Lik 22:1-71
-
Prèt yo fè konplo pou yo touye Jezi (1-6)
-
Preparasyon pou dènye fèt Pak la (7-13)
-
Soupe Seyè a (14-20)
-
“Moun k ap trayi m nan ansanm avè m sou tab la” (21-23)
-
Gwo diskisyon pou yo konnen kiyès nan yo ki pi enpòtan (24-27)
-
Jezi fè yon alyans ak apot li yo pou yon wayòm (28-30)
-
Jezi fè konnen Pyè pral nye l (31-34)
-
Enpòtans pou nou pare; de epe (35-38)
-
Priyè Jezi te fè sou Mòn Oliv la (39-46)
-
Yo arete Jezi (47-53)
-
Pyè nye Jezi (54-62)
-
Yo pase Jezi nan rizib (63-65)
-
Yo jije Jezi devan Sanedren an (66-71)
22 Twouve, fèt Pen san ledven an, fèt yo rele fèt Pak la+, te prèske rive+.
2 Epi, prèt an chèf yo ak espè nan Lalwa yo t ap chèche yon bon mwayen pou yo elimine l+, paske yo te pè pèp la+.
3 Lè sa a, Satan antre nan Jida, li menm yo rele Iskaryòt la, ki te fè pati 12 apot yo+.
4 Konsa, Jida al pale ak prèt an chèf yo ansanm ak chèf gad yo ki t ap veye tanp lan sou fason pou l livre l ba yo+.
5 Yo kontan lè yo tande sa e yo antann yo pou yo ba l lajan*+.
6 Li dakò e li kòmanse chèche yon bon okazyon pou l livre l ba yo san pa gen foul moun ki la.
7 Kounye a, jou fèt Pen san ledven an rive. Se jou sa a yo dwe touye bèt y ap bay kòm sakrifis pou fèt Pak la+.
8 Donk, Jezi voye Pyè ak Jan, li di yo: “Al prepare manje Pak la pou nou pou n manje+.”
9 Yo di l: “Ki kote w vle nou prepare l?”
10 Li di yo: “Gade! Lè nou antre nan vil la, gen yon mesye k ap pote yon krich dlo k ap vin rankontre ak nou. Suiv li al nan kay kote l antre a+.
11 E di mèt kay la: ‘Anseyan an voye mande w: “Kote pyès pou m manje manje Pak la avèk disip mwen yo ye la a?”’
12 Epi, l ap montre nou yon gwo pyès aletaj ki tou pare. Prepare manje Pak la la.”
13 Konsa, yo ale e yo jwenn tout bagay jan l te di yo a, e yo fè preparasyon pou fèt Pak la.
14 Se sa k fè, lè lè a rive, li chita bò tab la ansanm ak apot yo+.
15 Epi, li di yo: “Se pa ti anvi mwen te anvi manje manje Pak sa a ansanm avèk nou anvan m soufri.
16 Paske, m ap di nou sa: Mwen pap manje l ankò jiskaske tout sa ki gen rapò avè l akonpli nan Wayòm Bondye a.”
17 Apre sa, yo ba l yon koup, li pran l, li di Bondye mèsi, epi li di: “Pran l, bwè ladan l, e pase l youn bay lòt.
18 Paske, m ap di nou sa: Apati kounye a, mwen pap bwè bwason ki fèt ak rezen ankò jiskaske Wayòm Bondye a vini.”
19 Epi, li pran yon pen+, li di Bondye mèsi, li kase l, li ba yo l, e li di: “Sa a reprezante kò m+ mwen pral bay pou nou+. Kontinye fè sa pou nou montre nou sonje m+.”
20 Apre yo fin soupe, li fè menm bagay la ak koup la tou, li di: “Koup sa a reprezante nouvo alyans lan+ ki fèt grasa san m+ ki gen pou koule pou nou+.
21 “Men, gade! moun k ap trayi m nan ansanm avè m sou tab la+.
