Terima kasih laban deka mansutka berita pasal pengawa ke dikereja Saksi-Saksi Jehovah. Tu sekeda iring ke disediaka kena nulung nuan milih leka jaku ti betul lebuh mansutka berita pasal gerempung pengarap kami. Enti nuan bisi tanya pasal kami kelimpah ari utai ke dipadah ba ditu, nuan ulih ngiga pampang opis Saksi-Saksi Jehovah.

bala menyadi. Bala Saksi-Saksi Jehovah ba serata dunya (lelaki enggau indu).—1 Peter 5:9.

Bethel, ruang bilik Bethel. Dalam jaku Hebrew, “Bethel” reti iya “Rumah Petara.” Leka jaku tu dikena madahka pasal bengunan ke dikena Saksi-Saksi Jehovah ba sesiti menua, alai ngatur pengawa rohani sida. Saksi-Saksi Jehovah ke gawa ba bengunan tu dikumbai “ruang bilik Bethel,” laban sida baka siti ruang bilik ke diau begulai, gawa begulai sereta sama nyembah Petara ba dia. Sida nadai nerima gaji. Leka jaku “ruang bilik Bethel” ukai dikena meri basa ngagai sida ke gawa dia.

Bup Kudus Salin Dunya Baru. Nama penuh Bup Kudus ke disalin enggau dikeluarka Saksi-Saksi Jehovah, nyengkaum Begian Jaku Hebrew-Aram (“Sempekat Lama”) sereta Begian Jaku Gerika (“Sempekat Baru”). Ulih mega dikumbai Salin Dunya Baru.

 gempuru besai sehari. Gempuru sehari tu diatur Saksi-Saksi Jehovah dua kali dalam setaun. Beberapa iti raban gempuru deka begulai ba gempuru besai tu. Gempuru besai ke baka tu dibuka ke orang mayuh lalu program nya disediaka kena nulung orang datai semak ngagai Petara. Program nya nulung semua orang, enda ngira tuai biak, bulih penguntung ari jaku lalau Bup Kudus. Bisi lakun kena nunjukka chara nitihka ajar Bup Kudus ba pengidup besehari-hari. Selalu iya, gempuru besai sehari diatur ba endur ke disewa, tauka kekadang ba Palan Gempuru enti orang ke datai enda entu mayuh. Ba sekeda menua, gempuru besai sehari diatur ba Palan Gempuru Besai Saksi-Saksi Jehovah. Program tu mega ulih dipeda nengah online. Selalu iya, program tu diatur ba ujung minggu. Nadai duit pupu digumpul lalu enda ibuh bebayar lebuh tama.

gempuru besai. Peda mega:  gempuru besai sehari.

gempuru tengan minggu. Gempuru ke diatur tiap minggu, biasa iya diatur kena lemai tengan minggu. Program ke dikumbai Pengidup enggau Pengawa Kristian Kitai bisi tiga iti begian. Tuju gempuru tu kena nulung bala Saksi-Saksi Jehovah nyadi penginjil ti landik agi. Sama baka semua gempuru Saksi-Saksi Jehovah, sekalika datai betunga mua tauka nengah online, nadai duit pupu digumpul lalu enda ibuh bebayar lebuh tama.

gempuru ujung minggu. Gempuru ke diatur tiap minggu, biasa iya diatur kena ujung minggu. Selalu iya, bisi cheramah Bup Kudus pengelama 30 minit ke disediaka ngagai orang mayuh. Pengudah cheramah Bup Kudus nya, bala ke datai deka berandauka siti topik ari Bup Kudus ngena tanya enggau saut ari majalah Menara Jaga edisi dikena belajar. Begian nya pengelama satu jam. Sama baka semua gempuru Saksi-Saksi Jehovah, sekalika datai betunga mua tauka nengah online, nadai duit pupu digumpul lalu enda ibuh bebayar lebuh tama.

Gilead, Sekula Gilead. Nama pandak ke Watchtower Bible School of Gilead, ti ditumbuhka kena taun 1943. Keterubah iya, sekula tu kena ngelatih bala missionary (pengerintis seberai tasik). Diatu, tuju sekula tu kena meri kursus belajarka Bup Kudus pengelama lima bulan ngagai sekeda bala Saksi-Saksi Jehovah ke dikangau. Enti nadai leka jaku “Gilead”, leka jaku “sekula” patut ngena urup mit.

Jehovah. Nama Petara ti Pemadu Tinggi ke nempa semua utai, baka ke dipadah dalam Bup Kudus. (Pemandang 4:11) Nama “Jehovah” enda dikena nyadi nama kangau ke bala Saksi-Saksi Jehovah, ambika chunto, “sida Jehovah” tauka “bala Jehovah.”

