PENGIDUP mensia kemayaharitu enda sama baka tuju asal Petara. Kebendar iya, dunya patut penuh enggau orang ke nunduk ngagai Petara, deka diiring Iya, sereta nunda teladan Iya ti manah. Petara deka mensia bisi ruang bilik lalu gaga ati begulai enggau pangan diri, belajarka utai ti baru, sereta ngaga dunya tu nyadi paradais.

• “Iya ngasuh perang badu agi nyadi di serata dunya.”​—Masmur 46:9.

• “Nuan datai . . . ngerusak sida ke nyadi pengerusak dunya!”​—Pemandang 11:18.

• “Nadai orang . . . deka mutap madahka diri sakit.”​—Isaiah 33:24.

• “Sida deka lantang ati bekenaka utai ti udah ulih sida.”​—Isaiah 65:22.

Baka ni semaya Bup Kudus tu deka dikeamatka? Petara udah milih Anak Iya, Jesus, nyadi Raja siti perintah ti sempurna ke deka merintah dunya ari serega. Bup Kudus ngumbai tu Perintah Petara. (Daniel 2:44) Bup Kudus madahka pasal Jesus: ‘Petara deka meri iya kerusi diraja, lalu iya deka merintah.’—Luke 1:32, 33.

Maya ba dunya, Jesus ngaga mayuh kereja ajih. Tu nunjukka maya Jesus nyadi Pemerintah ila, iya deka ngasuh mensia bulih pengidup ti manah agi ari pengidup kitai ke diatu.

• Iya ngeraika mayuh macham pemedis enggau penyakit. Tu nunjukka dudi hari ila iya deka muai penyakit ari mensia.​—Matthew 9:35.

• Iya neduhka kabut ba tasik. Tu nunjukka iya ulih nyaga mensia ari kuasa alam.​—Mark 4:36-39.

• Iya nyediaka pemakai ke beribu iku orang. Tu nunjukka iya deka nyediaka semua utai ti diguna mensia.​—Mark 6:41-44.

• Iya ngubah ai nyadi wain lebuh ngagai siti pengerami kawin. Tu nunjukka iya deka nyediaka utai ti ngerinduka ati mensia.​—John 2:7-11.

Petara besemaya deka meri pengidup ti manah tu ngagai orang ke rinduka Iya. Baka ni nuan tau bulih pengidup tu? Bisi siti “jalai” ke patut ditengah nuan. Bup Kudus madahka jalai tu ‘jalai ti nuju ngagai pengidup, lalu semina mimit aja orang tetemuka iya.’—Matthew 7:14.

Nama jalai ti nuju ngagai pengidup? Petara madahka: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’ (Isaiah 48:17) Enti  nuan nitihka jalai tu, nuan deka bulih pengidup ti pemadu manah.

Jesus madahka: “Aku tu meh jalai, pemendar, enggau pengidup.” (John 14:6) Enti kitai nitihka jaku Jesus sereta nunda teladan iya, kitai deka semak agi enggau Petara lalu pengidup kitai nyadi manah agi.

Baka ni nuan ulih tetemuka jalai ti nuju ngagai pengidup? Ba dunya bisi mayuh jalai pengarap, tang Jesus meri jaku tangkan tu: ‘Ukai semua orang ke ngangauka aku “Tuan, Tuan” deka tama ngagai Perintah serega, tang semina orang ke ngereja peneka Apai aku ti di serega.’ (Matthew 7:21) Iya mega madahka: “Kita deka ngelala sida ari buah sida.” (Matthew 7:16) Bup Kudus ulih nulung nuan ngambika ngelala bida entara pengarap ti bendar enggau pengarap ti pelesu.—John 17:17.

Baka ni nuan ulih nitihka jalai ti nuju ngagai pengidup? Nuan patut belajar pasal Petara ti udah meri pengidup ngagai semua mensia. Sapa Iya? Sapa nama Iya? Nama pemanah Iya? Nama digaga Iya ke kitai? Nama utai ti dikedekaka Iya ari kitai? *

Petara ukai semina deka mensia gawa, makai, bemain, sereta bisi ruang bilik. Kitai ulih ngelala Petara sereta nyadi pangan Iya. Kitai ulih nunjukka kitai rinduka Iya enti kitai ngereja peneka Iya. Jesus madahka: ‘Tu pengidup ti meruan belama iya, ngambika sida ngelala Nuan, Petara ti bendar.’—John 17:3.

Enti deka ngerinduka ati Petara, kitai engka patut ngaga sekeda ubah. Tu engka enda senang. Tang lebuh kitai berengkah nitihka jalai ti nuju ngagai pengidup, pengidup kitai deka berubah nyadi manah agi. Nuan engka bisi sekeda tanya pasal Petara. Kena nulung nuan ngiga saut ke tanya nya, Saksi-Saksi Jehovah gaga ati belajarka Bup Kudus enggau nuan nitihka jam enggau endur ti dikedekaka nuan. Nuan ulih ngiga kami ba laman web kami, www.ps8318.com.