TARTARIGAGAYAN TI TAO TI AYAT. No awan ti ayat, saan a tumibker ti relasion ti agassawa, agkakapamilia, wenno aggagayyem. Maibagatayo ngarud a nagpateg ti ayat tapno natalna ti panunot ken naragsaktayo. Ngem ania ti kaipapanan ti “ayat”?

Saan a romantiko nga ayat ti matuktukoy ditoy, nupay napateg met dayta. Imbes ketdi, nangatngato dayta a klase ti ayat ta tignayenna ti maysa a mangipakita iti pudno a pannakaseknan iti sabsabali, nga iyun-unana ti pagimbaganda. Dayta nga ayat ket naibatay iti nadiosan a prinsipio ken napakuyogan iti rikna ken dungngo.

Nagpintas daytoy a pannakailadawan ti ayat: “Ti ayat mabayag-panagituredna ken manangngaasi. Ti ayat saan a managimon, saan nga agpangas, saan nga agtangsit, saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot. Saanna nga ing-ingpen ti pannakadangran. Saanna a pagrag-oan ti kinakillo, no di ket makipagrag-o iti kinapudno. Anusanna ti amin a bambanag, . . . inanamaenna ti amin a bambanag, ibturanna ti amin a bambanag. Ti ayat saan a pulos aggibus.”—1 Corinto 13:4-8.

Dayta nga ayat ket “saan a pulos aggibus,” ta saan nga agpatingga. Kinapudnona, tumibker dayta iti panaglabas ti panawen. Ket gapu ta naanus, naasi, ken manangpakawan ti ayat, dayta ti “naan-anay a singgalut ti panagkaykaysa.” (Colosas 3:14) Gapuna, natalged ken naragsak ti relasion a naibatay iti kasta nga ayat uray imperpekto dagiti indibidual. Kas pagarigan, kitaentayo ti relasion ti agassawa.

Nangisuro ni Jesu-Kristo kadagiti nagsayaat a prinsipio iti panagassawa. Kas pagarigan, kinunana: “‘Ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’ . . . Gapuna, ti pinagsinnangol ti Dios saan koma a pagsinaen ti tao.” (Mateo 19:5, 6) Adda dua a nagpateg a prinsipio a naitampok.

“DAGITI DUA MAYMAYSADANTON A LASAG.” Ti panagtipon ti agassawa ti kadekketan a relasion iti nagbaetan dagiti tattao, ket gapu iti ayat maliklikan ti panangliput—ti pannakirelasion ti lalaki wenno ti babai iti saanna nga asawa. (1 Corinto 6:16; Hebreo 13:4) Ti panangliput dadaelenna ti panagtalek ken ti panagassawa. Nakarkaro pay ti epekto dayta iti annakda ta mariknada nga awan mangay-ayat kadakuada, mapukaw ti panagtalekda, wenno agsakit ti nakemda.

“TI PINAGSINNANGOL TI DIOS.” Ti panagassawa ket sagrado a panagtipon. No bigbigen ti agassawa dayta a kinapudno, ikagumaanda a patibkeren ti relasionda. Saanda nga agbirok iti pambar a makisina no adda problema. Nalagda ken naandur ti ayan-ayatda. Dayta nga ayat “anusanna ti amin a bambanag,” a makatulong iti panangsolbar kadagiti problema tapno mataginayon ti panagkaykaysa ken talna ti agassawa.

Nagsayaat ti epektona iti annak ti managsakripisio nga ayat dagiti nagannak iti maysa ken maysa. Kastoy ti obserbasion ti agtutubo a ni Jessica: “Talaga nga ay-ayaten ken resrespetuen da Tatang ken Nanang ti maysa ken maysa. No makitak a resrespetuen ni Nanang ni Tatang, aglalo no sisasangokami nga annakda, kayatko a tuladen ni Nanang.”

Ayat ti kangrunaan a kualidad ti Dios. Kinapudnona, kuna ti Biblia: “Ti Dios ket ayat.” (1 Juan 4:8) Saan ngarud a pakasdaawan a naawagan met ni Jehova iti “naragsak a Dios.” (1 Timoteo 1:11) Naragsaktayo met no ikagumaantayo a tuladen dagiti kualidad ti Namarsua kadatayo—aglalo ti ayatna. Kuna ti Efeso 5:1, 2: “Agbalinkayo a tumutulad iti Dios, kas annak a dungdungnguen, ket itultuloyyo ti magna iti ayat.”