Kati Semua “Orang Kristian” Nya Kristian ti Bendar?

NITIHKA Atlas of Global Christianity, ba taun 2010, nyauka 2.3 bilion orang ke ngumbai diri Kristian. Tang bup nya mega madahka, bisi kira-kira lebih ari 41,000 bansa orang Kristian. Tiap iti bansa tu bisi ajar sereta prinsip ke bebida. Ketegal bisi mayuh bansa pengarap Kristian, sekeda orang saru lalu nanya, “Kati semua ‘orang Kristian’ nya Kristian ti bendar?”

Kena nyaut tanya tu, perundingka siti sempama pasal seiku pelancong. Sebedau tama ngagai menua bukai, iya patut nunjukka bukti ari ni menua asal iya. Iya patut nunjukka pasport tauka dokumen bukai. Baka nya mega, semina ngumbai diri orang Kristian aja enda chukup. Seseiku orang patut bisi “pasport tauka dokumen” ke bukai. Nama “pasport tauka dokumen” orang Kristian?

Leka jaku “Kristian” berengkah dikena kira-kira 10 taun pengudah Jesus mati. Luke madahka: “Antiok nya meh endur alai bala murid terubah dikumbai Kristian.” (Surat Kereja Rasul 11:26) Peratika, sida ke dikumbai Kristian nya bala murid Jesus. Baka ni seseiku orang nunjukka iya nya murid Jesus? Bup The New International Dictionary of New Testament Theology madahka, ‘Seseiku orang patut sanggup ngena pengidup iya nitihka Jesus sepemanjai pengidup iya.’ Nya alai, orang Kristian ti bendar patut ngasika pesan sereta ajar ari Jesus enggau pengabis ati sereta semengat sida.

Kati orang Kristian ke baka nya bisi kemayaharitu? Nitih ku Jesus, nama tanda ke nunjukka orang nya murid iya? Peratika saut Bup Kudus ngagai tanya tu. Ba artikel pengudah tu, kitai deka beratika lima utai ke dipadah Jesus ke ulih nulung kitai ngelala sapa murid iya ti bendar. Kitai mega deka meda chunto orang Kristian ba abad keterubah. Kelimpah ari nya, kitai mega deka meda sapa ke nitihka teladan sida kemayaharitu.