Umuna Kadagiti Taga-Corinto 9:1-27
9 Saan aya a nawayaak? Saanak aya nga apostol? Diak aya nakita ni Jesus nga Apotayo?+ Saan aya a dakayo ti bunga ti panagserbik iti Apo?
2 Uray no saanak nga apostol iti sabsabali, sigurado nga apostolak kadakayo! Ta kaslakayo selio a mangpatalged a maysaak nga apostol iti Apo.
3 Daytoy ti depensak kadagidiay mangsuksukimat kaniak:
4 Saan kadi nga adda kalinteganmi* a mangan ken uminum?
5 Saan kadi nga adda kalinteganmi a kaduaennakami ti manamati nga asawa,*+ kas iti dadduma nga apostol ken kadagiti kakabsat ti Apo+ ken ni Cefas?*+
6 Wenno dakami laeng aya ken Bernabe+ ti awanan iti kalintegan a di agtrabaho iti pagbiagmi?
7 Adda kadi soldado nga agserbi iti bukodna a gastos? Adda kadi agmula kadagiti ubas a di mangan iti bungana?+ Wenno adda kadi pastor iti arban a di uminum iti gatas dagiti tarakenna?
8 Kapanunotan kadi ti tao ti ibagbagak? Wenno saan kadi nga ibagbaga met dagitoy ti Linteg?
9 Ta naisurat iti linteg ni Moises: “Diyo busalan* ti kalakian a baka bayat nga agir-irik.”+ Dagiti aya kalakian a baka ti pakaseknan ti Dios?
10 Wenno saan aya nga imbagana dayta para kadatayo? Pudno a naisurat dayta para kadatayo, ta mangnamnama ti tao nga agarado ken ti tao nga agirik nga umawat iti bingay.
11 No nangimulakami kadakayo iti naespirituan a bambanag, nalabes kadi no agapitkami iti material a suporta kadakayo?+
12 No adda kastoy a kalintegan ti sabali a tattao kadakayo, saan aya nga ad-adda pay kadakami? Ngem saanmi nga inusar daytoy a kalintegan,*+ no di ket ib-ibturanmi ti amin a banag tapno saanmi a pulos malapdan ti naimbag a damag maipapan iti Kristo.+
13 Diyo aya ammo a dagiti lallaki a mangar-aramid iti sagrado a trabaho manganda iti bambanag nga aggapu iti templo, ken dagidiay regular nga agserserbi iti altar adda bingayda iti altar?+
14 Iti kastoy met a pamay-an, imbilin ti Apo kadagidiay mangipakpakaammo iti naimbag a damag nga agbiagda babaen ti naimbag a damag.+
15 Ngem diak inusar ti uray maysa kadagitoy a probision.+ Kinapudnona, diak insurat dagitoy a banag tapno maipaay koma dayta kaniak, ta nasaysayaat a matayak ngem ti aramidek dayta. Diak ipalubos nga adda tao a mangipaidam iti rasonko nga agpannakkel!+
16 Ita, no ipakpakaammok ti naimbag a damag, saan a dayta ti rason nga agpannakkelak, ta dayta ti responsabilidadko. Kaasiak pay no diak ipakaammo ti naimbag a damag!+
17 No situtulok nga aramidek daytoy, adda gunggonak; ngem uray no mapilitanak, adda latta kaniak ti annongen a naitalek kaniak.+
18 Ania ngarud ti gunggonak? Ti panangipakaammok iti naimbag a damag nga awan bayadna, tapno maliklikak nga abusuen ti autoridadko* mainaig iti naimbag a damag.
19 Ta nupay saanak nga adipen ti amin a tao, pinagbalinko ti bagik nga adipen ti amin, tapno adu a tattao ti matulongak.
20 Kadagiti Judio, nagbalinak a kas Judio tapno matulongak ida;+ kadagiti mangsursurot iti linteg, nagbalinak a kas mangsursurot iti linteg, nupay saan a masapul a surotek ti linteg, tapno matulongak dagiti mangsursurot iti linteg.+
21 Kadagiti awanan linteg, nagbalinak a kas awanan linteg, nupay saanak nga awanan linteg iti Dios no di ket sursurotek ti linteg mainaig ken Kristo,+ tapno matulongak dagiti awanan linteg.
22 Kadagiti nakapuy, nagbalinak a nakapuy, tapno matulongak ida.+ Inaramidko ti amin tapno matulongak ti amin a kita ti tattao, tapno iti amin a pamay-an, adda dagiti maisalakanko.
23 Ngem aramidek ti amin a banag gapu iti naimbag a damag, tapno mairanudko dayta iti sabsabali.+
24 Diyo aya ammo nga agtaray amin a tumataray iti lumba, ngem maysa laeng ti umawat iti premio? Agtaraykayo iti kasta a pamay-an tapno mangabakkayo.+
25 Amin a makilumba* ket agteppel iti amin a banag. Siempre, aramidenda dayta tapno awatenda ti korona nga agrupsa,+ ngem datayo, awatentayo ti korona a di agrupsa.+
26 Gapuna, adda panggep ti panagtarayko;+ sigsiguraduek dagiti danogko tapno saan nga angin ti dandanogek;
27 ngem dandanogek* ti bagik+ ken ad-adipenek, tapno saanak nga agbalin a di naanamongan* kalpasan a nakasabaak ti sabsabali.
Footnotes
^ Lit., “autoridadmi.”
^ Wenno “kabsat a babai kas asawa.”
^ Naawagan met iti Pedro.
^ Wenno “kaluban ti ngiwat.”
^ Lit., “nga autoridad.”
^ Wenno “kalintegak.”
^ Wenno “Tunggal atleta.”
^ Wenno “dusdusaek; siiistrikto a disdisiplinaek.”
^ Wenno “saanak a madiskualipikar.”
