Manipud Kadagiti Agbasbasa

Panagsugal Kabasbasak ti serye a “Panagsugal​—Di Aya Makadangran a Paglinglingayan?” (Hulio 22, 2002) Agyamanak ken Jehova gapu iti panangusarna kadakayo a mangipablaak iti daytoy naintiempuan nga impormasion. Nasdaawak unay idi nabasak dagiti nailista a kababalin dagidiay addaan problema iti panagsugal. Kas man la ni lakayko ti tuktukoyenyo! Nakalkaldaang ta daytoy a basol ti nangiturong iti dadduma pay a nakaro a basol. Maysa nga epidemia ti panagsugal. Talaga a namnamaek a laglagipento ti amin a makadangran dayta a paglinglingayan.

M. G., Estados Unidos

Dagiti Kulibangbang Sangapulo ti tawenko, ket naragsakanak unay a nangbasa iti artikulo a “Panagapit Kadagiti Nagpayak a Produkto.” (Hulio 22, 2002) Itay napan a tawen, adda proyektomi idiay eskuelaan maipapan kadagiti kulibangbang. Adda igges a naipaaywan iti tunggal estudiante. Masapul a pakanenmi ti igges iti kada aldaw, ken kanayon a dalusanmi ti nangikabilanmi iti dayta. Uppat kadagiti igges ti nakitak pay ketdi nga agluplupos. Idi nagaramidda iti balayda, insublimi idan iti pasdek a pagpaliiwan kadagiti sibibiag a banag. Kalpasanna, pinasiarmi dagiti nagbalinen a kulibangbang iti simmaganad a primavera. Pangngaasiyo ta itultuloyyo ti agsurat kadagiti kasta a makaay-ayo nga artikulo.

B. P., Alemania

Dimmakkelak iti maysa a balay nga asideg iti tay-ak, ket gagangay a makakitaak iti adu a kulibangbang iti arubayanmi. Kanayon a magustuak ti kinapintasda. Ita ta nataenganakon, tultulongandak dagitoy nalami a parsua a mangutob kadagiti galad ni Jehova. (Roma 1:20) Naragsakanak idi nakitak ti retrato dagiti namaris a kulibangbang iti Agriingkayo! Pagyamanan iti nagsayaat a trabahoyo.

D. G., Slovakia

Postpartum Depression Natakuatak a ti impormasion iti artikulo a “Nagballigiak a Nakidangadang iti Postpartum Depression” (Hulio 22, 2002) ket agaplikar iti aniaman a kita ti depression. Kanayon a makidangdangadangak iti depression. Makaparegta unay a maammuan a saanak nga agmaymaysa ken agpatingganton ti depression, agraman ti dadduma pay a sakit, inton agturayen ti Pagarian ti Dios.

C. H., Estados Unidos

Kalpasan a nagpasngayak iti maladaga a babai, sangapulo a bulan ti napalabasen, nangrugin a nagsagabaak iti postpartum psychosis. Diak idi kayat nga aywanan ti anakko. Talaga a nakatulong ti panangagas ken naayat a panangandingay ti pamiliak ken ti kongregasion. Sapay koma ta makatulong daytoy nga artikulo iti dadduma pay a babbai ken dagiti pamiliada tapno maawatanda daytoy a sakit. Panggepko nga ikkan ti doktorak iti kopia daytoy a magasin.

S. Z., South Africa

Kalpasan a naipasngay ti maikadua nga anakko, nagsagabaak iti nakaro a depression. Pinaregtadak dagiti gagayyemko ken ti pamiliak nga agpadoktorak. Agyamanak ta mangipapaay ti organisasion ni Jehova iti naespirituan a taraon iti umiso a tiempo babaen kadagiti publikasion a kas iti Agriingkayo!

C. O., Estados Unidos

Buok Kayatko nga iyebkas ti naimpusuan a panagyamanko gapu iti artikulo a “Madanaganka Aya Maipapan iti Buokmo?” (Agosto 8, 2002) Tallopulo ket innem ti tawenko, ket medio nabayag metten a madanaganak iti medio panagurot ken iyiingpis ti buokko. Nakatulong kaniak ti artikulo tapno maawatak a gagangay laeng a mapasamak ti panagurot iti kada aldaw. Nataltalna itan ti riknak. Itultuloyyo ti agipablaak kadagiti artikulo a kas iti daytoy!

V. G., Slovakia

Naawatko daytoy nga artikulo iti umiso a tiempo. Madanaganak unay idi agsipud ta agur-urot ti buokko. Kimmalmaak gapu iti artikulo, nangruna iti nadakamatna a “masansan a saan a maseknan ti sabsabali maipapan iti buokmo a kas iti pannakaseknanmo.” Tinulongannak met idi naammuak nga uray awan problema ti maysa a tao iti buokna, agarup 70 agingga iti 100 ti agurot iti kada aldaw!

E. L., Estados Unidos