ANG ỌJẸ́JẸ 44

Ụya Ọyaya Wuu à Há Ohe Lẹ?

IJihova tịtọ kahị ka chị ọkẹkẹnị bala ọ-dọmwụ ka yụya ụka ọhẹ. Ma, ụya ọyaya bala ịhọhọ nya ẹka wuu à họ́ọ lẹ? Ányị ahị tị́ ka bwu mẹjẹ nyori iJihova háahị u-uhye nya ẹlẹwẹ?

1. Ịyẹ tị́ du ká iru nya ụya oyaya wụ́ iJihova ẹjẹ?

Ọhẹka ọ ka lang ẹbyẹbyị nyọka jẹ́ nyori ịhọhọ nya ụya ọyaya lụmẹ-lụmẹ dọmwụ bwu ẹga nya ala ijiga bala ịmẹjẹ nya ịnịịkịla. Ịhọhọ ịlịnyị ka dori wu ịgba ọgbagba nya ọnọọkịla myị́. Ịhyẹ ri ang nya alegu inyibyi lee ọ-kpụnịrọ ọmẹjẹ nyori ugbodu okpukpuru nya ọngịnyị nyịị gbu ẹnẹnẹhẹ ka. Ịhyẹ dọmwụ bwu ẹla nya ịnịịkịla ịlẹ ká angịnyị myị la, lee ọmẹjẹ nya ụrụrụ ọháha lee ụrụrụ ọbyịbyị. (Ayịsaya 65:11) IJihova da anchẹ nyamwụ ọna yẹkẹẹ: “Chị ebwo datị ham mẹ. . . . Anụ yụbwọ nyanụ gu ịngịngịhyẹ ọlẹ kọ chịrị ị-ịlahị nyam Am Ohe Oluhye ka.”—2 Ala ịKọrịntị 6:17. a

2. Ányị iJihova à tị́ yẹ ịhọhọ ịlẹ kị kaa ya ihi ha angịnyị ehe kpoye nya oyi?

IJihova gbileehi ụbwọ ụ-ụrụ nyori ahị nyị “dahịhile angịnyị” ehe ka. (Wa iJeremaya 17:5.) Ị kaa họ ọhụhụ ịhyẹ nyọka ya ihi ha alegbeju bala angịdẹwụ. Ịhọhọ nya ụya ọyaya ịkịla kaa ri ịtịya ọkpụkpụ nya ụka ọlẹ ká ẹpwụma la ịlaa bala ọ-ka ya ihi ha ang ẹjẹẹ nya ẹpwụma, lala ápwụ̀ nya ẹpwụma. (1 ịJọn 5:21) Ị myịmyị kaa họ ọhụhụ ịkịla nyọka ya ihi ha alupe lee ogu ịkịla. Ányị ọ tị́ ka la iJihova kori kahị ya ihi o-pwoku-ka ha ọngịnyị lee ogu ọhẹ-lọhẹ, ọgụgụụgụ kori ká angịịwa-á kaa mẹ ẹla ọlẹ ko pwoku irya nya Ohe ka jẹ?

3. Abwẹla ụma iyina à tị́ ka du ká iJihova ka ye ụya ọyaya ịhyẹ myị ka?

ỊBayịbụụ pwa ẹla nya “ere ọnwanwa juwa ya bala angị juwa la ọjịra-jịra nya ụya ọyaya onyobyi [bala o-juwa] wụrụ awụlẹ ẹpwa [lee ọ-chị awụlẹ ọnụ, NW] nya ere ọnwanwa.” (1 iPita 4:3) Ụya ọyaya ịhyẹ kaa ju angịnyị ọhụ nyọka họ ẹla la o-wu ịlaa kpa ka bala ọ-ka họ ụ́ya. Nyọka ri aligu nya iJihova, ahị baba nyọka cheji ba hwẹẹ hi abwẹla ịchịrị ịlịịwẹ.

JẸ́ GỤ ỌỌWA

Yẹ jaabwọ á ka bwu họ ẹla kpụ iJihova ịpyọ bwula o-cheje ọnyịịla u-uhye nya ịhọhọ nya ụya ọyaya bala ẹka.

