TULUNG KE DIRI SEBILIK
Chara Nagang Pengeringat
Uji gambarka enti kaling nuan nyebut tauka ngereja sesiti utai ti ngasuh nuan ringat. Nuan nguji deka ngelalaika asai ati diri. Iya engka ulih ngasaika bisi utai ti enda ngena pasal nuan lalu berengkah nanya mayuh utai. Tu ngasuh nuan majak ringat. Baka ni nuan ulih nagang pengeringat diri ba pekara tu?
Nama utai ke patut ditemu nuan
Pengeringat ulih ngachau pengerai nuan. Bisi pansik nunjukka pengeringat ti enda ditagang ulih ngasuh darah tinggi, penanggul ba jantung, balat tusah ati, sereta bisi penanggul ba perut. Kelimpah ari nya, pengeringat mega ulih ngasuh tusah tinduk, irau, penanggul ba kulit, enggau strok. Nya meh kebuah Bup Kudus madah ke kitai, “Anang ringat . . . , laban . . . ngujung ngagai penyai.”—Masmur 37:8.
Ngelalaika asai ati ti ringat mega mai penusah. Pengeringat ti dilalaika ulih ngujungka nuan nyadi orang ti ngembuan runding ke negatif sereta selalu mutap. Ulah ti baka nya ngasuh nuan tusah dikesayauka lalu ulih ngachau tikah nuan.
Nama utai ke patut digaga nuan
Giga pemanah kaling nuan. Liska tiga iti pekara ti dikerindu pasal kaling nuan. Enti sema dudi hari iya ngasuh nuan ringat, kingatka pemanah iya ke udah ditulis nuan nitihka lis nya. Tu ulih nulung nagang pengeringat nuan.
Prinsip Bup Kudus: “Seruran beterima kasih.”—Kolosi 3:15.
Belajar ngampunka dosa. Keterubah, uji meretika kaling nuan. Tu nulung nuan nemu pasal asai ati iya lalu ngayanka penyiru. (1 Peter 3:8) Udah nya, tanya diri empu, “Kati aku patut balat ringat nyentukka enda ulih ngampunka iya?”
Prinsip Bup Kudus: “Orang ke mereti . . . enda bedulika penyalah nya.”—Jaku Dalam 19:11.
Pansutka asai ati nuan enggau manah sereta enda ngemediska ati. Kena meh jaku ke mai nuan empu ba randau nya. Ngambika chunto, anang nyebut, “Nuan enda ngira aku laban enda telipun lalu madahka kini ke penunga nuan.” Tang, nuan ulih nyebut, “Aku irau meda nuan enda telipun laban udah laun. Aku irau endaika bisi nama-nama.” Bebendar meh mansutka asai ati nuan enggau chara ti manah.
Prinsip Bup Kudus: “Awakka jaku kita seruran badas sereta ngenyamaika ati.”—Kolosi 4:6.
Dinga enggau manah. Pengudah nuan mansutka asai ati, awakka kaling nuan mega bejaku lalu anang nyelepak maya iya benung bejaku. Pengudah iya abis bejaku, ulang baru jaku ke udah disebut iya enggau ngelansa kena nunjukka nuan nemu asai ati iya. Tu nulung nuan nagang pengeringat diri.
Prinsip Bup Kudus: “Jampat mending, lubah mansutka jaku.”—James 1:19.