Ti ministeriotayo idi Nobiembre 2020 ket nakallalagip kadagiti Saksi ni Jehova. Kaaduan kadatayo ti saan a makaruar kadagiti pagtaenganna gapu iti makapapatay a pandemia. Naisardeng pay laeng ti gagangay a pamay-antayo a mangasaba. Ngem nagballigi latta ti ili ni Jehova a nangiringpas iti sangalubongan a kampania a mangipakaammo iti Pagarian ti Dios. Iti intero a lubong, minilion nga agibumbunannag ti nagiwaras iti Pagwanawanan No. 2 2020 kadagiti lugar ti negosio, opisial ti gobierno, mannursuro, gagayyem, kakabagian, ken ti amin a tattao. Daytoy a trabaho ti nangparegta kadagiti amin a sidadaan a dimngeg. Naragsakan ken nabang-aran met ti amin a nakipartisipar.

Dagitoy ti sumagmamano a kapadasan ken komento dagiti kakabsattayo iti intero a lubong:

Insurat ni Lucinda Furkin, 18 ti tawenna, ken nabiit pay a nabautisaran a kabsat iti Australia: “Uray no adda nakaro a sakitko bayat ti kampania, nariknak a tultulongannak ni Jehova. Kasla ig-iggamanna ti imak ken ipapaayna ti bileg a kasapulak tapno makapagibturak.”

Imbaga ti maysa nga ama iti New Zealand no kasano a nakatulong ti kampania iti pamiliana: “Kas nagannak ti uppat a babbalasitang nga agtawen iti 7, 9, 11, ken 13, imbilangmi ti sangalubongan a kampania kas personal nga asaynment manipud iti naayat nga Amatayo a ni Jehova tapno maitultuloymi ti inaldaw a panangasabami.”

Da Kagiso ken Lydia Marumo, nga agserserbi iti sirkito, ket nangipatulod kadagiti elektroniko a kopia ti magasin kadagiti saan a Saksi a kabagianda. Adu ti nagyaman kadakuada. Kuna ti maysa a doktor a kabagian ni Kagiso a naintiempuan ti magasin. Kunana a dagiti annakna ket makiramraman iti okulto ken adda dagiti pasientena nga agsalsaludsod maipapan kadagiti naespirituan a topiko. Kinontak da Kagiso ken Lydia dayta a kabagianda ken inrugida nga inyadalan iti Biblia iti dayta met la a rabii. Mamindua iti makalawas nga agad-adalda itan.

Insurat ni Sister Soroya Thompson, a payunir iti Ontario: “Gapu iti kampania, nakapagpokusak manen iti kapatgan a banag ken no kasano kaadu pay a trabaho ti masapul nga aramiden. Maysa met dayta a palagip nga ay-ayatennatayo ni Jehova ken pammaneknek a talaga a saanna a kayat nga adda asinoman a madadael. Gapu iti dayta, ad-adda a gimmagetak a mangasaba bayat ti kampania.”

Imbaga ti maysa a sister manipud British Columbia: “Bayat ti makapa-stress a tiempo, nagdesisionak nga ag-auxiliary pioneer tapno saanak a madepres. Gapu iti dayta, simmayaat ti riknak ken natulongan met ti pamiliak.”

Inreport ti sangay iti Canada a nakatulong ti kampania tapno ad-adda a suminged dagiti pamilia. Naiparikna met kadagiti ubbing nga adu ti maaramidanda iti ministerio ta nagaramidda iti bukodda a surat wenno timmulongda iti pamiliada a mangsurat kadagiti sobre, agikabil kadagiti selio, ken agbirok kadagiti adres.

Imbaga da Brother ken Sister Tuomisto, nga agserserbi iti sirkito: “Ti Nobiembre ti kalilidayan a bulan iti lugarmi, isu a nakatulong ti kampania kadagiti kakabsat nangnangruna kadagiti payunir tapno saanda a madepres.”