4. Cheji ba hi ụya ọyaya ịlẹ kị kaa ya ihi ha iJihova ka

Wa Ala Efesọsị 5:10, kanụ ya ẹla u-uhye nya ịtọ ẹla ịlẹ:

Ịyẹ ahị tị́ baba nyọka jẹ́ myị̀myị̀ ụka kahị ja ka cheje kori kahị ka họ ẹka?
Ẹka ụma iyina aloye nyang à tị́ kaa họ?
À me irya ká ẹka ịwẹ há iJihova?

Ọ-chụ pwokwita, à me irya u-uhye nya abwọlẹ ká Ohe yẹ ụya ọyaya nya ịtịya ọkpụkpụ nya ẹnụtụrụ nya ọmama ẹnẹhẹ lẹ? ỊBayịbụụ-ụ́ ya ẹ-ẹgẹgẹhẹ nyori ọnchẹ nya iJihova nyị họ ọhụhụ ọwẹ ka, ma angị imiiye ịlẹ kị họ ọhụhụ ọwẹ ká ịBayịbụụ ya lẹ, ị́ ri anchẹ nya iJihova ka. Wa Ọmwụ Ọdada 40:20-22 bala ịMatiyu 14:6-10, kanụ ya ẹla u-uhye nya ịtọ ẹla ịlẹ:

Ịyẹ à tị́ me awụlẹ ẹ-ẹpwụ nya ọhụhụ imiiye ịwẹ?
Bwu oja imiiye ịwẹ, ányị a tí me irya ká iJihova kaa yẹ ẹla nya ọhụhụ nya ịtịya ọkpụkpụ nya ẹnụtụrụ nya ọmama?

À tị ka tọ wo myị́, ‘Ọ ka ri iJihova ẹla ịnyịlẹhị kori kam họ ọhụhụ nya ịtịya ọkpụkpụ nya ẹnụtụrụ nya ọmama bala ụya ọyaya ịkịla ịlẹ ká ụpwụ ịgọgọ myị ju ka?’ Wa Ehe Ọkpụkpụ 32:1-8. Kori ká họ ịnyị kpá, à yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: Ịhọhọ nya Ẹka Bala Ụya Ọyaya Ịlẹ kị Wụ́ Ohe Ẹjẹ (5:07)

Ịyẹ tị́ du kahị baba nyọka jẹ́ ang ịlẹ ká iJihova ye myị datị?
Ányị ahị tị́ ka bwu họ ịnyị?

Jaabwọ áhị ka bwu jẹ́ ụya ọyaya ọlẹ kọ wụ́ Ohe ẹjẹ

Ọ myị ọnụ ju ọmẹjẹ ọlẹpwụ nya ịBayịbụụ? Nyọka yé ọwẹwẹ, maga ká jẹ́ jaabwọ kọ bwu dọmwụ.
Ọ ya ihi ha ọngịnyị ehe, ogu, lee ang ẹjẹẹ nya ẹpwụma kpoye? Ihi ọgụgụ nyahị kaa ka ẹga nya iJihova, ahị tị kaa dahịhiloo nyọka chị akama ilodehe wuu eju.
ỊBayịbụụ myị ju ang ịlẹ ká angịnyị kaa họ ẹ-ẹpwụ nyamwụ? Ahị baba nyọka la cheri-cheri a-abwẹla.

5. Da angịkịla ụbwọ nyọka ju ẹla ọlẹ ká myị ju ihi

Ọ ka lujwo myị́ nyọka pwa ụka ká angịkịla á ja tụng tụtụ nyọka lụbwọ ẹ-ẹpwụ nya ụya ọyaya ịlẹ kị wụ́ iJihova ẹjẹ. Dọhụ pịlẹẹ ụka ká ja da eje ọchịchị nyang wụlẹ jaa bala ọ-họ ịnyị ụ-ụgbẹyị olihi. Nyọka yẹ ọ-chụ pwokwita ọhẹ, yẹ IFIM ọwẹ.

