“Tji mamu kumbu, amu uondjorora.”—Mateus 6:7, EEP.

Jehova ka vanga kutja tu yarukire po ozongumbiro nḓu twe rihonga motjiuru poo tu lese okuza membo rwozongumbiro. Nungwari, u vanga kutja tu hungire okuza komutima. Ripura uriri kutja ove otjo kara noumune uṋe indu epanga roye tji ri ku raera oviṋa vimwe eyuva arihe. Omapanga omawa ye hungira oupaturuke kumwe nu okuza komutima. Indu tji matu ungurisa omambo wetu oveni okukumba ku Tate wetu womeyuru ku raisa kutja tu mu vara otja epanga.

“Tji mu kumba, kamu pewa, tjinga amu kumba navi.”—Jakobus 4:3.

Eṱe tu tjiwa kutja Mukuru ka ziri ozongumbiro zetu indu tji matu ningire oviṋa mbi matu tjiwa kutja eye ka vanga kutja tu tjite poo tu kare navyo. Otjotjihorera, hapo mape ya Mukuru a zuvire ongumbiro yomundu ngu ndopola nu a kumbu ku Mukuru okumuna ouṋingandu kutja ma taare ovimariva? Mukuru we tu rakiza koviṋa otja imbyo. (Jesaja 65:11; Lukas 12:15) Tjiri Jehova kamaa ziri ozongumbiro otja inḓo. Indu tji matu vanga kutja Mukuru ma zuvire ozongumbiro zetu, eṱe matu sokuningira oviṋa mbi mavi hitasana kuna imbi mbye tu raera mOmbeibela.

 “Ngu ha ṱakamisa omatwako, ongumbiro ye wina ondjaukise ku Ndjambi.”—Omiano 28:9.

Moruveze rOmbeibela, Mukuru kaa zuvire ozongumbiro za imba mbe hina aave ṱakamisa omatwako we. (Jesaja 1:15, 16) Mukuru kaa runduruka. (Maleaki 3:6) Indu tji matu vanga kutja Mukuru ma zuvire ozongumbiro zetu, eṱe matu sokuṱakamisa omatwako we. Nu hapo tjike indu tji twa tjita oviṋa ovivi? Hapo matji hee kutja Mukuru kamaa ka puratena kweṱe? Kako. Norusuvero Mukuru me tu isire tji twa rundurura ongaro yetu nu atu kondjo pu matu yenene okumuyorokisa.—Oviungura 3:19.