Mayuh menyadi amat diperansang lebuh macha artikel ari Ruang Berita pasal bala menyadi kitai ba Rusia ke mengkang tetap ati taja pan disakal. Ba bala menyadi kitai di Timor-Leste, semina bisi tiga iti artikel baka tu ke udah disalin ngagai bansa jaku sida, iya nya jaku Tetun Dili. Siti ari artikel ke udah disalin nya pasal Menyadi Andrey Suvorkov. Semina beberapa hari pengudah artikel nya dikeluarka dalam jaku Tetun Dili, lima iku nembiak ke udah dibaptisa napi siti penguji. Bacha meh jaku sida lebuh sida ngenang, baka ni belematika teladan iya udah ngeringka sida.

Maya gempuru besai ba sekula, sida diasuh nabi bendira. Lebuh sida enggai, sida dibai ngagai pengetua. Iya nasat sida di mua bala pengajar ke bukai. Enggau berani sereta ngayanka basa, sida nerangka ari Bup Kudus kebuah sida ngaga pemutus tu, lalu sida tetap enggai alah tauka nabi bendira nya.

Bala pengajar lalu ngangau polis, lalu polis nya nabanka bala nembiak ke Saksi nya ngagai balai polis, tang enda madahka apai indai sida. Udah nya, polis lalu betalipun ngagai kem soldadu ke semak endur nya lalu minta seiku soldadu datai ngambika bejaku enggau sida bala nembiak. Udah nya, soldadu nya enggau bala polis nguji ngemba sida enggau ngurung sida dalam sil pengelama setengah jam. Indah bisi seiku polis ngengkahka senapang ba mija di mua sida lalu nasatka sida dalam lebih dua jam. Nyau kelama, sida dikemendarka pulai ke rumah.

Lebuh apai indai sida nemu utai ke udah nyadi, sida bejaku enggau bala pengajar sereta bala polis. Tang sakal nya enda ngetu, nyadi sida nulis ngagai bala pegawai perintah ba nengeri nya besebana ke utai ti nyadi. Nyau kelama bala nembiak nya dipejal pindah ngagai sekula bukai.

Tiap iku ari sida nembiak amat beterima kasih laban baru udah macha pasal utai ke nyadi ba Menyadi Andrey Suvorkov. Nya amat nulung sida lebuh nembiak ke serambau enggau sida, bala pengajar enggau piak ti bekuasa nyakal sida.

Noviana Jose do Carmo ngenang: “Kami disakal bala pengajar sereta diburu ari sekula. Tang peneleba Menyadi Andrey nulung aku ngembuan runding ti positif sereta pengaga ati. Kaka iya ke benama Cejiana nambah: “Peneleba Menyadi Andrey ngasuh aku enda irau lebuh napi peguji.” Ruth Ximenes madahka peneleba Andrey pan nulung iya “enda putus pengarap.”

Ananda Maria Delavega nerangka, “Teladan Menyadi Andrey ti bepanggai ngagai Jehovah, meransang aku manggaika diri ba Iya nengah sampi,” kelebih agi maya napi sakal.

Roni da Cruz madah: “Laban aku nemu Jehovah nyukung semua bala menyadi di serata dunya, aku andal agi Jehovah bisi enggau aku, lalu aku enda ibuh takut.”

Apai indai sida mega beterima kasih ke artikel ti dikeluarka ba Ruang Berita.

Indai Ruth, Menyadi Anita Ximenes, seiku indai tunggal ke bisi tiga iku anak indu. Endang amat, iya takut sereta irau lebuh tedingaka orang ke diau semak iya nyebut: “Aram nyamah sida ke mudi!” Taja pia, Anita madah: “Lebuh aku ingatka pasal bala menyadi ba Rusia ke bediri ba mua bala hakim enggau berani, nya pan ngasuh aku berani. Aku ulih ngena teladan sida ngambika ngajar bala anak indu aku. Kami menyanak nemu Jehovah nya Apai kami, lalu Iya seruran bisi enggau kami.”

Baka bala menyadi kitai ke agi biak enggau apai indai sida ba Timor-Leste, kitai mega dikeringka lebuh belematika chunto menyadi kitai ti berani, ke “lebih ari pemenang” taja pan disakal.—Rome 8:37.