Sekeda orang ngasaika besampi masau jam, laban nadai orang ninga. Bisi mega orang besampi, tang ngasaika sampi sida enda disaut. Seiku orang ke enda arapka Petara ngambarka baka ni Petara nya, lalu besampi: “Uji bejaku mimit enggau aku.” Tang iya madahka, Petara mengkang “enda nyaut.”

Taja pia, Bup Kudus madahka kitai bisi Petara, lalu Iya ningaka sampi. Tu jaku Bup Kudus ngagai orang kelia menya: “TUHAN endang kasih, lalu lebuh kita nyabak minta Iya nulung kita, Iya deka nyaut kita.” (Isaiah 30:19) Siti da ayat Bup Kudus madahka: “TUHAN gaga ati lebuh orang ke menyana besampi.”—Jaku Dalam 15:8.

Bup Kudus mega bisi madah pasal sampi orang ke didinga Petara. Siti ayat madahka, Jesus besampi ‘mantaika peminta . . . ngagai Petara, ke ulih ngelepaska iya,’ lalu ‘Petara ninga iya.’ (Hebrew 5:7) Chunto ke bukai bisi ba Daniel 9:21 enggau 2 Bansa Israel 7:1.

Nama kebuah sekeda orang ngasaika sampi sida enda disaut? Ngambika sampi didinga, kitai patut semina besampi ngagai Jehovah, * Petara ke dipadah ba Bup Kudus, ukai ngagai petara bukai tauka ngagai bala peturun ke udah mati. Petara mega dekaka kitai “minta sebarang utai nitihka peneka Iya”—utai ti dikemendarka Iya. Petara madahka kitai, enti kitai besampi nitihka peneka Petara, “Iya ninga kitai.” (1 John 5:14) Nya alai, ngambika sampi kitai didinga, kitai patut ngelala Petara ke dipadah ba Bup Kudus sereta nemu peneka Iya.

Mayuh orang pechaya sampi nya ukai semina pengawa ke digaga orang ke bisi pengarap, tang Petara amat ninga sereta nyaut sampi sida. Isaac, ari menua Kenya madahka: “Aku besampi ngambika ulih meretika Bup Kudus. Enda lama udah nya, bisi orang datai, lalu nulung aku.” Hilda, ari menua Filipina deka badu nginsap. Ketegal suah enda ulih badu, ku laki iya madah, “Nama kebuah enda besampi minta tulung ari Petara?” Iya nitihka utai ku laki iya, lalu ku iya: “Aku alit ati enggau chara Petara nulung aku. Aku berengkah nadai ati deka nginsap. Aku ulih badu nginsap.”

Kati Petara deka nulung nuan mutarka pengirau ke sejalai enggau peneka Iya?