22 Paske, vrèmanvre, Pitit lòm nan prale jan sa te deside a+. Men, malè pou moun sa a ki livre l la+!”
23 Epi, yo kòmanse ap pale youn ak lòt pou yo konnen kiyès nan yo ki t apral fè sa+.
24 Twouve, yo te pete yon gwo diskisyon tou pou yo konnen kiyès nan yo ki pi enpòtan+.
25 Men, li di yo konsa: “Wa nasyon yo domine sou moun yo, e moun ki gen otorite sou yo, yo rele yo “papa bon kè”+.
26 Men nou menm, nou pa dwe konsa+. Okontrè, moun ki pi enpòtan pami nou an dwe vin tankou moun ki gen mwens enpòtans lan+, e moun k ap dirije a dwe vin tankou moun k ap sèvi a.
27 Paske, kiyès ki pi enpòtan, moun k ap manje a* oswa moun k ap sèvi a? Èske se pa moun k ap manje a*? Epoutan, mwen menm, mwen nan mitan nou antanke moun k ap sèvi nou+.
28 “Men, se nou menm ki te toujou la avè m+ nan eprèv mwen yo+.
29 Se poutèt sa, menm jan Papa m fè yon alyans avèk mwen pou yon wayòm, mwen fè yon alyans avèk nou tou pou yon wayòm+,
30 dekwa pou nou ka manje e pou nou ka bwè sou tab mwen nan Wayòm mwen an+ e pou nou ka chita sou twòn+ pou nou jije 12 tribi Izrayèl yo+.
31 “Simon, Simon, koute! Satan mande pou l vannen nou tout tankou ble y ap vannen+.
32 Men, mwen sipliye Bondye pou ou pou lafwa w pa febli+. E ou menm, yonfwa w retounen, bay frè w yo fòs+.”
33 Lè sa a, Pyè di l: “Seyè, mwen pare pou m al nan prizon avè w e pou m mouri avè w+.”
34 Men, Jezi di: “Pyè, m ap di w sa: Anvan yon kòk chante jodi a, w ap gentan di ou pa konnen m twa fwa+.”
35 Epitou, li di yo: “Lè m te voye nou san bous, san sak pou pwovizyon, san sandal la+, èske nou te manke yon bagay?” Yo di: “Non!”
36 Lè sa a, li di yo: “Men, kounye a, se pou moun ki gen yon bous pran l e se pou l pran yon sak pou pwovizyon tou. E si yon moun pa gen epe, se pou l vann rad li pou l achte youn.
37 Paske, m ap di nou sa: Sa ki ekri a, sa vle di pawòl ki di: ‘Yo te mete l pami moun ki san lwa yo’ dwe reyalize sou mwen+. Paske, sa ki ekri sou mwen yo ap reyalize+.”
38 Epi, yo di: “Seyè, gade! gen de epe la a.” Li di yo: “Sa sifi.”
39 Lè l sot deyò, li ale sou Mòn Oliv jan l abitye fè sa, e disip yo suiv li+.
40 Lè l rive la, li di yo: “Kontinye priye dekwa pou nou pa tonbe nan tantasyon+.”
41 Li deplase al yon tikras pi lwen yo, nan distans yon moun ka voye yon wòch konsa, epi li met ajenou, li kòmanse priye.
42 Li di: “Papa, si se volonte w, retire koup sa a devan m. Sepandan, se pa volonte pa m ki pou fèt, men se volonte pa w+.”
43 Lè sa a, yon zanj sot nan syèl la, li parèt devan l, e zanj lan ba l fòs+.
44 Men, Jezi vin tèlman boulvèse, sa te fè l kontinye priye pi rèd toujou+. Swè l te vin tounen gout san k ap tonbe atè.
45 Lè l fin priye, li ale bò kote disip yo, li jwenn yo ap kabicha, e yo te faya akoz lapenn yo genyen+.
46 Li di yo: “Poukisa n ap dòmi? Leve e kontinye priye pou nou pa tonbe nan tantasyon+.”
47 Li potko menm fin pale, gen yon foul moun ki parèt, e mesye ki te rele Jida a, youn nan 12 apot yo, te alatèt yo. Li pwoche bò kot Jezi, li bo l+.
