Maikadua a Surat ni Juan 1:1-13
1 Siak ti lakay* nga agsursurat iti ina a pinili ti Dios, ken kadagiti annakna. Talaga nga ay-ayatenkayo. Saan la a siak no di ket ti amin a makaammo iti kinapudno,
2 gapu iti kinapudno nga agtalinaed kadatayo, ken adda kadatayo iti agnanayon.
3 Ti Dios nga Ama ken ni Jesu-Kristo nga Anakna ti mangtedto kadatayo iti kinapudno ken ayat. Ipaayandatayto iti nagpaiduma a kinaimbag, asi, ken talna.
4 Naragsakanak unay ta nasarakak ti dadduma kadagiti annakmo a magmagna iti kinapudno,+ a kas iti bilin nga inawattayo iti Ama.
5 Isu a kiddawek ita kenka, ina, nga agiinnayattayo. (Saan a baro a bilin ti isursuratko kenka, no di ket daydiay addan kadatayo sipud pay idi damo.)+
6 Ket daytoy ti kaipapanan ti ayat, nga agtultuloytayo a magna maitunos kadagiti bilinna.+ Isu daytoy ti bilin, kas iti nangngegyo manipud idi damo, a rumbeng nga agtultuloykayo a magna iti dayta.
7 Ta adu a manangallilaw ti nakastrek ditoy lubong,+ dagidiay saan a mangbigbig ken Jesu-Kristo nga immay kas tao.+ Isu daytoy ti manangallilaw ken ti antikristo.+
8 Agannadkayo, tapno diyo mapukaw ti bambanag a nagbannoganmi, no di ket magun-odanyo koma ti naan-anay a gunggona.+
9 Tunggal maysa a lumbes ken saan nga agtalinaed iti sursuro ti Kristo awan kenkuana ti Dios.+ Ti agtalinaed iti daytoy a sursuro isu daydiay adda kenkuana agpadpada ti Ama ken ti Anak.+
10 No adda asinoman nga umay kadakayo ket dina iyeg daytoy a sursuro, diyo pulos awaten kadagiti pagtaenganyo+ wenno kablaawan.
11 Ta ti mangkablaaw kenkuana ket makiramraman kadagiti dakes nga aramidna.
12 Uray adu koma ti isuratko kadakayo, diak kayat nga aramiden dayta iti papel ken tinta, ngem namnamaek ti umay kadakayo ken personal a makasaritakayo tapno nakaragragsakkayonto.
13 Pakpakomustaannakayo dagiti annak ti kabsatmo a babai, daydiay pinili ti Dios.
Footnotes
^ Wenno “panglakayen.”
