Dirava Ena Hereva Amo Diba Abia

Dahaka Dainai Keristani Taudia Idia Bapatiso?

Inai atikol lalonai, reana oi gwauraia vadaeni henanadai haida idia noho bona emu Baibel ai edia haere do oi davaria dalana, ia hahedinaraia. Iehova ena Witnes taudia be mai edia moale ida oi dekenai unai henanadai do idia haerelaidia.

1. Keristani bapatiso ena anina be dahaka?

Ta ia bapatiso neganai ia hahedinaraia ia ura Dirava ia tura henia namonamo. Unai dainai, Keristani tauna be ia beibi neganai do ia bapatiso lasi, to namona be ena mauri lagani ia hegeregere Dirava do ia dibaia bona Iesu ena hahediba tauna ai ia lao. (Kara 8:12; 1 Petero 3:21) Iesu ena hahegani ita dibaia bona badinaia neganai, iena hahediba taudia ai ita lao.​—⁠Mataio 28:19, 20 duahia.

Iesu ena aposetolo taudia edia negai, taunimanima momo be Dirava bona Iesu idia dibaia bona kara ta idia karaia haraga. Hegeregere, tau ta ia diba Iesu ena mase ese hahemauri dalana ia kehoa neganai, maoromaoro hahediba tauna ta ai ia lao. Hari, kudou-maoro taudia momo be Iesu ena hahediba taudia ai idia lao.​—⁠Kara 8:26-31, 35-38 duahia.

2. Dahaka dainai Iesu ia bapatiso?

Iesu ena mauri lagani be 30 neganai, Ioane Bapatiso ese Ioridane Sinavaina ai ia bapatisoa. Iesu ena bapatiso karana ese ia hahedinaraia, ena lalona ia hadaia Dirava ena ura ia karaia totona. (Heberu 10:7) Danu ia hahedinaraia, ia ese ena mauri be boubou gauna bamona do ia henia kara dika taudia totona. Tanobada dekenai ia do mai lasi neganai, Iesu be hanaihanai ena Tamana, Iehova, ia lalokau henia bona ena ura ia karaia.​—⁠Mareko 1:9-11; Ioane 8:29; 17:5 duahia.

  3. Dahaka dainai Keristani tauna ia bapatiso be namo?

Ita be Iesu hegeregerena lasi badina ita be kara dika taudia. To, Iesu ena mase ese dala ia kehoa Dirava ita tura henia namonamo totona. (Roma 5:10, 12; 12:1, 2) Ita be Dirava ena natudia ai ita lao diba. (2 Korinto 6:18) Edena dala ai? Ta be guriguri amo Iehova dekenai ena mauri ia gwauhamatalaia, iena ura ia karaia hanaihanai totona. Bena taunimanima vairanai ena gwauhamata be bapatiso amo ia hahedinaraia.​—⁠Mataio 16:24; 1 Petero 4:2 duahia.

4. Edena dala ai bapatiso totona oi hegaegae diba?

Iehova ena Witnes taudia be Dirava kahirakahira idia ura lao taudia ida Baibel idia stadilaia. Baibel stadilaia bona Keristani heboudia lao henia karana ese emu lalokau bona abidadama Dirava dekenai do ia hagoadaia. Danu, oi do ia durua kara namodia oi karaia totona. Lalokau, abidadama bona Dirava hamoalea karadia ma haida ese oi do idia durua, emu gwauhamata hegeregerena Iehova oi hesiai henia hanaihanai totona.​—⁠Ioane 17:3; Heberu 10:24, 25 duahia.

Diba ma haida abia totona, inai buka ena karoa 18 itaia. Iehova ena Witnes taudia ese idia karaia. Baibel Be Dahaka ia hadibaia?