dirava ena ura ita karaia, reana do ita roho mauri bona Dirava ena tanobada matamatana lalonai do ita vareai. Bena Dirava ena heduru dainai ita be mai moale ida tanobada ai do ita noho ela bona hanaihanai!​—1 Ioane 2:17; Salamo 37:29; Isaia 65:17.