Umadanika iti Dumdumngeg iti Kararag

ADU nga agkunkuna a mamati iti Dios dida mailawlawag no apay a patienda nga adda Dios. Dida met mailawlawag no apay a masansan a dakes ti impluensia ti relihion wenno apay nga ipalubos ti Dios ti panagsagaba. Basta agkararagda latta iti Dios uray no agduaduada.

Ngem mabalin nga ad-adda pay a sumingedka iti Dios. Mapabileg met ti pammatim no tarusam a nalaing ti maipapan iti Dios. Dayta ti mangtignay kenka a mangayat ken mangipateg iti Dios. Ti pudno a pammati ket naibatay iti ebidensia. (Hebreo 11:1) No maammuam ti kinapudno, maam-ammom ti Dios ken mabalinmo ti makisao kenkuana kas maysa a gayyem. Usigem ti kapadasan ti dadduma a masansan nga agkararag uray agduaduada no adda Dios.

▪ Kuna ni Patricia a nadakamat iti umuna nga artikulo: “Naminsan, agarup 10 kadakami nga aggagayyem ti nagsasarita maipapan iti relihion. Imbagak kadakuada a pinanawak ti diskusion ti ateista a tatangko ken ti maysa a Saksi ni Jehova a simmarungkar iti balaymi. ‘Nalabit umiso dagiti Saksi ni Jehova,’ kuna ti maysa a gayyemko.

“‘Ania ngata no padasentayo ti makigimong?’ kinuna ti sabali, isu a napankami. Uray agduaduakami, intultuloy ti dadduma kadakami ti nakigimong gapu ta mannakigayyem dagiti Saksi.

“Ngem iti maysa a Domingo adda nangngegko a nangbalbaliw iti panangmatmatko. Inlawlawag ti ispiker no apay nga agsagsagaba dagiti tattao. Idi laeng a naammuak a naparsua gayam ti tao a perpekto ken gapu iti maysa a tao nangrugi ti basol ken ipapatay ket natawid dagiti tattao dayta. Inlawlawag pay ti ispiker a nasken a matay ni Jesus tapno maisubli iti sangatauan ti napukaw ti immuna a tao. * (Roma 5:12, 18, 19) Nagbalinen a nalawag kaniak ti amin. ‘Adda la ketdi Dios a maseknan kadatayo,’ kinunak. Intultuloyko ti nagadal iti Biblia ket di nagbayag iti umuna a gundaway, mariknak a pudno a persona ti pagkarkararagak.”

▪ Kuna ni Allan a nadakamat iti umuna nga artikulo: “Naminsan, simmarungkar dagiti Saksi  ni Jehova iti balaymi. Pinastrek ida ni baketko gapu ta interesado iti ibagbagada nga agnanayon a biag. Maluksawak, isu nga inguyodko ni baketko iti kosina ket kinunak, ‘Dika basta agpapaallilaw. Saan a nakappapati ti ibagbagada!’

“‘Ala ngarud, sika ti makisarita kadakuada ket paneknekam a di umiso ti ibagbagada,’ kinunana.

“Siempre, diak mapaneknekan. Ngem nakaan-anusda ken nangibatida iti libro a mangisalaysay no timmaud ti biag babaen ti panamarsua wenno ebolusion. Nakalawlawag dayta ken nagadu ti pammaneknek isu nga inkeddengko nga ammuen ti ad-adu pay maipapan iti Dios. Nakipagadalak iti Biblia kadagiti Saksi, ket idi agangay nabigbigko a naiduma ti isursuroda iti amin a pagarupko maipapan iti relihion. Idi adun ti nasursurok maipapan ken Jehova, nagbalinen nga espesipiko dagiti kararagko kenkuana. Adda dagiti di nasayaat a kababalinko, isu nga inkararagko a tulongannak. Ammok a sinungbatan ni Jehova dagiti kararagko.”

▪ Kuna ni Andrew a taga-England: “Nupay kombinsidoak iti patpatiek ken pagay-ayatko ti siensia, mamatiak iti teoria ti ebolusion gapu  laeng ta napaneknekan kanon. Diak mamati iti Dios gapu kadagiti dakes a mapaspasamak.

“Ngem pampanunotek no dadduma: ‘No adda Dios idiay langit, apay ngarud a mapaspasamak amin dagitoy. Apay a kumarkaro ti krimen ken gubat?’ No problemadoak, agkararagak no dadduma maipaay iti tulong ngem diak ammo no asino ti kasarsaritak.

