Jeremias 25:1-38
25 Ti mensahe a naipakaammo ken Jeremias maipapan iti amin a tattao ti Juda idi maikapat a tawen ti panagturay ti anak ni Josias a ni Jehoiakim+ nga ari ti Juda, bayat ti umuna a tawen ti panagturay ni Ari Nabucodonosor* ti Babilonia.
2 Daytoy ti imbaga ni propeta Jeremias maipapan iti amin a tattao ti Juda ken amin nga agnanaed iti Jerusalem:
3 “Manipud iti maika-13 a tawen ti panagturay ni Josias+ nga anak ni Amon, ti ari ti Juda, agingga ita nga aldaw, kadagitoy 23 a tawen, naipakaammo kaniak ti mensahe ni Jehova, ket maulit-ulit a nagsaoak kadakayo,* ngem saankayo a nangipangag.+
4 Ket maulit-ulit nga imbaon kadakayo* ni Jehova ti amin nga adipenna a propeta, ngem saankayo a nangipangag ken saanyo nga inyasideg ti lapayagyo tapno dumngegkayo.+
5 Ibagbagada, ‘Pangngaasiyo ta isardengyo dagiti dakes nga aramid ken kababalinyo;+ tapno agtultuloy ti napaut a panagnaedyo iti daga a nabayagen nga inted ni Jehova kadakayo ken kadagidi ammayo.
6 Dikay agdaydayaw, agserbi, ken agruknoy kadagiti sabali a dios tapno saandak a mapagura iti aramid dagiti imayo; ta no saan, didigraenkayo.’
7 “‘Ngem saandak nga impangag,’ kuna ni Jehova. ‘Pinagpungtotdak ketdi iti aramid dagiti imayo isu a dinidigrakayo.’+
8 “Daytoy ngarud ti imbaga ni Jehova a panguluen dagiti armada, ‘“Gapu ta saankayo a nagtulnog kadagiti imbagak,
9 paayabak ti amin a pamilia iti amianan,”+ kuna ni Jehova, “paayabak ti adipenko a ni Ari Nabucodonosor* ti Babilonia,+ ket paumayek ida maibusor iti daytoy a daga+ ken kadagiti agnanaed iti dayta ken iti amin a nasion iti aglikmut.+ Dadaelek ida ket pagbalinek ida a pagbutbutngan ken mauy-uyaw* ket agnanayonto ti pannakadadaelda.
10 Pasardengekto ti panagraragsak ken panagrarag-o,+ ti timek ti nobio ken ti nobia,+ ti uni ti gilingan a pusiposen ti ima ken ti lawag ti lampara.
11 Agbalinto a langalang daytoy a daga ken agbalin a pagbutbutngan, ket mapilitanto dagitoy a nasion nga agserbi iti ari ti Babilonia iti 70 a tawen.”’+
12 “‘Ngem inton natungpalen ti 70 a tawen,+ singirekto* ti ari ti Babilonia ken dayta a nasion gapu iti biddutda,’+ kuna ni Jehova, ‘ket pagbalinekto ti daga dagiti Caldeo nga agnanayon a langalang.+
13 Siguraduek a mapasamakto iti dayta a daga ti amin nga imbagak maibusor iti dayta, amin a naisurat iti daytoy a libro nga impadto ni Jeremias maibusor iti amin a nasion.
14 Ta adipenento ida+ ti adu a nasion ken naindaklan nga ar-ari,+ ket balsekto ida gapu kadagiti aramidda ken aramid dagiti imada.’”+
15 Ta daytoy ti imbaga kaniak ni Jehova a Dios ti Israel: “Alaem iti imak daytoy a kopa ti arak ti pungtot, ket painumem ti amin a nasion a pangibaonak kenka.