IFIM: Da Ẹla Ọlẹ ká Myị la Wụlẹ ụ-Ụgbẹyị Olihi (2:01)

Wa ịMatiyu 7:12, kanụ ya ẹla u-uhye nya ịtọ ẹla ịlẹ:

Jaabwọ ká jẹ́ bwu ọgba ọwẹ, à ka byi alugbiyegu nyang ịlẹ kị kaa gbịgba ha iJihova ka nyori ịwa ịnyịnyị nyị́ ka yụya nya ẹka ka?
Ịyẹ a tị́ ka họ nyọka mẹjẹ alugbiyegu nyang nyori ị háng bala o-ri ẹla nyaa myịng lẹhị, nanana nyori á kaa yụya ọlịnyị balaa ka?

6. IJihova tịtọ kahị ka chị ọkẹkẹnị

IJihova tịtọ káahị bala alugbiyegu bala aligu nyahị ka bịrị ụka lawụlẹ bala ọ-ka chị ọkẹkẹnị. Wa Ọngọlirya 8:15, kanụ ya ẹla u-uhye nya ịtọ ẹla ọlẹ:

Ányị ọgba ọwẹ à tị́ mẹjẹ nyori iJihova tịtọ kahị ka chị ọkẹkẹnị?

IJihova tịtọ ká angịnyị nyamwụ ka yụya bala ọ-ka chị ọkẹkẹnị lawụlẹ. Yẹ IFIM ọwẹ nyọka yẹ jaabwọ ká ẹlẹwẹ mẹjẹ gede-gede ọọjịra-jịra ịtụka nyahị ịlẹ ká ẹpwụma lụmẹ-lụmẹ kaa họ lawụlẹ.

IFIM: Ụga Ọhọhọ Ụka nya Ọjịra-jịra Ọtụka nya Ẹpwụma Ịdatị-datị (5:40)

Wa Ala ịGaletiya 6:10, kanụ ya ẹla u-uhye nya ịtọ ẹla ịlẹ:

O ri o-pyii kahị ka yụya nya ẹka ene kahị ka họ ‘ang ọnyịịla’ ha angịkịla?
Oyina à tị́ ka ya ọkẹkẹnị hang gụ: Ọ-ka hu ha nya ọ-jẹ́ abwẹhẹ ka họ ka lụka nya ẹka, lee o-hu ha bwu ọkịlẹtụ tị́?
Ụka lụmẹ-lụmẹ, iru nya Alibeenu nya iJihova kaa họ ang ịkpịpyọ-kpịpyọ lee ọ-dọmwụ ya āhị ha anyị nyaa. Kori ká ma anyị lẹ, ang ịkpịpyọ-kpịpyọ ụma iyina a tị́ ka jẹ́-ẹ họ haa?

ANGỊHYẸ KAA YẸKẸẸ: “Abwọlẹ ká ọhọhọ nya ụya ọyaya bwu dọmwụ á baba abwẹhẹ ka. Ang ọlẹ kọ baba ri ọ-ka yụya lawụlẹ bala ugbiyegu bala aligu nyang.”

Ányị a tị́ ka ya?

ẸLỊYẸ A TỊ́ JẸ́?

IJihova tịtọ kahị ka chị ọkẹkẹnị lawụlẹ bala alugbiyegu bala aligu nyahị. Ọ tị tịtọ kahị cheji ba hi ụya ọyaya ịlẹ kị wọ́ọ ẹjẹ ịnyịnyị.

Ẹlịyẹ A Tị́ Yụbwọ Chị?

Ịtọ ẹla iyina ahị tị́ ka jẹ́-ẹ tọ nyọka jẹ́ kori ká ụya ọyaya ọhẹ á wụ́ iJihova ẹjẹ?
Ányị ahị tị́ ka bwu wụlẹ eje ọchịchị nyahị u-uhye nya ụya ọyaya je alugbiyegu bala aligu nyahị?
À tị́ họ ányị ká jẹ́ nyori iJihova tịtọ kahị ka chị ọkẹkẹnị bala ọ-ka yụya?

Ahyẹẹnụ ọlẹ ká ang ọjẹ́jẹ ọlẹ cheju:

Ụkụrwọ ọlẹ á ka họ

Kpa ang ọlẹ ká jẹ́-ẹ̀ wẹ wụla ụya ọyaya nya ẹka ịlẹ ká angịnyị kaa họ o-oye nyang yẹ.

Ọkịla:

Ụkụrwọ ọkịla ọlẹ á ka họ