Josua 1:1-18
1 Pengudah nembiak Jehovah ke benama Moses mati, Jehovah bejaku ngagai Josua* anak Nun. Josua tu penulung Moses. Ku Iya madah ngagai Josua:
2 “Nembiak Aku, Moses, udah nadai. Nya alai, nuan enggau semua orang Israel patut besedia. Alai kita meraka Sungai Jordan lalu mansang ngagai menua ke deka diberi Aku ngagai orang Israel.
3 Baka ke udah disemayaka Aku ngagai Moses, tiap iti endur ke ditengah kita deka diberi Aku ngagai kita.
4 Menua kita deka berengkah ari menua puang lalu niki ke atas ngagai Lebanon, lalu udah nya ngagai Sungai Eupratis ti besai nyentuk ngagai Tasik Tengah* ba barat. Semua menua orang Het mega deka diempu kita.
5 Ba sepemanjai pengidup nuan, nadai siku pan orang ulih ngalahka nuan. Aku deka terus enggau nuan baka Aku ke udah enggau Moses. Aku enda sekali-kali deka ninggalka nuan tauka ngelengkaka nuan.
6 Nuan mesti berani sereta kuat laban nuan ke deka ngiring sida ngagai menua ke udah disemaya Aku ngagai aki ini sida. Aku deka meri menua nya ngagai sida.
7 “Nuan mesti berani sereta kuat lalu titihka semua utai ba Adat ke udah dipadahka nembiak Aku, Moses, ngagai nuan. Anang limpang ari Adat nya ke kiba tauka ke kanan, ngambika nuan pintar ngereja utai ba sebarang endur ke dituju nuan.
8 Anang badu bejaku pasal bup Adat nya. Siang enggau malam, nuan patut macha bup Adat nya lalu berundingka iya enggau dalam.* Enggau nya, nuan deka nitihka semua utai ke ditulis ba bup nya. Nya baru nuan deka mujur lalu ngereja semua utai enggau pintar.
9 Sekali agi Aku madahka nuan, nyadi meh berani sereta kuat. Anang meh takut tauka lemi semengat laban Aku, Jehovah, Petara nuan. Aku deka enggau nuan enda ngira kini ke penunga nuan.”
10 Udah nya, Josua lalu madahka ngagai bala tuai orang Israel:
11 “Alai kita mansang ngagai semua kem lalu padahka tu ngagai semua orang: ‘Sediaka utai ke diguna kita, laban dalam tiga hari da agi kita deka meraka Sungai Jordan. Kita deka ngambi menua ke diberi Jehovah, Petara kita, ngagai kita.’”
12 Udah nya, Josua bejaku ngagai raban bansa Reuben, Gat, enggau setengah ari raban bansa Manasi:
13 “Kingatka utai ke dipadah Moses, nembiak Jehovah, ngagai kita: ‘Petara kita Jehovah deka meri kita menua tu ngambika kita ulih diau lantang dia.
14 Bini enggau anak kita sereta jelu tupi kita deka diau ba sepiak tu,* laban tu meh endur ke diberi Moses ngagai kita. Semua kita bala soldadu ti kering patut besedia deka belaban. Kita deka meraka Sungai Jordan dulu agi ari bala menyadi kita ke bukai. Kita mesti nulung bala menyadi kita
15 nyentukka Jehovah meri sida endur diau ti lantang, baka ke udah diberi Iya ngagai kita. Pengudah sida ngambi endur ke diberi Petara Jehovah ngagai sida, nya baru kita ulih pulai kitu ngagai sepiak timur Sungai Jordan, ngagai endur ke diberi Moses, nembiak Jehovah, ngagai kita.’”
16 Sida lalu nyaut Josua: “Kami deka ngereja semua utai ke dipadah nuan lalu mupuk ngagai sebarang endur ke diasuh nuan.
17 Kami deka ngasika nuan baka kami ke udah ngasika semua utai ti dipadah Moses. Arapka Jehovah, Petara nuan, terus enggau nuan baka Iya ke udah enggau Moses.
18 Enti bisi orang ngelaban nuan lalu enda ngasika utai ke dipadah nuan, iya patut dibunuh. Nuan mesti berani sereta kuat.”
Nota Kaki
^ Tauka “Jehosua,” ke mai reti “Jehovah Nya Penyelamat.”
^ Iya nya, Tasik Mediterranean.
^ Tauka “macha bup Adat nya enggau nyawa ti mit.”
^ Iya nya, timur Sungai Jordan.