16 Inumendanto ket agibar-ibarda ken agtignayda a kasla bagtit gapu iti espada nga iyegko kadakuada.”+
17 Isu nga innalak ti kopa iti ima ni Jehova ket pinainumko ti amin a nasion a nangibaonan kaniak ni Jehova:+
18 inrugik iti Jerusalem ken kadagiti siudad ti Juda,+ kadagiti ari ken prinsipena, tapno madadaelda, agbalinda a pagbutbutngan, mauy-uyaw ken lunod,+ kas iti daytoy nga aldaw;
19 ket kalpasanna, ken Faraon nga ari ti Egipto ken kadagiti adipenna, prinsipena, ken amin nga umilina,+
20 ken amin a nagduduma a residente kadagita; amin nga ari iti daga ti Uz; amin nga ari iti daga dagiti Filisteo,+ iti Askelon,+ Gaza, Ekron, ken kadagidiay natda iti Asdod;
21 Edom,+ Moab,+ ken kadagiti Ammonita;+
22 amin nga ari iti Tiro, amin nga ari iti Sidon,+ ken kadagiti ari iti isla iti baybay;
23 iti Dedan,+ Tema, Buz, ken iti amin a naputdan ti buok iti pispisda;+
24 amin nga ari dagiti Arabiano+ ken amin nga ari ti nagduduma a residente iti let-ang;
25 ken amin nga ari ti Zimri, amin nga ari ti Elam,+ ken amin nga ari dagiti Medo;+
26 ken amin nga ari iti amianan nga adda iti asideg ken adayo, nga agsasaruno, ken amin a dadduma pay a pagarian iti intero a daga; sa kalpasanda, uminumto ti ari ti Sesak.*+
27 “Ket masapul nga ibagam kadakuada, ‘Daytoy ti kuna ni Jehova a panguluen dagiti armada, ti Dios ti Israel: “Uminumkayo, agbartekkayo, ken agsaruakayo. Matumbakayo tapno saankayon a makabangon+ gapu iti espada nga iyegko kadakayo.”’
28 Ket no saanda a kayat ti uminum iti iggemmo a kopa, ibagam kadakuada, ‘Daytoy ti kuna ni Jehova a panguluen dagiti armada: “Masapul nga uminumkayo!
29 Ta kitaenyo! no ti siudad a nakaipanaganan ti naganko ti umuna a didigraek,+ saankayo met aya a dusaen?”’+
“‘Dusaenkayonto, ta mangayabak iti espada maibusor iti amin nga agnanaed iti daga,’ kuna ni Jehova a panguluen dagiti armada.
30 “Ket masapul nga ipadtom kadakuada dagitoy amin a sasao, ket ibagam kadakuada,‘Manipud iti ngato, agungorto ni Jehova,Ket manipud iti nasantuan a pagnaedanna, ipangngegnanto ti timekna.
Napigsanto ti timekna iti lugar a paggigiananna.
Agpukkaw a kas kadagidiay agpayatpayat iti pagpespesan iti ubas,Agkantanto a sibaballigi maibusor iti amin nga agnanaed iti daga.’
31 ‘Addanto ariwawa a mangngeg iti intero a daga,Ta adda pammabasol ni Jehova kadagiti nasion.
Isu a mismo ti mangukom iti amin a tattao.*+
Dagiti managdakdakes ket papatayennanto iti espada,’ kuna ni Jehova.
32 Daytoy ti kinuna ni Jehova a panguluen dagiti armada,
‘Kitaenyo! Agsaknapto ti didigra iti nadumaduma a nasion,+Addanto nadawel a bagyo nga aggapu kadagiti kaadaywan a paset ti daga.+
33 “‘Dagidiay pinatay ni Jehova iti dayta nga aldaw ket manipud iti maysa nga ungto ti daga agingga iti sabali nga ungto ti daga. Saandanto a madung-awan, maurnong, wenno maitabon. Agbalindanto a kas ganagan iti rabaw ti daga.’
34 Aganug-og ken umkiskayo gapu iti liday, dakayo a papastor!
Agilad-iladkayo, dakayo a natan-ok iti arban,Ta dimtengen ti oras a pannakapapatayyo ken pannakaiwarawarayo,Ket matnagkayto a kas iti nangina a pagkargaan!
35 Awan ti pagkamangan dagiti papastor,Ket saan a makatalaw dagiti natan-ok iti arban.
36 Denggenyo! Ti ikkis dagiti papastorKen ti anug-og dagiti natan-ok iti arban,Ta daddadaelen ni Jehova ti pagpaspastoranda.
37 Dagiti natalna a pagyanan ket napagbalinen nga awan biagnaGapu iti sumsumged a pungtot ni Jehova.
38 Pinanawanna ti rukibna a kas iti urbon a leon,*+Ta ti dagada ket nagbalin a pagbutbutnganGapu iti mangirurumen nga espadaKen gapu iti sumsumged a pungtotna.”
Footnotes
^ Lit., “Nabucodorosor,” sabali pay nga ispelingna.
^ Lit., “nasapaak a bimmangon ken nagsao.”
^ Lit., “nasapa a bimmangon ken imbaon.”
^ Lit., “Nabucodorosor,” sabali pay nga ispelingna.
^ Lit., “banag a masagawisiwan.”
^ Wenno “dusaekto.”
^ Agparang a maysa daytoy a nalimed ti kaipapananna a nagan a tumukoy iti Babel (Babilonia).
^ Lit., “amin a lasag.”
^ Wenno “burboran a bumaro a leon.”