48 Men, Jezi di l: “Jida, se avèk yon bo w ap trayi Pitit lòm nan?”
49 Lè mesye ki te ansanm ak Jezi yo wè sa k t apral rive a, yo di: “Seyè, èske nou mèt voye kout epe?”
50 Gen youn nan yo ki menm bay esklav gran prèt la yon kout epe, li koupe zòrèy dwat li+.
51 Men, Jezi reponn, li di: “Sa sifi!” Epi, li manyen zòrèy la e li geri esklav la.
52 Apre sa, Jezi di prèt an chèf yo ak chèf gad yo ki t ap veye tanp lan ak ansyen ki te vin pran l yo: “Apa nou vin ak epe ak baton kòmsi se dèyè yon vòlè nou vini+!
53 Lè m te nan tanp lan avèk nou chak jou+, nou pa t met men sou mwen+. Men, kounye a se lè pa nou e se lè pou fènwa dirije+.”
54 Epi, yo arete l, yo ale avè l+ e yo mennen l kay gran prèt la. Men, Pyè t ap suiv yo nan yon distans+.
55 Yo limen yon dife nan mitan lakou a, yo chita ansanm, e Pyè vin chita nan mitan yo+.
56 Men, gen yon sèvant ki wè Pyè chita bò dife a ki te byen klere, li gade l byen gade, epi li di: “Mesye sa a te avè l tou.”
57 Men, Pyè nye sa, li di: “Mwen pa konnen l, madanm.”
58 Apre yon ti tan, gen yon lòt moun ki wè l e ki di: “Ou menm tou, ou se youn nan yo.” Men, Pyè di: “Mesye, mwen pa youn nan yo+.”
59 Apre anviwon inèdtan, gen yon lòt mesye ki parèt e ki pèsiste ap di: “Se sèten mesye sa a te avè l tou. Dayè, se moun Galile li ye!”
60 Men, Pyè di: “Mesye, mwen pa konn sa w ap di a.” Epi, menm kote a, li potko menm fin pale, yon kòk chante.
61 Lè sa a, Seyè a vire, li gade Pyè fiks, e Pyè sonje pawòl Seyè a te di a: “Anvan yon kòk chante jodi a, w ap nye m twa fwa+.”
62 Epi, li sot deyò a, li kriye anpil.
63 Kounye a, mesye ki t ap veye Jezi yo kòmanse pase l nan rizib+, yo ba l kou+.
64 Apre sa, yo kouvri figi l e yo kontinye di l: “Si w se yon pwofèt, di nou kiyès ki frape w la a?”
65 Epi, yo t ap di anpil lòt pawòl kont li pou manke l dega.
66 Lè l fè jou, asanble ansyen yo ki gen ladan l prèt an chèf yo ak espè nan Lalwa yo reyini+, e yo mennen l anndan sal Sanedren an, yo di:
67 “Di n si w se Kris la+.” Men, li di yo: “Menmsi mwen ta di nou sa, nou pa t ap janm kwè.
68 Epitou, si m ta poze nou kesyon, nou pa t ap reponn.
69 Sepandan, apati kounye a, Pitit lòm nan+ pral chita adwat Bondye ki gen pisans+.”
70 Lè yo tande sa, yo tout di: “Ebyen, ou se Pitit Bondye a?” Li di yo: “Se nou menm ki di se sa m ye.”
71 Yo di: “Ki lòt temwayaj nou bezwen ankò? Paske, nou tande l di sa ak bouch li+.”
Nòt anba paj
^ Lit.: “ba l pyès monnen ann ajan”.
^ Oswa: “moun ki bò tab la”.
^ Oswa: “moun ki bò tab la”.
