EPLEEKO néē ta Ubáyíbu a, ɔcɛnyilɔ amāŋ ācɛ apɔlɛ ku nu gē gba ije ɔnyā lɛ apɔlɛ ku ɔnyā a, eko duuma nɛ apɔlɛ ɛplɛɛpa lɛ ocɛtɔha lɛ ku ayipɛ ɔlɛ uwa ɛpa a kéē lɛ iyi uwa. Ije ɔnyā ku uwa ɛpleeko ɔɔma lɔfu wɛ aɔdā ō tiile, aɛ́bɛ́, amāŋ ije. Ekoohi, é géē gba aɔdā ɛgɛnyā ŋma lɛ ō yuklɔ, bɛɛka ɛ̄nɛ̄ ó ya ipu āhɔ̄ ku Ujekɔpu nōo cɛ ō yuklɔ lɛ adā Urecɛlu ihayi ahaapa, o ya ɛɛ kóō lɛ Urecɛlu lɛ a. (Ohút. 29:17, 18, 20) Ɔdiya néē gē gba ije ɔnyā nyā a?

Carol Meyers ɔcɛ éyi nōo jé Ubáyíbu nɛɛnɛhi a kahinii: “Ije ɔnyā a lɔfu gba ɔdā nōo hɛ apɔlɛ ku ɔnyā a abɔ, ɔɔma kē wɛ uklɔ ɛhɔ nɛ ɔyinɔnya ku uwa gē ya nōo cɛgbá nɛɛnɛhi lɛ apɔlɛ a.” Ije ɔnyā a klla lɔfu ya ku ɛma ɛpɛpɛ nɛ apɔlɛ ɛplɛɛpa a lɛ a kóō lɔfu fiyɛ, oŋma lɛ ayipɛ ɔlɛ uwa ɛpa nōo gáā lɛ iyi uwa a. Ācɛ apɔlɛ a lɔfu ta iyi uwa abɔ eko nɛ āhɔ̄ le lɔnɔ. O ka tu ɔ, ije ɔnyā a gē mafu ku ɔnyā a lɛ ɔcɛ nōo gáā lɛ ɔ a má ɛ, ka ó kē wɛ adā nu gáā bēē leyi kwu ɔ mla ō je ogbotu lɛ ɔ gɛ ŋ, amáŋ ɔɔma géē wɛ uklɔ ku ɔba nu mɛɛnɛ.

Ō gba ije ɔnyā i wɛ ku ɔnyā a wɛ ɔdā néē lɔfu lá amāŋ je lá ŋ. Ɔkpá néē hi ku Ancient Israel—Its Life and Institutions a kahinii: “Uculo kóō gba ɛdɔ ije éyi amāŋ ɔdā nōo lɔfu jonjilɛ mla ije ɔɔma, lɛ apɔlɛ ku ɔnyā a gē ya ku ɔba mla ɔnyā ō lɛ nɛ ācɛ Isrɛlu gē ya a, kóō lɛbɛɛka é yɔ i lɛ ɔyi a je lá a. Amáŋ ó lɛbɛɛka é gē leyi má ije ɔnyā a ka ó wɛ ije ō bi le ta apɔlɛ ku ɔyipɔnɔnya a ahinya, ó wɛ ije ō bi le lá ɔyipɔnɔnya a ŋ.”

Icɛ ipu éwo ōhī, ācɛ gē yɛce uculo kóō gba ije ɔnyā kpɔ. Ɔdaŋ ku ɛ́nɛ́ amāŋ adā nōo wɛ Ɔcɛ O Yɛce Ukraist dɔka ō hɛ ɔcɛ nōo gáā lɛ ɔyi uwa a ije ɔnyā, é cika ō ya ‘ku ɛjɛɛji ācɛ kéē lɛ ɛgɛ néē jeeyi lɛ a má.’ Ɔwɛ éyi néē gáā mafu ɛnyā a, wɛ ɔdaŋ ka é hɛ uwa ije nɛhi nōó gáā mafu ka é jeeyi ŋ. (Ufíl. 4:5; 1 Ukɔ́r. 10:32, 33) O bu ɔwɛ nyā, é gē mafu kē wɛ ācɛ ō “yá unwū ije” amāŋ ācɛ ō leyi ō kwu ɔdā ŋ. (2 Utím. 3:2) O ka tu ɔ, ɔdaŋ ku ɛ́nɛ́ amāŋ adā nōo wɛ Ɔcɛ O Yɛce Ukraist i hɛ ɔcɛ nōo gáā lɛ ɔyi uwa a ije ɔnyā nōo nwune nɛhi ŋ, ɔba nōo gáā lɛ ɔyi uwa a i gáā yɔ i kwu ɛ̄cī ku ɔnyā ō lɛ a gɔbu, jaa gbeeko nōó lɛ ije lɛ jɛ ō gba ije ɔnyā a ŋ. Amāŋ, é klla gáā ya ku ɔba nōo gáā lɛ ɔyi uwa a kóō lɛ abɔ ci uklɔ ku ɔcɛ ō gbɔbu ɔna ō ta, ohigbu ka ó cɛgbá ō nyɔ i yuklɔ ɛ̄cī doodu, o ya ɛɛ kóō lɔfu lɛ ije ō gáā gba ije ɔnyā nōo nwune nɛhi néē hɛ ɔ a ŋ.

Ipu ɛga ōhī ku ɛcɛ nyā, é lɛ íne kwaajɛ abɔɔ lɛyikwu ije ɔnyā néē cika ō hɛ ɔcɛ a. Ɔdaŋ ka ó lɛ a, ɛ́nɛ́ amāŋ adā nōo wɛ Ɔcɛ O Yɛce Ukraist nōo lā abɔɔ a cika ō lɛyitaajɛ lɛ aíne ɔɔma. Ɔdiya a? Ohigbu ku Ɛlā ku Ɔwɔico dɔka ku Ācɛ O Yɛce Ukraist kéē “lɛyítáajɛ lɛ igɛ́mɛ́nti nēe ī gbāājɛ ā” mla ō lɛyitaajɛ lɛ aíne nōó gáā biya íne ku Ɔwɔico ŋ ma.—Uróm 13:1; Ācot. 5:29.