ORUPA 1
“Ami me kapaha ozonḓu inḓa nḓa pandjara”
Ripura nonḓu ndja pandjara. Oyo ya poka kozongwao ngunda amai ri ehozu. Nambano kai nokumuna ozonḓu ozongwao poo nandarire ingwi omurise. Nu nai maku yende amaku zorere. Poṋa pu ya pandjarere pe kara ovipuka ovinyondorore nu kamaai yenene okurivatera. Korusenina, oyo ai zuu eraka ndu mai tjiwa nawa, eraka romurise wayo. Eye wa utuka okuya konḓu, e i toora, e i manga mombanda ye ne i twara konganda.
POVIKANDO ovingi, Jehova u ri sasaneka nomurise otja ingo. Eye u tu kwizikira mEmbo re kutja, “Ami omuini me paha ozonḓu zandje nu me rikendere zo.”—Esekiel 34:11, 12.
“Orupanda rwandje ndu mbi risa”
Oowaṋi mbe ri ozonḓu zaJehova? Okuhungira oukahu, ozonḓu zaJehova ovandu mbe mu suvera nu mbe mu karera. Ombeibela i tja: “Indjeye tu rikote nokurikotamena ku Ye; ngatu wore ozongoro komurungu waMuhona, Omuute wetu. Orondu Eye ongu ri Ndjambi wetu, neṱe oweṱe otjiwaṋa tje risa, norupanda ndu hongorerwa i eke re.” (Epsalme 95:6, 7) Ovakarere vaJehova ve nonḓero yokukongorera Omurise wawo, tjimuna ozonḓu tji ze kongorera omurise wazo. Owo ovandu mbe ha tjiti ouvi po? Kako. Povikando tjiva, ovakarere vaMukuru ve rira ‘ozonḓu nḓa rimbara,’ ‘nozonḓu nḓa pandjara.’ (Esekiel 34:12; Mateus 15:24; 1 Petrus 2:25) Nandarire kutja omundu wa humburuka kokure na Jehova, Eye aruhe u kara nomaundjiro wokutja omundu ngo ma kotoka ku ye.
Ove u muna kutja Jehova ngamba Omurise woye? Omomiano viṋe ndino Jehova me raisa kutja eye Omurise omuwa? Tara komiano 3 eye me tjita nao:
Eye u tu pa ovikurya vyombepo. Jehova ma tja: “Me kezerisira komaryo wozondundu ku ku hi nooma, na momikutu na mehi arihe rondjoura.” (Esekiel 34:14) Jehova aruhe u tupa ovikurya vyombepo mbi tu kovisa moruveze ndu ri rwo. Ove wa rora okulesa embo, okupuratena kehungi nda yandjwa mombongo poo okutara okavidio ku ka zira ongumbiro yoye? Otjiṋa hi tje ku pa ongamburiro yokutja Jehova u rikendera kove?
Eye u tu tjevera nokutupa omasa. Jehova ma kwizike nai: “Ami me kapaha ozonḓu inḓa nḓa pandjara, e kakotora inḓa nḓa pizuka, e panga inḓa oviṱeṱu nu e verukisa inḓa nḓa vera.” (Esekiel 34:16) Jehova u yanḓiparisa imba mba ngundiparisiwa i ozongendo. Eye u panga ozonḓu inḓa oviṱeṱu mokuverukisa imba mba hihamisiwa, ngahino i ovakambure ovakwao. Nu u kotora imba mba pandjara nu mbu mape ya ave kondjisiwa i omeripura omavi.
Jehova ma tja: ‘Ami me ze kotora okuza koṋa akuhe ku za rimbara.’ Okuzambo a tja: “Ami me kapaha ozonḓu inḓa nḓa pandjara.” (Esekiel 34:12, 16) Jehova kavara onḓu ndja pandjara otjomundu ngu hina maa karunduruka. Eye u tjiwa indu onḓu tji i he ri po, u paha onḓu ndjo nu tje i munu u kara nondjoroka. (Mateus 18:12-14) Eye opezokuisana ovakarere ve vatjiri “ozonḓu zandje, orupanda rwandje ndu mbi risa.” (Esekiel 34:31) Ove oove umwe wozonḓu nḓo.
Jehova kavara onḓu ndja pandjara otjomundu ngu hina maa karunduruka. Eye u kara nondjoroka indu onḓu ndjo tji ya munika
“Tjita kutja omayuva wetu ye sane ku inga omakuru”
Ongwaye Jehova tji me ku paha nokukuningira kutja u kotoke ku ye? Mena rokutja eye u vanga kutja ove u rire omuṋingandu. Eye ma kwizikire ozonḓu ze kutja “me kezesera ondaya nokukezerokisira ombura onamasa.” (Esekiel 34:26) Omakwizikiro nga maye yenenisiwa. Otja tji mo tjiwa rukuru, omakwizikiro waJehova ye rira ouatjiri.
Ripura noruveze ndu wa uta okutjiwa Jehova. Okutara kotjihorera, ove wa ri noumune uṋe indu tji we rihonga otjikando otjitenga ouatjiri ohunga nena raMukuru nondando ye kovandu? Mozemburuka ondjoroka ndji wa ri na yo indu tji wa ri pu novakambure ovakweṋu pomaworonganeno omanene na inga owotukondwa? Indu tjoo yenene okuzuvarisa, ove wa ri noumune uṋe tji wa zuvarisa ombuze ombwa komundu ngwa raisa onḓero yatjiri?
Mo yenene okukara nondjoroka ndjo rukwao. Ovakarere vaMukuru voruveze orukuru va kumba nave tja: “Tu kotora kOve, Jehova! Neṱe matu kotoka kove. Tjita kutja omayuva wetu ye sane ku inga omakuru.” (Omiimbo vyOruhoze 5:21, NW) Jehova wa zira ongumburo ndjo nu otjiwaṋa tje tja kotoka na tji utu okumukarera nondjoroka onene. (Nehemia 8:17) Jehova wina ma zuvire ozongumbiro zoye.
Posi yokutja okukotoka ku Jehova katjiṋa otjipupu. Ngatu tare komauzeu tjiva nge tjaera omundu okukotoka ku Jehova nokutja ove mo yenene vi okutuurunga wo.