Jesus Kristus. Anak Tunggal Petara. (John 3:16) Saksi-Saksi Jehovah ngumbai Jesus nya Ketuai sida, lalu sida enggau naka ulih neladan iya sereta idup nitihka ajar iya. Sida mega ngumbai Jesus mensia ti sempurna, Saksi Jehovah ti pemadu penting, lalu iya deka dikena Jehovah kena nyelamatka mensia.—Isaiah 9:6, 7; Pemandang 1:5.

Komiti Pampang Opis. Lebuh bisi pampang opis ditumbuhka ba sesiti menua, bala Komiti Pampang Opis mega dipilih gawa ba endur nya. Selalu iya, abis nadai tiga iku tuai gempuru dipilih gawa nyadi Komiti Pampang Opis. Komiti Pampang Opis betanggungjawap ngemataka pengawa Saksi-Saksi Jehovah ba endur ke dijaga pampang opis nya.

 konvensyen entarabansa. Sekali dalam beberapa taun, Saksi-Saksi Jehovah ngatur konvensyen ba sekeda endur ke udah dipilih di serata dunya. Gempuru pengelama tiga hari tu kena belajarka Bup Kudus sereta nyembah Petara. Bala Saksi ke datai ari menua bukai mega dibai datai. Konvensyen tu dibuka ke orang mayuh sereta meransang orang ke datai nyemakka diri ngagai Petara sereta negapka penyerakup bala Saksi-Saksi Jehovah di serata dunya. Selalu iya, konvensyen entarabansa dipejalaika ari Hari Lima nyentukka Hari Minggu ba diwan ke disewa. Nadai duit pupu digumpul lalu enda ibuh bebayar lebuh tama.

 konvensyen pelilih menua. Gempuru pengelama tiga hari tu diatur sekali setaun kena meransang orang ke datai nyemakka diri ngagai Petara. Beberapa iti raban gempuru dalam sesiti pelilih menua deka begulai ba konvensyen tu. Konvensyen tu dibuka ke orang mayuh. Program nya nulung semua orang, enda ngira tuai biak, bulih penguntung ari jaku lalau Bup Kudus. Bisi lakun kena mandangka cherita Bup Kudus sereta nunjukka chara nitihka ajar Bup Kudus ba pengidup besehari-hari. Selalu iya, konvensyen diatur ba endur ke disewa, baka stadium tauka diwan besai. Ba sekeda menua, konvensyen pelilih menua mega dipejalaika ba Palan Gempuru Besai Saksi-Saksi Jehovah. Selalu iya, konvensyen betunga mua dipejalaika ari Hari Lima nyentukka Hari Minggu. Dalam beberapa taun ti udah, program nya dirikut dulu lalu ulih dipeda nengah online. Sama baka semua gempuru Saksi-Saksi Jehovah, nadai duit pupu digumpul lalu enda ibuh bebayar lebuh tama.

konvensyen. Peda mega:  konvensyen entarabansa enggau  konvensyen pelilih menua.

Menara Jaga Meritaka Perintah Jehovah (The Watchtower Announcing Jehovah’s Kingdom). Nama penuh majalah ti pemadu penting ke dikeluarka Saksi-Saksi Jehovah. Bisi mega dikumbai Menara Jaga. Nama majalah tu nunjukka orang ke macha nya patut mengkang bejaga ngambika ulih beratika lebuh tuju Petara dikeamatka. (Matthew 24:42) Menara Jaga edisi ke orang mayuh disadung ngagai orang ke bisi minat enggau pechuma. Bisi mega Menara Jaga edisi dikena belajar ke dikerandauka ninting minggu ba tiap raban gempuru di serata dunya. Menara Jaga udah dikeluarka enggau tetap kenyau ari taun 1879 nyentukka diatu. Tu meh majalah ti pemadu mayuh disadung tiap bulan ba serata dunya.

menyadi indu. Siku indu ke udah dibaptisa nyadi Saksi-Saksi Jehovah. Selalu iya, urup mit dikena enti nadai madahka nama menyadi indu nya. Lalu enti bisi madahka nama menyadi indu (tauka menyadi lelaki), urup besai patut dikena (chunto, Menyadi Smith). Gelar tu ukai dikena meri basa ngagai orang nya.

menyadi lelaki. Siku lelaki ke udah dibaptisa nyadi Saksi-Saksi Jehovah. Selalu iya, urup mit dikena enti nadai madahka nama menyadi lelaki nya. Lalu enti bisi madahka nama menyadi lelaki (tauka menyadi indu), urup besai patut dikena (chunto, Menyadi Smith). Gelar tu ukai dikena meri basa ngagai orang nya.

ngerembaika Berita Manah. Peda mega:  pengawa nginjil.

