Pemansut 33:1-23
33 Ku Jehovah bejaku ngagai Moses: “Mupuk nuan enggau orang ke dibai nuan pansut ari menua Ejip ari endur tu. Kita mesti mupuk ngagai menua ke udah disemayaka Aku ngagai Abraham, Isak, enggau Jakop. Aku udah besemaya deka meri menua nya ngagai peturun sida.
2 Aku deka ngasuh siku melikat bejalai dulu ari kita. Aku mega deka muru orang Kanaan, orang Amor, orang Het, orang Peris, orang Ibi, enggau orang Jebus.
3 Alai kita mupuk ngagai menua ke kaya enggau ai tusu sereta madu. Tang Aku enda mupuk enggau kita, laban kita orang ke degil, enggaika Aku ngemunaska kita ba rantau jalai.”
4 Pengudah orang Israel ninga berita ti enda manah nya, sida balat tusah ati. Nadai siku pan sida bekenaka barang kena ngias diri.
5 Ku Jehovah bejaku ngagai Moses: “Padahka tu ngagai orang Israel: ‘Kita tu orang ke degil. Aku ulih datai ngagai kita lalu terus ngemunaska kita tekala nya. Nya alai, anang bekenaka barang kena ngias diri, laban Aku agi berundingka nama utai ke ka digaga Aku ngagai kita.’”
6 Kenyau ari sida iya ba Gunung Horeb, sida enda agi bekenaka barang kena ngias diri.
7 Udah nya, Moses lalu ngambi langkau kain iya lalu nirika langkau kain iya ba luar kawasan kem orang Israel, iya nya enda jauh ari kawasan kem sida. Iya ngangauka langkau kain nya langkau gempuru. Enti bisi orang deka minta iring ari Jehovah, orang nya mesti mansang ngagai langkau gempuru nya.
8 Tiap kali Moses bejalai ngagai langkau kain nya, semua orang Israel deka bediri ba pintu penama langkau kain sida. Sida deka meda Moses sampai Moses tama ngagai langkau kain nya.
9 Pengudah Moses tama ngagai langkau kain nya, tiang remang* deka nurun lalu ngetu ba pintu penama langkau kain nya lebuh Petara bejaku enggau Moses.
10 Lebuh orang Israel meda tiang remang ngetu ba pintu penama langkau kain nya, sida lalu besugang ba pintu penama langkau kain sida.
11 Jehovah bejaku betunga mua enggau Moses, baka orang ke bejaku enggau kaban diri. Lebuh Moses pulai baru ngagai kawasan kem, penulung iya, iya nya Josua anak Nun, enda mindah ari langkau kain nya.
12 Moses madah ngagai Jehovah: “Nuan madah ngagai aku: ‘Iring meh orang tu,’ tang Nuan bedau madah ngagai aku sapa ke deka mupuk enggau aku. Nuan mega madahka: ‘Aku amat ngelala nuan,* lalu nuan udah ngelantangka ati Aku.’
13 Enti Nuan amat-amat lantang ati enggau aku, ajar meh aku jalai Nuan ngambika aku ulih ngelala Nuan sereta terus ngelantangka ati Nuan. Kingatka meh bansa tu nembiak Nuan.”
14 Ku Petara bejaku: “Aku Empu deka mupuk enggau nuan, lalu Aku deka meri nuan pengelantang.”
15 Udah nya, Moses bejaku ngagai Petara: “Enti Nuan enggai mupuk enggau kami, anang ngasuh kami mupuk ari endur tu.
16 Enti Nuan enda enggau kami, baka ni orang deka nemu Nuan lantang ati enggau aku sereta bala nembiak Nuan? Tang enti Nuan enggau kami, nya baru orang deka nemu aku enggau bala nembiak Nuan tu bebida ari bansa bukai ba dunya tu.”
17 Ku Jehovah bejaku ngagai Moses: “Aku deka ngereja utai ke dipinta nuan, laban Aku ngelala nuan lalu nuan udah ngelantangka ati Aku.”
18 Moses madahka: “Pandangka mulia Nuan ngagai aku.”
19 Tang ku Petara madahka: “Aku deka ngasuh nuan meda semua pemanah Aku, lalu Aku deka madahka nama Aku, Jehovah, ngagai nuan. Aku deka manah enggau orang ke ngelantangka ati Aku, lalu Aku deka kasihka sapa-sapa ke dipilih Aku.”
20 Ku Petara nampung baru jaku Iya: “Nuan enda tau meda mua Aku, laban enti orang meda mua Aku, orang nya tentu deka mati.”
21 Ku Jehovah bejaku baru: “Bisi siti endur ke semak enggau Aku. Bediri ba atas batu ke bisi ba dia.
22 Aku deka ngengkahka nuan ba rekah batu nya. Lebuh mulia Aku mansa, Aku deka ngelindung nuan ngena jari Aku.
23 Pengudah mulia Aku mansa, Aku deka ngangkatka jari Aku lalu nuan deka meda belakang Aku. Tang nuan enda tau meda mua Aku.”