“Idi agangay, adda nangted ken baketko iti tract nga impablaak dagiti Saksi ni Jehova a napauluan Daytoy Kadi a Lubong Makalasatto? Masansan nga isalsaludsodko dayta. Pinagpanunotnak dayta no, ‘Napateg nga usigen dagiti sungbat ti Biblia?’ Kalpasanna, bayat nga agbakbakasionak adda nangted kaniak iti libro a Ti Biblia​—Saot’ Dios wenno iti Tao? Idi naamirisko nga agtunos ti Biblia ken ti siensia, kayatko nga ad-adu pay ti maammuak maipapan iti Biblia. Isu nga immanamongak idi adda maysa a Saksi ni Jehova a nangibaga nga iyadalannak iti Biblia. Idi naawatak ti panggep ni Jehova, ammokon nga isu ket pudpudno a persona a mabalinko a kasarita babaen iti kararag.”

▪ Kuna ni Jan, maysa a babai a dimmakkel kas Protestante idiay London: “Gapu iti kinamanaginsisingpet ti relihion ken ti nakaro a panagsagaba, diak kayaten ti agbalin a miembro ti aniaman a relihion. Simmardengak metten a nagkolehio ket nagtrabahoakon kas kumakanta ken gitarista tapno adda kuartak. Idin ti panagam-ammomi ken Pat, a padak a di manamati nupay dimmakkel a Katoliko.

“Nagnaedkami iti nagpanawan a balay a kadua ti dadduma pay a simmardeng a nageskuela nga interesado iti relihion iti Daya. Nagpaut ti panagsasaritami maipapan iti kaipapanan ti biag agingga iti adalemen a rabii. Nupay agpadakami ken Pat a di mamati iti Dios, patienmi nga adda ‘mangsussustiner iti biag.’

“Naipasngay ti anakmi a lalaki idi immakarkami iti makin-amianan nga England. Sadiay a nagtrabahokami kas musikero. Maysa a rabii nagsakit ti anakmi, ket diak napupuotan ti nagkararag iti Dios a diak patien. Idi agangay, saanen a nasayaat ti relasionmi ken Pat isu nga innalak ti anakmi ket simminaak kenkuana. Nagkararagak manen maipaay iti tulong, bareng no adda dumngeg kaniak. Diak ammo a kasta met ti inaramid ni Pat.

“Kamalmanna, dua a Saksi ni Jehova ti nagtuktok iti ruangan ni Pat ket impakitada kenkuana dagiti praktikal a balakad ti Biblia. Timmawag ni Pat ken dinamagna no kayatko ti makikadua kenkuana a makipagadal iti Biblia kadagiti Saksi. Idi agangay, naammuanmi a tapno maay-ayomi ti Dios masapul nga agkasarkami. Kasla narigatmi nga aramiden dayta iti agdama a kasasaad ti relasionmi.

“Kayatmi a maammuan ti ad-adu pay maipapan iti kaitungpalan dagiti padto ti Biblia, ti makagapu iti panagsagaba, ken ti kaipapanan ti Pagarian ti Dios. In-inut a nabigbigmi a maseknan ti Dios, ken kayatmi nga aramiden ti pagayatanna isu a nagkasarkami. Nakatulong kadakami ti sirib a nagtaud iti Sao ti Dios tapno mapadakkelmi a nasayaat ti tallo nga annakmi. Kombinsidokami a dinengngeg ni Jehova dagiti kararagmi.”

Usigem Dagiti Ebidensia

Kas iti dadduma a minilion a tattao, dagiti nadakamat iti daytoy nga artikulo nakitada ti panangallilaw ti palso a relihion ken naammuanda no apay nga ipalpalubos ti Dios ti panagsagaba. Nadlawmo kadi a gapu iti umiso a pannakaawat iti Biblia, nakombinsir dagitoy nga indibidual a talaga a dumdumngeg ni Jehova kadagiti kararag?

Kayatmo kadi nga usigen ti ebidensia a talaga nga adda Dios? Maragsakan dagiti Saksi ni Jehova a tumulong kenka tapno maammuam ti kinapudno maipapan ken Jehova ken no kasano nga umadanika iti Dios a dumdumngeg iti kararag.​—Salmo 65:2.

[Footnote]

[Blurb iti panid 10]

“Idi naawatak ti panggep ni Jehova, ammokon nga isu ket pudpudno a persona a mabalinko a kasarita babaen ti kararag”

[Ladawan iti panid 9]

Ti pudno a pammati ket naibatay iti ebidensia ken ti tarigagay a mangammo iti kinapudno maipapan iti Dios