Palan Gempuru Besai Saksi-Saksi Jehovah. Endur begempuru ti besai alai nyembah Petara ke diempu Saksi-Saksi Jehovah. Endur tu dikena beberapa iti raban gempuru ba sesiti endur lebuh bisi gempuru besai. Endur tu mega ulih dikumbai “Palan Gempuru Besai.”

Palan Gempuru Saksi-Saksi Jehovah. Endur begempuru ti dikena siti tauka beberapa iti raban gempuru. Selalu iya endur tu dikumbai “Palan Gempuru.” Anang ngena leka jaku “gerija.”

pampang opis. Pampang opis nya endur alai Komiti Pampang Opis gawa ngambika nyukung sereta ngemataka pengawa Saksi-Saksi Jehovah ba siti tauka beberapa iti menua.

pelilih menua. Beberapa iti raban gempuru Saksi-Saksi Jehovah ba sesiti menua.

Pengawa Ngingatka Pemati Jesus.Tu pengawa ke diintu tiap taun kena ngingatka pemati Jesus lalu mega dikumbai Makai Malam Tuan. Tu pengawa ti pemadu penting ba bala Saksi-Saksi Jehovah tiap taun. Jesus nadai kala ngasuh bala murid iya ngintu pengerami tauka hari besai ke bukai kelimpah ari pengawa tu aja.—Luke 22:19, 20.

 pengawa nginjil. Tu ditujuka ngagai pengawa nginjil ke dipejalaika Saksi-Saksi Jehovah. Sida nitihka pesan Jesus ti ngasuh sida bekunsika “Berita Manah pasal Perintah Petara” “ba serata dunya, nyadika saksi ngagai semua bansa.”—Matthew 24:14; 28:19.

pengerintis. Sekeda Saksi-Saksi Jehovah nyadi “pengerintis” lalu sida nguji nyapai juluk ati deka ngulihka penyampau jam ke udah ditetapka ba pengawa nginjil. Siku “pengerintis biasa” ngena 600 jam ba pengawa nginjil tiap taun (iya nya 50 jam tiap bulan). Kekadang sida dikumbai “pengerintis” aja. Pia mega enggau “pengerintis sukung” ke ngena 15 tauka 30 jam kena nginjil dalam sesiti bulan, tauka tiap bulan. Bala pengerintis nadai dibayar gaji ketegal pengawa nginjil sida, lalu ukai pekereja raban gempuru tauka gerempung Saksi-Saksi Jehovah. Mayuh pengerintis patut kereja ngambika ulih melanja diri empu enggau diri sebilik. Leka jaku tu ukai gelar ke dikena meri basa ngagai orang nya.

pengerintis seberai tasik (missionary). Siku Saksi ti udah dibaptisa ke diasuh Raban ti Ngiring Saksi-Saksi Jehovah pindah ngagai menua bukai ba serata dunya. Bala pengerintis seberai tasik sanggup ninggalka rumah sida kena nulung meritaka Berita Manah pasal Perintah Petara ngagai endur bukai.—Matthew 24:14.

penginjil. Siku orang ke enggau pengawa nginjil ti sebagi ari raban gempuru Saksi-Saksi Jehovah. Syarat kena nyadi penginjil nyengkaum nemu sereta pechayaka ajar ti asas ari Bup Kudus sereta idup nitihka standard Petara. Bala penginjil nadai dibayar gaji ketegal pengawa nginjil sida, lalu ukai pekereja raban gempuru tauka gerempung Saksi-Saksi Jehovah. “Penginjil” ukai gelar ke dikena meri basa ngagai orang nya.

penulung gempuru. Siku Saksi ti lelaki ke tegap ba pengarap ke dipilih kena nulung bala tuai gempuru nyaga raban gempuru. Penulung gempuru patut nitihka syarat ke dipadah ba 1 Timoti 3:8-10, 12, 13 enggau Titus 2:6-8. Bala penulung gempuru ngereja mayuh pengawa ti praktikal kena nulung raban gempuru. Penulung gempuru nadai dibayar gaji lalu ukai pekereja raban gempuru tauka gerempung Saksi-Saksi Jehovah. Mayuh penulung gempuru patut kereja ngambika ulih melanja diri empu enggau diri sebilik. Nyau kelama, sekeda penulung gempuru ulih nyadi tuai gempuru enti sida udah nitihka syarat nya. Leka jaku tu ukai gelar ke dikena meri basa ngagai orang nya.

