Aku ada ba Székesfehérvár, Hungary, siti nengeri ti besejarah. Nengeri tu ditumbuh lebih ari 1,000 taun suba. Aku agi ingat bekau abi Perang Dunya Kedua ke nyadi suba.

Maya aku agi mit, aku dibesaika aki enggau ini. Aku amat sayauka seduai iya, kelebih agi ini aku Elisabeth. Iya meransang aku ngembuan pengarap ngagai Petara. Kenyau aku beumur tiga taun kami duai ini suah besampi ngena sampi Apai Kami ninting lemai. Taja pia, aku enda nemu reti sampi nya nyentukka lebih ari 20 taun udah nya.

Maya agi mit, aki ini aku nyaga aku lebuh apai indai aku kereja siang malam. Sida patut bekereja siang malam laban sida patut nyimpan duit kena meli rumah. Tang dua minggu sekali semua kami makai begulai. Aku gaga ati maya kami begulai.

Kena taun 1958 apai indai aku nyapai juluk ati sida deka meli rumah ke kami tiga. Aku amat gaga ati laban aku ulih diau begulai enggau apai indai aku! Taja pia, enam bulan pengudah nya pengaga ati nya lenyau. Apai aku mati ketegal kanser.

Aku nadai daya agi. Aku besampi: “Petara, aku udah minta nuan nyelamatka apai aku. Aku begunaka iya. Nama kebuah nuan enda nyaut sampi aku?” Aku keran deka nemu dini apai aku diatu. Aku nanya: ‘Kati iya ngagai serega? Tauka, kati iya enda agi idup?’ Aku chemburu meda nembiak bukai bisi apai.

Betaun-taun aku ngabas pendam nyauka ninting hari. Aku duduk semak pendam apai aku lalu besampi: “Petara, aku deka nemu dini endur apai aku.” Aku mega besampi minta tulung Iya ngambika aku meretika reti pengidup.

Lebuh aku beumur 13 taun, aku deka belajar bansa jaku Jerman. Aku berunding, enti aku belajar bansa jaku Jerman, mayuh agi bup ke ulih dibacha aku, nyadi engka aku ulih tetemuka saut ngagai tanya aku. Kena taun 1967 aku berengkah belajar ba nengeri Jena ba menua Jerman Timur. Aku macha bup falsafah Jerman, kelebih agi bup pasal reti pengidup mensia. Taja pan aku tetemuka idea ti manah, tang semua utai nya enda ngemuaska ati aku. Aku terus besampi ngiga saut ari Petara.

Kena taun 1970, aku pulai baru ngagai Hungary alai aku tetemuka Rose, lalu kami kawin. Maya nya, Hungary dipegai parti Komunis. Empai lama pengudah kami kawin, kami duai Rose pindah ngagai Austria. Kami bisi juluk ati pindah ngagai Sydney, Australia alai aya aku diau.

Udah nya, aku tetemuka kereja ba Austria. Bisi sekali, orang ke sama gawa enggau aku madah aku ulih tetemuka saut ngagai tanya aku ba Bup Kudus. Iya meri aku bup pasal Bup Kudus. Aku jampat macha semua bup nya lalu deka belajar mayuh agi. Nyadi, aku nulis surat ngagai Saksi-Saksi Jehovah, pengeluar bup nya, lalu minta mayuh agi litaricha.

Maya ulang taun kawin kami kesatu, kami duai Rose diabas siku nembiak Saksi. Iya mai litaricha ke dipinta aku lalu nanya enti aku ka belajarka Bup Kudus. Laban aku amat ka belajar, nyadi kami belajar dua kali seminggu. Tiap kali kami belajar pengelama empat jam!

Aku alit ati enggau utai ke diajar Saksi-Saksi Jehovah ari Bup Kudus. Lebuh sida nunjukka nama Petara, Jehovah, dalam Bup Kudus bansa jaku aku empu (Bup Kudus Hungary) aku amat tekenyit! Pengelama 27 taun aku datai ngagai gerija aku enda kala ninga nama Petara disebut. Aku alit ati enggau saut ari Bup Kudus ti terang, sereta ulih diterima. Ngambika chunto, aku belajar orang ke mati nya enda nemu utai ke nyadi, sida baka ke tinduk jenak. (Pengajar 9:5, 10; John 11:11-15) Aku mega belajar semaya Bup Kudus pasal dunya baru alai pemati deka “nadai agi.” (Pemandang 21:3, 4) Aku arap ulih betemu baru enggau apai aku ba dunya baru maya Petara deka ngidupka orang.—Surat Kereja Rasul 24:15.

Rose mega gaga ati maya belajarka Bup Kudus. Kami jampat ngaga pemansang, nembuka bup dikena belajar dalam dua bulan aja! Kami datai ngagai semua gempuru Saksi-Saksi Jehovah ba Palan Gempuru. Kami amat alit ati meda pengerindu, pemanah sereta penyerakup Saksi-Saksi Jehovah.—John 13:34, 35.

Kena taun 1976, kami duai Rose bulih visa ngambika ulih tama ngagai Australia. Kami terus ngiga Saksi-Saksi Jehovah ba dia. Bala Saksi ke diau dia terus ngelaluka kami. Kena taun 1978, kami empu nyadi Saksi.

Pengudah lama ngiga saut ngagai tanya aku, aku udah tetemuka saut nya. Enggau semak ngagai Petara Jehovah, aku tetemuka Apai ti pemadu manah. (James 4:8) Lalu aku ngarapka diri ulih betemu enggau apai aku baru ba dunya baru Petara.—John 5:28, 29.

Kena taun 1989, kami duai Rose mutus deka pulai baru ngagai Hungary ngambika kami ulih bekunsika pengarap kami ngagai bala kaban sereta diri sebilik, pia mega orang bukai ke ditemu kami. Kami amat gaga ati ulih nulung beratus iku orang belajarka Bup Kudus. Lebih ari 70 iku ari sida sama enggau kami gawa ke Jehovah, nyengkaum indai aku.

Pengelama 17 taun aku besampi kena ngiga saut ngagai tanya aku. Pengelama 39 taun ke udah lepas, aku mega agi besampi, tang diatu aku madah: “Terima kasih Apai laban nyaut sampi aku maya aku agi mit.”