IDI Sabado, Abril 25, 2015, ginunggon ti 7.8-magnitude a ginggined ti Nepal, ti pagilian a kabambantayan ti kaaduan a pasetna ken adda iti amianan ti India. Napasamak ti ginggined agarup 80 a kilometro iti amianan a laud ti kabesera a Kathmandu. Nagsaem ta nasurok a 8,500 a tattao ti natay, isu a daytoy pay laeng ti natural a didigra a kaaduan iti natay a nairekord idiay Nepal. Nasurok a kagudua a milion a balay ti nadadael. Adda 2,200 a Saksi ni Jehova idiay Nepal ken kaaduanna ti aggigian iti apektado a lugar. Makapaladingit ta natay ti maysa a Saksi ken ti dua nga annakna.

Kuna ti maysa a Saksi a ni Michelle: “Idi nagginggined, madama ti gimong dagiti kongregasion nga adda iti lugar a kakaruan a naapektaran.” Innayonna: “No napasamak dayta bayat nga adu ti adda iti balayda, ad-adu koma pay ti natay.” Apay a saan a naan-ano dagiti nakigimong? Dakkel ti naitulong ti disenio ti Kingdom Hall.

Dagiti moderno a Kingdom Hall idiay Nepal ket nadisenio a makaandur iti ginggined. Kuna ni Man Bahadur a karaman iti panangibangon iti Kingdom Hall: “Kanayondakami a damagen no apay a kasta ti katibker ti pundasion nga ar-aramidenmi para kadagiti babassit nga estruktura. Makitami itan ti pagimbaganna!” Kalpasan ti ginggined, naaprobaran a mausar dagiti Kingdom Hall kas temporario a pagyanan. Natalged ti rikna dagiti Saksi ni Jehova ken dagiti kaarrubada sadiay nupay adda dagiti aftershock, wenno nakapkapsut a paraipus ti ginggined.

Dagus a binirok dagiti mangidadaulo a Kristiano a panglakayen dagiti mapukpukaw a miembro ti kongregasion. Kinuna ti Saksi a ni Babita: “Inyun-una dagiti panglakayen ti pagimbagan ti kongregasion imbes a ti bukodda a pagimbagan. Natukay ti riknami a nakakita iti kasta nga ayat.” Kabigatanna kalpasan ti ginggined, ti tallo a miembro ti komite a mangidadaulo iti trabaho dagiti Saksi ni Jehova idiay Nepal, kasta met dagiti agdaldaliasat a ministro, wenno manangaywan iti sirkito, binisitada dagiti kongregasion tapno ammuenda ti kasapulan dagiti kapammatianda ken tulonganda dagiti panglakayen.

Innem nga aldaw kalpasan ti ginggined, simmangpet ni Gary Breaux ken ti asawana a ni Ruby idiay Nepal manipud iti sangalubongan a hedkuarter dagiti Saksi idiay United States. Kinuna ni Reuben a maysa a miembro ti nadakamat itay a komite: “Gapu iti kinagulo idiay Kathmandu ken kadagiti aftershock, saankami a sigurado no makaumay da Brother Breaux. Ngem determinado nga umay ditoy—ket talaga a nakaumay! Inapresiar unay dagiti lumugar a Saksi ti ibibisitana.”

Kinuna ni Silas nga agtrabtrabaho iti opisina dagiti Saksi idiay Nepal: “Apaman a natarimaan ti linia ti telepono, agsasarunon dagiti tawag, aldaw man ken rabii! Maseknan kadakami dagiti padami a Saksi iti intero a lubong. Nupay saanmi a maawatan ti lengguahe ti dadduma, nariknami ti ayat ken gagarda a tumulong.”

 Kalpasan ti ginggined, sumagmamano nga aldaw a nangipan dagiti lumugar a Saksi iti makan kadagiti Kingdom Hall para kadagiti agkasapulan. Nayurnos pay ti Disaster Relief Committee. Di nagbayag, nagsangpeten ti aglaplapusanan a suplay. Kaaduan kadagita ti naggapu idiay Bangladesh, India, ken Japan. Iti uneg ti sumagmamano nga aldaw, simmangpet ti maysa a medical team dagiti Saksi manipud Europe. Nangaramidda iti estasionda iti maysa a Kingdom Hall. Dagus a nagtrabahoda. Saanda laeng nga ineksamen ti pisikal a kondision dagiti biktima no di ket tinulonganda pay ida a mangsango iti pannaka-trauma-da.

Ipakita daytoy a komento ti maysa a babai a ni Uttara ti rikna ti adu: “Nakaam-amak ken nakabutbuteng ti ginggined. Ngem kalpasanna, nariknami a nasingsingedkamin kadagiti kapammatianmi kompara idi.” Wen, saan a pinakapuy ti ginggined ti ayat dagiti adipen ni Jehova kenkuana ken iti maysa ken maysa. Pinatibker pay ketdi ti ginggined dayta nga ayat.