Peratika! (Awake!) Tu siti majalah ke dikeluarka Saksi-Saksi Jehovah. Keterubah iya, majalah tu dipansutka kena taun 1919 lalu maya nya, majalah tu dikumbai The Golden Age. Kena taun 1937, tajuk majalah nya diubah ngagai Consolation. Nama iya diubah baru ngagai Awake! berengkah ari isu kena 22 Ogos 1946. Nama Awake! nya dipilih kena nunjukka kitai patut sedar pasal utai ti penting ke nyadi ba serata dunya.

raban gempuru. Seraban Saksi ke tetap begulai begempuru nyembah Petara. Tiap raban gempuru bisi seraban tuai gempuru ke betanggungjawap ngatur raban gempuru nya sereta meri iring ari Bup Kudus ngagai semua orang ba raban gempuru nya. Gempuru ke diatur sida dibuka ke orang mayuh. Nadai duit pupu digumpul lalu enda ibuh bebayar lebuh tama.

Raban ti Ngiring Saksi-Saksi Jehovah. Seraban mit tuai gempuru ke dipilih kena ngemataka utai ke diguna Saksi-Saksi Jehovah ba pengarap di serata dunya. Suah dikangau “Raban ti Ngiring.” Sida betanggungjawap nyediaka litaricha ti bepelasarka Bup Kudus. Taja pan Raban ti Ngiring ngatur pengawa Saksi-Saksi Jehovah ba serata dunya, tang sida ngaku Jesus meh ke nyadi Ketuai Saksi-Saksi Jehovah. Raban ti Ngiring gawa ba Indu Opis Saksi-Saksi Jehovah di Warwick, New York, Amerika Serikat.

 Saksi-Saksi Jehovah. Raban pengarap Kristian ti nyembah Petara Jehovah sereta ngena awak sida nyukung pengawa ngajar Bup Kudus ngena mayuh macham chara. Sida selalu ngajar Berita Manah pasal Perintah Petara. (Matthew 24:14) Nama tu bebida ari nama pengarap ke bukai, laban nama tu nunjukka sida ngarika Jehovah sereta ngereja pengawa dalam nama Iya. Sesiku orang bedau agi dikumbai Saksi-Saksi Jehovah seagi-agi iya bedau ngembuan penemu asas Bup Kudus, nginjil begulai enggau raban gempuru Saksi-Saksi Jehovah sereta nyerahka pengidup iya ngagai Petara Jehovah enggau chara dibaptisa. Enti nuan nuliska artikel pasal kami, keterubah kali nuan patut ngena nama penuh, iya nya “Saksi-Saksi Jehovah”. Nuan mega ulih ngumbai kami “Saksi.” Lebuh bejaku pasal siku ari kami nuan ulih ngumbai iya “siku Saksi” tauka “siku ari Saksi-Saksi Jehovah.”—Isaiah 43:10.

tuai gempuru. Siku Saksi ti lelaki ke tegap ba pengarap dipilih kena ngajar sereta ngibun bala menyadi ba raban gempuru. Tuai gempuru ke dipilih patut mengkang nitihka syarat ke dipadah ba 1 Timoti 3:1-7; Titus 1:5-9; James 3:17, 18; enggau 1 Peter 5:2. Bala tuai gempuru nadai dibayar gaji lalu ukai pekereja raban gempuru tauka gerempung Saksi-Saksi Jehovah. Mayuh tuai gempuru patut kereja ngambika ulih melanja diri empu enggau diri sebilik. Saksi-Saksi Jehovah nadai pangkat lalu semua sida sama magang. “Tuai gempuru” ukai gelar ke dikena meri basa ngagai orang nya.

tuai ti ngabas. Siku tuai gempuru ti bepeneleba (enggau bini iya, enti udah bebini) ke diasuh pampang opis ngabas tiap iti raban gempuru dalam sesiti pelilih menua. Iya deka ngabas tiap iti raban gempuru dua kali dalam setaun. Iya meri peransang ngagai bala menyadi ba tiap iti raban gempuru. Kelimpah ari nya, iya mega meri peransang sereta iring ke bala tuai gempuru enggau bala penulung gempuru. Tuai ti ngabas nyediaka cheramah sereta aum ti engkeman ba bala menyadi ke diabas iya. Gelar tu ukai dikena meri basa ngagai orang nya.

NOTA: Lebuh nuliska artikel pasal kami, kena meh nama penuh kami (Saksi-Saksi Jehovah) ba keterubah kali nama nya ayan. Pengudah nya nuan ulih nulis “Saksi” aja. Kena nemu mayuh agi, peda:  Saksi-Saksi Jehovah.