Adda agassawa a nangipatulod iti magasin iti am-ammoda ket nakaawatda iti surat ti panagyaman, a kastoy ti dadduma a linaonna: “Ita, [basbasaek ti libro iti Biblia] a Santiago. Kunana a ti pammati nga awan aramidna ket natay. Kanayon a makisarsarita dagiti Saksi ni Jehova kadagiti tattao tapno ilawlawag ken isuroda ti maipapan iti Biblia. Mangpatpatibker dayta iti pammatida.”

Imbaga ti sangay iti Greece: “Para iti adu, makapa-stress ti pandemia agraman dagiti restriksion ken lockdown. Ngem nabang-aranda gapu iti kampania. Adu ti mangibagbaga a ‘makaparepresko dayta iti naespirituan!’”

Nag-auxiliary pioneer ni Sister Suzie Kontargiri uray no adda sakitna ken saan a Saksi ni lakayna. Imbagana: “Saankon a napampanunot dagiti negatibo a bambanag gapu iti kampania. Nakaragragsakak nga agriing iti agsapa sa aramidek dagiti trabahok, agluto, ken asikasuek ni lakayko. Kalpasan dayta, mangrugiakon a mangasaba. Masansan nga isaludsod ni lakayko: ‘Saanka kadi a mangasaba ita?’ ta naruamen a makakitkita kaniak a naragsak a mangaskasaba a kadua dagiti kakabsat.”

Sinuratan ni Sister Tamaki Hirota dagiti opisial ti gobierno. Imbagana: “Ni Jehova ti immuna a nangasaba babaen ti surat. Nangaramid iti 66 a surat para iti sangatauan, ket ulit-uliten dagiti tattao a basbasaen dayta iti adun a tawen tapno sumingedda Kenkuana. Ammo ni Jehova nga epektibo unay daytoy. Nakallalagip daytoy a kampania.”

Di inggagara nga agpada nga adres ti naited a suratan da Sister Meharaja Vijaya ken Imayanathan Amutha. Imbelleng ti sinuratanda ti umuna a surat, a dina man la linuktan dayta. Kalpasanna, nakitana ti maikadua a surat. Imbagana a nakapatpateg la ketdi ti linaon dagiti surat ta uray la namindua a naipatulod. Binasana ti magasin sa tinawaganna ti kabsat a nangipatulod iti maikadua a surat ken immanamong a mayadalan iti Biblia.

Adda maysa nga opisial a timmawag iti sangay iti Sri Lanka idi nakaawat iti magasin. Imbagana nga awan pay ti naam-ammona a Saksi ni Jehova uray no isu ket Kristiano. Kalpasan ti panangapresiarna kadagiti linaon ti magasin ken ti website-tayo, insaludsodna: “Kasano ti agbalin a maysa a Saksi ni Jehova?” Nayurnos a masarungkaran a dagus.

Masansan a maisursuro ti maipapan iti politika iti eskuelaan ti 13 ti tawenna nga agibumbunannag. Inlawlawagna no kasano a nakatulong kenkuana ti kampania idi Nobiembre: “Naturturedakon a mangilawlawag kadagiti titserko no apay a neutral ti takderko. Daytoy ti ad-adda a nangpatibker iti pammatik.”

Kasta met laeng ti narikna ni Sister Margit Haring. Insuratna: “Ad-adda a timmured ken rimmegtaak. Idi damo, agnerbiosak uray panunotek laeng ti makisarita kadagiti negosiante ken opisial iti gobierno. Dakkel ti maitulongna iti masanguanan no masursurok a sikakalma nga idepensa ti pammatik.”

Imbaga ti maysa a panglakayen: “Ad-adda a naparegtaak iti kaadu dagiti nagpayunir uray no nakaro ti sakitda. Mabalin met koma nga ibagada a saandan a kabaelan ti agpayunir. Ngem ginundawayanda ti makiraman iti kampania. Nakalua ti amin idi inyebkasda ti ragsak ken panagyamanda ken Jehova ken kadagiti kakabsat.”

Nakaad-adu dagiti kapadasan ken ebkas ti panagyaman manipud iti intero a lubong, nga uray la saantayo a mayestoria amin. Talaga a makaparagsak ti mangidanon iti mensahe maipapan iti Pagarian iti minilion a tattao.—Juan 15:11.